Ang Pangandoy ni Joshua

NIADTONG Marso 6, 1992, nahibaloan sa pamilyang Wood nga ang ilang kinamanghoran, ang siyete-anyos nga si Joshua, adunay grabeng matang sa leukemia, usa ka makamatay nga sakit. Ang magulang lalaki ni Joshua, edad 16, ug ang iyang igsoong babaye, edad 19, maoy bug-os panahong mga ministro (mga payunir) sa mga Saksi ni Jehova, sama sa iyang amahan. Ang usa pa ka igsoong lalaki ni Joshua diyes ang edad.

Aron matambalan ang sakit ni Joshua, gisugdan dayon ang maisog nga pagtambal pinaagig chemotherapy. Ang usa sa epekto mao ang pagkawala sa gana sa pagkaon, busa lisod kanunay nga pakaonon si Joshua. Sa Hulyo ang tibuok pamilya mihukom sa pagtambong sa distritong kombensiyon sa mga Saksi ni Jehova sa Lafayette, Louisiana, T.B.A., nga dili layo sa ilang balay sa Winnfield. Samtang didto siya, migrabe ang sakit ni Joshua, ug sa Sabado sa buntag siya gidala sa lawak nga emerhensiya sa ospital. Human sa kombensiyon gidala siya sa iyang mga ginikanan ngadto sa ospital sa New Orleans, diin didto regular siya nga nagadawat ug tambal.

Samtang ang pamilya didto sa New Orleans, gisultihan sa usa ka tig-alagad sa katilingban ang inahan ni Joshua, si April, bahin sa usa ka programa nga nagatuman sa mga pangandoy sa mga bata nga grabe ug sakit. Gibinlan si April ug usa ka aplikasyon alang sa programa, ug gisulatan niya kini ug sa iyang bana, si Paul. Sa dihang gibalik si Joshua sa New Orleans sa kataposan sa Agosto alang sa iyang regular binulan nga paghiling, si Jim, ang tawo nga maoy naghawas sa programa, miduaw sa pagpakigsulti kang Joshua bahin sa iyang pangandoy.

“Gusto kong moadto sa New York,” miingon si Joshua.

Sanglit ang kabataan kasagaran gusto mang moadto sa usa ka parke sa kalingawan, si Jim nahibulong kon nganong gustong moadto sa New York si Joshua. “Gusto kong makita ang Watchtower Society,” matud pa ni Joshua.

“Unsa man kana?” si Jim nangutana.

“Abi nimo, mao kana ang dapit nga ilang ginahimo ang mga magasin, Bibliya, mga libro, ug mga tract.”

Dugang gisaysay ni April kang Jim ang bahin sa hedkuwarter sa mga Saksi ni Jehova ug ang buluhaton sa pagpatik nga ginahimo didto. “Ang akong igsoon nagduaw karon didto,” miingon si Joshua, “ug gusto kong moadto uban sa tanan nakong pamilya.”

Human nahibalo nga unom ang sakop sa pamilya, nangutana si Jim kang Joshua kon dili ba siya gustong moadto hinuon sa Disney World sa Florida. Sa New York gayod gustong moadto si Joshua. Si Jim miingon nga dili siya makaseguro kon ihatag ang maong hangyo apan iyang susihon kini. Gipangutana ni Jim si Joshua sa iyang ikaduhang gusto.

“Usa ka IBM nga kompiyuter,” mitubag si Joshua.

“Nganong IBM man?” gustong masayod si Jim.

“Si Joshua miingon nga aron makabaton siya ug Bibliya diha sa diskette gikan sa Watch Tower Society. (Si Joshua nahibalo nga ang diskette sa Bibliya mosibo sa mga kompiyuter sa IBM.) Unya nangutana pag-usab si Jim: “Segurado ka ba nga dili ka gustong moadto sa Disney World?”

“Segurado ako,” miingon si Joshua.

Sa milabay ang pipila ka adlaw, mibalik si Jim sa pagsulti kang Joshua nga ang iyang pangandoy sa pag-adto sa New York uban sa iyang pamilya matuman. “Si Josh maoy usa ka matang sa bata nga kalmado sa mga butang nga kahinaman sa kadaghanang tawo,” miingon ang iyang inahan, “apan ako naghinamhinam na kaayo!”

