Ang Dapit sa Musika sa Modernong Pagsimba

ANG pag-awit maoy usa ka gasa gikan sa Diyos. Ang pagpatugbaw sa atong mga tingog diha sa awit makahatag ug kahimuot kanato ug sa atong Maglalalang. Pinaagi niana, atong ikabungat ang atong mga emosyon, ang mga kasubo ug mga kalipay. Gawas pa, ikapatugbaw nato ang atong gugma, pagsimba, ug pagdayeg sa Magbubuhat sa awit, si Jehova.

Ang kadaghanan sa mga tulo ka gatos nga mga paghisgot sa Bibliya sa musika may kalabotan sa pagsimba kang Jehova. Ang pag-awit gilangkit usab sa kalipay​—dili lamang sa kalipay niadtong nagaawit apan usab sa kalipay sa bahin ni Jehova. Ang salmista misulat: “Papag-awita sila kaniya. Kay si Jehova nahimuot sa iyang katawhan.”​—Salmo 149:3, 4.

Apan unsa ka hinungdanon ang pag-awit diha sa modernong pagsimba? Sa unsang paagi ang katawhan ni Jehova karong adlawa makapahimuot kaniya pinaagi sa pagpatugbaw sa ilang mga tingog diha sa awit? Unsay dapit sa musika diha sa matuod nga pagsimba? Ang pagtuki sa kasaysayan sa musika diha sa pagsimba motabang sa pagtubag niini nga mga pangutana.

Makasaysayanhong Dapit sa Musika Diha sa Pagsimba

Ang unang paghisgot sa Bibliya sa musika wala magtumong nga espesipiko may kalabotan sa pagsimba kang Jehova. Sa Genesis 4:21, si Jubal giila nga posibleng nag-imbento sa unang mga instrumento sa musika o tingali sa pagkamugna sa pipila ka matang sa propesyon sa musika. Bisan pa niana, ang musika maoy bahin sa pagsimba kang Jehova bisan sa wala pa lalanga ang mga tawo. Ang daghang hubad sa Bibliya naghubit sa mga manulonda nga nagaawit. Ang Job 38:7 naghisgot sa mga manulonda nga nanagsinggit sa kalipay ug “nanagsinggit nga namakpak.” Busa, adunay Kasulatanhong katarongan sa pagtuo nga ang pag-awit sa pagsimba kang Jehova maoy batasan nga dugay na sa wala pa motungha ang tawo.

Ang pipila ka historyano nangatarongan nga ang karaang Hebreohanong musika maoy pulos tono, walay nagpaluyong mga nota. Bisan pa niana, kapin sa usa ka nota ang mahimong ipatokar sa matag higayon diha sa alpa, ang instrumento nga gihisgotan kanunay sa Bibliya. Ang mag-aalpa makamatikod gayod sa nota nga ipatungha sa mga kombinasyon sa mga tono diha sa instrumento. Imbes kinaraan, ang ilang musika sa walay duhaduha maoy abante kaayo. Ug kon hukman pinaagig balak ug prosa sa Hebreohanong Kasulatan, ikahinapos nato nga ang Israelinhong musika maoy hataas ug kalidad. Dayag, ang inspirasyon sa mga pagkomposo ug musika mas labaw kay nianang sa silingang mga nasod.

Ang karaang organisasyon sa templo nagtaganag komplikadong mga kahikayan sa paggamit ug mga instrumento ug mga mag-aawit sa pagsimba diha sa templo. (2 Cronicas 29:27, 28) Dihay “mga direktor,” “mga batid,” “mga tinun-an,” ug “mga pangulo sa mga mag-aawit.” (1 Cronicas 15:21; 25:7, 8; Nehemias 12:46) Nagkomento sa ilang abanteng mga kahanas sa musika, ang historyano nga si Curt Sachs misulat: “Ang mga koro ug mga orkestra nga diha sa Templo sa Jerusalem nagsugyot ug hataas nga sukdanan sa edukasyon, kahanas, ug kahibalo sa musika. . . . Bisag kita wala masayod kon unsay honi nianang karaang musika, kita may igong ebidensiya sa gahom, dignidad, ug kabatid sa tigpatokar niini.” (The Rise of Music in the Ancient World: East and West, 1943, mga panid 48, 101-2) Ang Awit ni Solomon maoy usa ka pananglitan sa pagkamamugnaon ug kalidad sa Hebreohanong mga komposisyon. Kini maoy usa ka sugilanon nga giawit, susama sa libreto, o liriko, sa usa ka opera. Ang awit ginganlan sa Hebreohanong teksto nga “Awit sa mga Awit,” sa ato pa, ang labing ekselenteng awit. Alang sa karaang mga Hebreohanon, ang pag-awit maoy usa ka dakong bahin sa pagsimba. Ug kini nagtugot sa positibong pagpahayag sa emosyon diha sa ilang pagdayeg kang Jehova.

