Pagpabili sa Diyosnong mga Ginikanan

Ang mga ginikanan nga naningkamot sa pagmatuto sa ilang mga anak aron mahimong responsable ug mahinadlokon sa Diyos nga mga hamtong malipay sa dihang ang ilang mga paningkamot nagmalamposon. Malipay usab sila sa dihang ang ilang mga anak magpahayag ug pagpabili sa maong maayong pagmatuto.

Ang mosunod maoy sulat nga gipadala sa usa ka anak nga lalaki ug sa iyang asawa ngadto sa iyang mga ginikanan human sa ilang kasal:

“Minahal nga Papa ug Mama:

“O, asa kami mosugod? Sugdan namo pinaagi sa pag-ingon nga gipabilhan kaayo namo ang inyong gugma, pagpaluyo, ug pagkamanggihatagon sa adlaw sa among kasal. Kadto tinuod gayong linain nga adlaw, ug bililhon ang inyong presensiya. Dugang pa, daw dili pa kadto igo, kamo mitabang kanamo sa paghimo sa among hanimon nga malipayon. Ang tanan sa ibabaw maoy dugang pamatuod kon unsa ka talagsaon, mahigugmaon, makataronganon, ug mahigugmaon sa kalipay nga mga ginikanan kamo ug sa kanunay ingon kamo niana!

“Nakapangutana ba kamo nganong nakapabilin ako sa matarong ug sigpit nga dalan? Tungod kay, gawas sa akong gugma kang Jehova nga Diyos, kanunay akong adunay dakong pagtahod kaninyong duha. Kining maong pagtahod kusganon kaayo nga dinuyogan sa inyong disiplina, nakapahimo kini kanako nga mamalandong una sa dihang mohimo sa mga butang ug sa dihang mohimog mga desisyon. Ang kalamposan sa akong kinabuhi sa paghimo sa kabubut-on sa Diyos sa kinadak-ang bahin maoy tungod sa inyong mapinadayonong gugma ug pagdisiplina kanako ug sa inyong walay-kataposang debosyon kang Jehova ug sa iyang organisasyon.

“Kon akong hinumdoman ang tanang halandumong mga panghitabo mahitungod kaninyo sa dihang bata pa ako ug kon tiponon kini sila, sila moingon nga bisan dili nako mahinumdoman ang tanang inyong gisulti, ako nahinumdom gayod sa inyong talagsaong kagawian, ilabina ang inyong gugma sa uban ug kang Jehova.

“Kamo gimahal kaayo namo.

“Ang inyong anak ug umagad nga babaye,

“L. ug W.”