Sa Septiyembre 30 ang pamilyang Wood milupad gikan sa New Orleans ngadto sa Siyudad sa New York. Wala pay usa kanila ang nakaduaw sa mga pasilidad sa Watchtower gawas kang Buddy, ang kinamagulangan, nga nakaduaw didto sa pipila lamang ka semanang miagi. Silang unom gipasaka sa Ramada Inn nga otel sa Manhattan, New York, ug giserbisyohan ug sakyanang limousine sa pag-adto sa shipping, patikanan, opisina, ug puy-anan nga mga tinukod sa mga Saksi sa tabok sa East River sa Brooklyn.

Sa ilang pag-estar ug duha ka adlaw didto, ang pamilya gilibot sa usa ka giya sa mga pasilidad sa hedkuwarter. Usa ka adlaw nga ilang gilibot ang mga tinukod nga mga opisina ug lima-ka-tinukod nga pabrika. Sa pagkasunod adlaw, ilang giduaw ang 90,000 metro kuwadradong tinukod nga maoy nahimutangan sa shipping, kopyahanan sa teyp, ug ubang mga trabaho, ug gilibot ang duolan sa 21 ka tinukod nga puy-anan nga nagapasakag kapin sa tulo ka libong mga boluntaryo. Sa panahon sa pag-estar sa pamilya, dihay gihimong espesyal nga kahikayan aron sila makakaon uban sa mga trabahante sa hedkuwarter, nangaon sa usa sa napulo ka komedor.

Sa Oktubre 3 ang pamilya miabang ug sakyanan ug miadto duolag 160 ka kilometros sa amihanan sa pagduaw sa Watchtower Farms. Ilang gilibot ang dakong tinukod nga patikanan didto ug nakakita sa kadaghanan sa pagkaon alang sa mga trabahante sa hedkuwarter nga didto gitanom. Sa hapon, giduaw sa pamilya ang gikamulo pag tukod nga Watchtower Educational Center, nga nahimutang duol sa Patterson, New York, mga usa ka oras nga pagmaneho gikan sa Watchtower Farms, ug unya mibalik sa New York sa pagkagabii.

Sa pagkasunod adlaw gihatod sila sa limousine sa Kennedy Airport sa New York alang sa ilang pagbiyahe ug balik ngadto sa New Orleans. Ang pangandoy ni Joshua nga makita ang “dapit nga maoy ilang gam-anan sa mga magasin, mga Bibliya, libro, ug mga tract” natuman. Ang pamilyang Wood mapasalamaton kaayo sa kahikayan sa pagtuman sa pangandoy sa batang may grabe ug mga sakit alang sa ilang libre, makapadasig sa espirituwal nga biyahe.

Sa milabay ang pipila ka semana, sa tunga-tunga sa Nobyembre, samtang didto sa ospital sa New Orleans alang sa iyang binulang pagpatambal, gidapit si Joshua ingong bisita sa popular nga lumadnon-ug-kowboy nga mag-aawit nga si Garth Brooks diha sa usa sa iyang mga pasundayag sa Monroe, Louisiana. Human niadto, sa dihang gidapit si Joshua ug ang iyang amahan sa likod sa entablado ni Gn. Brooks, gihatagan siya ni Joshua ug usa ka libro nga tabang sa pagtuon sa Bibliya nga You Can Live Forever in Paradise on Earth. Sa dihang gipangomosta ni Joshua si Gn. Brooks mahitungod sa iyang anak (siya adunay anak nga babaye), dayag kaayo nga natandog siya sa kaikag ni Joshua.

Siyempre makalipay kaayo kon ang usa ka bata mabalak-on sa intereses sa uban, ilabina kon ang iyang mga kagustohan nagapabanaag ug kaikag sa espirituwal nga mga butang! Kon hatagan ka ug higayon nga tumanon ang pangandoy, pilion mo ba kanang makahatag ug kaayohan kanimo ug sa uban sa espirituwal nga paagi?

[Mga hulagway sa panid 16, 17]

Dapit nga naduaw ni Joshua ug sa iyang pamilya

Tuo: Watchtower Educational Center

Ubos: Mga tinukod alang sa mga opisina sa Watchtower

Wala: Tinukod sa 360 Furman, nga nahimutangan sa Departamento sa Shipping

Ubos: Pabrika

Wala: Watchtower Farms ug patikanan