Pag-awit sa Unang-Siglong mga Kristohanon

Ang musika nagpadayon sa pagkahimong regular nga bahin sa pagsimba taliwala sa unang mga Kristohanon. Dugang pa sa dinasig nga mga Salmo, daw sila ang nagkomposo sa orihinal nga musika ug mga liriko alang sa pagsimba, nga nagpahimutang sa sumbanan sa modernong-adlawng komposisyon sa Kristohanong mga awit. (Efeso 5:19) Ang librong The History of Music, ni Waldo Selden Pratt, nagpatin-aw: “Ang pag-awit sa publiko ug pribadong pagsimba maoy naandan sa unang mga Kristohanon. Alang sa mga kinabig nga Hudiyo kini maoy pagpadayon sa mga kostumbre sa sinagoga . . . Dugang pa sa Hebreohanong mga Salmo . . . , ang bag-ong pagtuo kiling kanunay sa pagpatunghag bag-ong mga himno, sa sinugdan dayag diha sa pormang mga rapsodiya.”a

Nagpasiugda sa kahinungdanon sa pag-awit, sa dihang gisugdan ni Jesus ang Panihapon sa Ginoo, siya ug ang iyang mga tinun-an lagmit miawit sa mga Hallel. (Mateo 26:26-​30) Kini maoy mga awit sa pagdayeg kang Jehova nga girekord diha sa mga Salmo ug giawit maylabot sa pagsaulog sa Paskuwa.​—Salmo 113-118.

Ang Impluwensiya sa Bakak nga Pagsimba

Sa gitawag ug Mangiob nga Katuigan, ang relihiyosong musika nahimong masulub-ong yamyam. Sa mga 200 K.P., si Clemente sa Alejandria miingon: “Kita nagkinahanglan ug usa ka instrumento: ang malinawong pulong sa pagdayeg, dili mga alpa o mga tambol o mga plawta o mga trompeta.” Gipahamtang ang mga pagdili, nga naglimite sa musika sa simbahan sa mga binaba. Kini nga estilo nailhan ingong pagyamyam o yanong awit. “Menos sa kuwarenta ka tuig human matukod ang Constantinople, ang Konsilyo sa Laodicea (A.D. 367) nagdili sa pag-apil sa mga instrumento ug sa mga kongregasyon sa liturhiya. Ang ortodoksong musika pulos binaba lamang gayod,” nag-ingon ang librong Our Musical Heritage. (Italiko amoa.) Kini nga mga pagdili walay pasukaranan sa unang Kristiyanidad.

Sa panahon sa Mangiob nga Katuigan, ang Bibliya maoy usa ka siradong libro sa komong mga tawo. Ang mga Kristohanon nga mangahas sa pagbaton o pagbasa sa Bibliya gilutos ug gipatay pa. Nan, dili ikahibulong nga ang batasan sa pag-awit ug mga pagdayeg sa Diyos sa dakong bahin nahanaw sa panahon sa mangiob nga yugto. Aw, kon ang komong mga tawo wala makabaton sa Kasulatan, unsaon nila pagkahibalo nga usa sa napulo ka bahin sa tibuok Bibliya maoy awit? Kinsay magpahibalo kanila nga gisugo sa Diyos ang iyang mga magsisimba sa “pag-awit kang Jehova ug usa ka bag-ong awit, sa iyang pagdayeg diha sa kongregasyon sa mga maunongon”?​—Salmo 149:1.

Pagpasig-uli sa Musika sa Hustong Dapit Niini Diha sa Pagsimba

Ang organisasyon ni Jehova dakog nahimo sa pagpasig-uli sa musika ug pag-awit sa nahiangayng dapit niini sa pagsimba. Pananglitan, ang Pebrero 1, 1896, nga isyu sa Zion’s Watch Tower naglangkob lamang ug mga awit. Kadto nag-ulohan ug “Malipayong mga Awit sa Kabuntagon sa Sion.”

Sa 1938 ang pag-awit sa panahon sa mga tigom sa kongregasyon giwagtang sa bug-os. Ugaling, ang kaalam sa pagsunod sa panig-ingnan ug pagtultol sa mga apostol sa wala magdugay nangibabaw. Sa 1944 nga distritong kombensiyon, si F. W. Franz mihatag ug pakigpulong nga “Awit sa Pag-alagad sa Gingharian.” Gipakita niya nga ang mga awit sa pagdayeg kang Jehova gitanyag sa langitnong mga linalang sa Diyos dugay na sa wala pa lalanga ang tawo ug miingon: “Husto ug makapahimuot sa Diyos nga ang Iyang yutan-ong mga alagad magpatugbaw sa ilang mga tingog diha sa literal nga awit.” Human ipahayag ang mga katarongan sa pag-awit diha sa pagsimba, iyang gipahibalo ang pagluwat sa Kingdom Service Song Book nga gamiton sa senemanang mga tigom sa pag-alagad.b Dayon ang Disyembre 1944 nga Informant (karon gitawag ug Atong Ministeryo sa Gingharian) nagpahibalo nga ang ubang mga tigom usab maglakip sa pangbukas ug paniklop nga mga awit. Ang pag-awit sa makausa pa nahimong bahin sa pagsimba kang Jehova.

