Pagdayeg Kang Jehova sa Awit
1 Palihog ablihi ang inyong songbok ngadto sa luyo sa kataposang panid. Unsay inyong makita? Usa ka koro sa Lebihanong mga mag-aawit diha sa balaang templo ni Jehova, ang ilang mga baba mibuka pag-ayo, nagaawit uban ang tumang kaikag. Ang pag-awit maoy usa ka hinungdanong bahin sa matuod nga pagsimba diha sa templo ni Jehova. Sa panahon ni Haring David, labaw sa 10 ka porsiyento niadtong nag-alagad sa templo gigahin aron pagdayeg kang Jehova uban sa musika. Ug nianang gidaghanona, 288 ang binansay nga mga mag-aawit, “mga batid tanan.” Maseguro ninyong gihatagan nilag gibug-aton ang ilang pag-awit.—1 Cron. 23:3, 4; 25:7.
2 Pag-abot sa Kristohanong kapanahonan, atong nahibaloan nga si Jesus ug ang iyang mga apostol miawit ug usa ka awit pagkatapos sa Panihapon sa Ginoo. (Mar. 14:26) Ug si apostol Pablo subsob nagasulti kanato sa pag-awit ug mga pagdayeg sa atong Diyos. Sa Colosas 3:16 siya misulat: “Tugoting ang pulong ni Kristo dagayang magapuyo kaninyo diha sa tanang kaalam. Padayon sa pagtudlo ug pagmaymay sa usag usa uban ang mga salmo, mga pagdayeg sa Diyos, espirituwal nga mga awit uban ang pagkamabination, nagaawit diha sa inyong mga kasingkasing ngadto kang Jehova.”—Tan-awa usab ang Efeso 5:19, 20.
3 Ang pag-awit ug mga alawiton sa Gingharian maoy usa sa mga paagi diin kita makadayeg kang Jehova. Busa dili ba angay nga kita magaawit uban ang tibuok natong kasingkasing? Kon buhaton nato, kita makadayeg kang Jehova. Siya nagapamati sa atong mga awit nga gitumong kaniya maingon sa iyang pagpamati sa atong mga pag-ampo. Dihang kita gayod moawit, makalipay usab kita sa uban, ug kita mismo mabenepisyohan.
4 Hunahunaa ang matahom nga mga pulong sa atong mga awit. Kini makabulig gayod ngadto sa atong “pagtudlo ug pagmaymay sa usag usa.” Pagkamaayong tambag ang anaa sa atong mga awit! Pinaagig ugdang nga pagdawat sa maong tambag, kita matabangan sa pag-ugmad sa bunga sa espiritu, aron modagaya niini ug makapanalipod batok sa pagyuhot sa unodnon, kalibotanong mga impluwensiya. ‘Ang pag-awit diha sa atong mga kasingkasing’ magadasig kanato sa pag-alagad kang Jehova nga maisogon ug masadyaon.
5 Aron mahimo ang maayong pagsugod sa pag-awit diha sa mga tigom, ang tsirman mopahibalo dili lamang sa numero sa awit apan sa tema usab, o ulohan. Usahay mahimong iyang matikdan ang Kasulatanhong pasukaranan sa awit ug mokomentog mubo kon sa unsang paagi kini mohaom sa impormasyon nga ipresentar.
6 Ang Kingdom Melodies ug usab ang mga ‘cassettes’ sa atong mga awit maoy maayong mga instrumento sa pagtabang sa atong mga pamilya nga labing masinati sa mga awit. Ang pagpatokar niini ingon nga duyog nga musika maoy labing makawiwili nga paagi alang kanato nga dugang masinati sa atong mga awit.
7 Ang Kasulatan subsob nga nagapaalinggat kanato sa atong obligasyon sa pagdayeg sa atong mahigugmaong langitnong Amahan uban sa awit. Buhaton nato kini nga tibuok-kalag. Sa ingon kita makahatag ug kinasingkasing nga pamatuod ngadto sa dumuluong nga mosulod sa atong taliwala. Oo, mag-awit kita ug maghimog honi ngadto kang Jehova, ingon sa gibuhat ni David kanhi.—Sal. 108:1-3.