‘Pag-awit Diha sa Atong mga Kasingkasing Ngadto Kang Jehova’

Ang bili sa kinasingkasing nga pag-awit giilustrar sa atong mga igsoon sa Sidlakang Uropa ug sa Aprika nga nakasinati sa katuigan sa kalisod ug paglutos. Si Lothar Wagner gibartolina sulod sa pito ka tuig. Sa unsang paagi siya nakalahutay? “Sa daghang semana ako nagpunting sa akong pagtagad sa pagkompleto sa akong nahinumdoman nga mga awit sa Gingharian. Kon wala ako mahibalo sa tukmang mga liriko ikomposo ko na lang ang usa o duha ka estansa. . . . Pagkamakapadasig ug pagkamakapalig-on sa hunahuna ang mga kaundan sa atong mga awit sa Gingharian!”​—1974 Yearbook of Jehovah’s Witnesses, mga panid 226-​8.

Sulod sa lima ka tuig nga pagbartolina tungod sa iyang matinumanong pagbarog, si Harold King nakakaplag ug paghupay sa pagkomposo ug pag-awit sa mga awit sa pagdayeg kang Jehova. Ang ubay-ubay sa iyang mga komposisyon gigamit karon sa mga Saksi ni Jehova sa ilang pagsimba. Ang kalipay nga nalangkit sa pag-awit maoy usa nga makapalig-on. Apan dili na angayng makaagom ug paglutos aron makombinsir kita sa bili sa pag-awit ug mga pagdayeg sa Diyos.

Ang tanang katawhan ni Jehova makakaplag ug kalipay diha sa awit. Bisag kita may pipila ka mga panagana sa pagpahayag sa atong kaugalingon pinaagi sa mga pulong, ang atong mga pagbati kang Jehova mahimong bukas kon ipatugbaw nato kini diha sa awit. Gipakita ni apostol Pablo kon sa unsang paagi kita makakaplag ug kalipay sa pag-awit ug mga pagdayeg sa dihang siya nagtambag sa mga Kristohanon nga padayong “magapamulong nganha sa inyong kaugalingon uban sa mga salmo ug mga pagdayeg sa Diyos ug espirituwal nga mga awit, nga magaawit ug magaduyog sa inyong kaugalingon uban sa musika diha sa inyong mga kasingkasing ngadto kang Jehova.” (Efeso 5:19) Sa dihang ang atong mga kasingkasing mapuno sa espirituwal nga mga butang, kita makakaplag ug kusganong pamulong diha sa awit. Busa ang sekreto aron mapalambo ang pag-awit mao ang hustong tinamdan sa kasingkasing.

Ang pagbaton ug maayong relasyon kang Jehova makaamot sa usa ka mangayaong espiritu, nga mopalihok kanato sa pagsulti, pag-awit, ug pagsinggit ug mga pagdayeg kang Jehova. (Salmo 146:2, 5) Kita moawit nga kinasingkasing bahin sa mga butang nga atong gikalipayan. Ug kon magustohan nato ang awit o ang mga pulong sa awit, lagmit nga atong awiton kini uban ang tiunay nga pagbati.

Dili kinahanglang moawit ug kusog ang usa aron moawit nga may pagbati. Ang pag-awit ug kusog dili awtomatikong katumbas sa maayong pag-awit; ni ang pag-awit nga dili madungog ang tono. Ang pipila ka tingog nga may natural nga kalanog mahimong molabaw bisag mahinay tingali ang pag-awit. Ang bahin sa problema sa pag-awit ug maayo diha sa usa ka grupo mao ang pagtuon sa pagpahiangay sa tingog. Kon nagaawit ka man nga uyon o may ganay, ang gikusgon sa imong tingog uban niadtong sa duol kanimo moresultag mananoy ug dili yabag nga awit. Ang Kristohanong pagkamakasaranganon ug ang nagapamating dalunggan motabang sa usa nga mabatonan ang pagkatimbang sa pag-awit nga may kahimuot ug sa ingon dili magpasulabi sa iyang tingog. Apan, kadtong moawit nga may kahanas o sa pagkatalagsaon may maayong mga tingog dili angayng mawad-ag kadasig sa pag-awit. Ang maanindot nga tingog mohatag ug malig-ong pagpaluyo sa usa ka kongregasyon nga nag-awit ug mga pagdayeg kang Jehova.

Ang pag-awit sa atong mga tigom mohatag usab ug nahiangayng okasyon sa pag-awit sa panduyog nga mga ganay sa mga alawiton. Kadtong makaawit nga owido sa ganay o makabasa sa mga nota sa ganay diha sa songbok ug awiton kini gidasig sa pagpahiangay sa tingog sa pag-awit ug makadugang sa katahom sa musika.c

Ang pipila mahimong moingon, ‘Dili ako makamao sa tono’ o ‘Bati kaayo ang akong tingog; moyabag kini sa taas nga mga nota.’ Busa, sila maulawon inig-awit, bisan sa Kingdom Hall. Ang kamatuoran mao nga walay moawit ug pagdayeg kang Jehova nga “bati” sa iyang panglantaw. Maingon nga mapauswag ang tingog sa pagpanulti sa usa pinaagig pagbansay ug pagsunod sa makatabang nga mga sugyot nga gihatag sa Tunghaan sa Teokratikanhong Ministeryo, sa ingon ang pag-awit sa usa mapauswag. Ang uban nakapauswag sa ilang mga tingog pinaagig paglaylay lamang samtang nagabuhat sa mga buluhaton. Ang paglaylay motabang sa pagpahapsay sa tono sa tingog. Ug sa nahiangay nga mga panahon samtang kita nag-inusara o nagabuhat nga dili nato matugaw ang uban, ang pag-awit sa mga awit sa Gingharian maoy ekselenteng ehersisyo sa tingog ug usa ka paagi sa pagbutang sa usa diha sa malipayon, relaks nga panghunahuna.

Kita makadasig usab sa pag-awit sa pipila ka mga awit sa Gingharian diha sa mga panagtapok. Ang maong pag-awit, nga duyogan ug instrumento sama sa sista o piano o sa piano nga mga rekording sa Sosyedad, makahatag ug espirituwal nga kahimtang sa atong mga panagtapok. Kini motagana usab ug tabang sa pagkakat-on sa mga awit ug pag-awit ug maayo niini diha sa mga tigom sa kongregasyon.

Aron tabangan ang mga kongregasyon nga madasig sa pag-awit diha sa mga tigom, ang Sosyedad nagtagana ug narekord nga mga panduyog. Kon kini ipatokar, ang usa nga nagdumala sa sistema sa paningog angayng alisto sa gikusgon. Kon dili kaayo kusog ang musika, ang kongregasyon tingalig maulaw sa pag-awit. Samtang ang igsoon nga nagkontrolar sa sistema sa paningog moduyog sa pag-awit sa kongregasyon, siya makatino kon kaha ang musika nagapanguna o wala.

Pag-awit Kang Jehova

Ang pag-awit mohatag kanato ug higayon sa pagpahayag sa atong mga pagbati sa atong Maglalalang. (Salmo 149:1, 3) Dili lamang kini pag-ulbo sa emosyon, apan usa ka kontrolado, makataronganon, ug malipayong pagpahayag sa atong pagdayeg. Ang pag-awit nga kinasingkasing diha sa kongregasyon magbutang kanato sa hustong kahimtang sa hunahuna ug kasingkasing alang sa programa nga mosunod ug magdasig kanato sa mas dakong pagpakig-ambit sa pagsimba kang Jehova. Bisag ang pag-awit makaapektar sa emosyon, ang mga pulong magatudlo usab kanato. Busa pinaagi sa pagpahayag sa atong kaugalingon nga nagkaangay ug nagkabagay, kita sa kaaghop ug kamapainubsanon nag-andam sa atong mga kasingkasing aron kita mahimong sa pagkahiusa makakat-on ingong nagkatigom nga katawhan.​—Itandi ang Salmo 10:17.

Ang pag-awit mahimong bahin kanunay sa pagsimba kang Jehova. Busa kita may palaaboton sa pagpakig-ambit sa walay kataposan sa mga hunahuna sa salmista: “Ako magadayeg kang Jehova sa panahon sa tibuok nakong kinabuhi. Ako magaawit sa akong Diyos samtang buhi pa ako.”​—Salmo 146:2.

[Mga footnote]

[Kahon sa panid 27]

Pipila ka mga Sugyot sa Pag-awit ug Maayo

1. Ipataas ang songbok samtang nagaawit. Kini motabang sa usa nga makaginhawa nga mas natural.

2. Ginhawa ug lawom sa pagsugod sa matag prase.

3. Ang pagbuka ug diyutay pa sa baba kay sa naandan inigsugod sa kinaiyanhon magpataas sa gikusgon ug kalanog sa tingog.

4. Labaw sa tanan, ipunting ang pagtagad sa diwa sa awit nga ginaawit.