AIDS ug mga Tawong Ilado

KADTONG mobasa sa mga listahan sa mga patay sagad makurat sa gidaghanon sa mga tawong ilado nga namatay tungod sa AIDS. Ang Newsweek sa Enero 18, 1993, miangkon nga daghan niining mga tawhana ang himalatyon, sa pag-ingon: “Sa matag sanga sa kultura​—sayaw, teatro, literatura, musika, desinyo, moda, arte, telebisyon, lilas​—nagapadayon ang kalaglagan tungod sa AIDS.”

Ang Newsweek miingon usab: “Ang Paris kaamgid gayod sa New York o sa Los Angeles: usa ka pagtuon nagpakita nga kapin sa 60 porsiento sa kamatayon sa mga lalaki sa Paris tali sa 25 ug 44 diha sa propesyong pagsulat, arte ug kalingawan gipahinabo sa AIDS.”

Ang magasing People sa Enero 23, 1993, sa artikulo niining “Kahadlok sa Yelo” nag-asoy bahin sa kalaglagan nga gipahinabo sa AIDS sa propesyonal nga ice skating. Kini nag-ingon: “Ang ilang isport gigun-ob sa kapin sa 40 ka kamatayon, ang iladong mga skater sa Amerika del Norte naguol tungod sa kamatayon sa ilang mga higala ug sa mabangis nga kabayaran sa AIDS.”

Si John Curry, Britanikong nakadawat ug bulawang medalya sa Olympic, gipaila sa magasin ingon nga mao “ang labing inilang skater nga may AIDS.” Siya gikutlo nga nag-ingon: “Ang tanan nakong mga higala namatay tungod sa AIDS.” Nganong daghan kaayong mga skater ang natakdan sa AIDS?

Ang ilang estilo-sa-kinabuhi mao ang hinungdan. Ang People mibutyag niini dihang kini nag-ingon: “Samtang ang mga skater, mga coach ug opisyales sa pribado nagbangotan sa kamatayon sa ilang mga higala, sila nagpabiling naglibog ug matahapon sa pagpakiglabot sa publiko labot sa AIDS ug sa isyu sa homoseksuwalidad diha sa skating.”

Sa pagkatinuod, ang mapatuyangong pakigsekso​—homoseksuwal ug heteroseksuwal​—mao ang pangunang hinungdan sa AIDS. Niadtong Disyembre 1991, duha ka doktor sa Canada mibutyag nga usa ka babaye nga namatay tungod sa AIDS naghingalan ug 70 ka magdudula sa National Hockey League nga nakapakigsekso kaniya. “Ang panghitabo nakapahinabog dulot nga kabalaka sa pila ka pundok sa N.H.L.,” mitaho ang The New York Times sa Disyembre 5, 1991. “Kini nabanaag diha sa masulob-ong mga grupo sa mga magdudula ug mga coach nga nagtigom aron hisgotan ang isyu sa panahon sa mga pagbansay karon.”

Unsay angay nga himoon? “Ang mensahe nga angay natong ipahibalo sa kabataan dili mao ang luwas nga pagpakigsekso o paggamit ug kondom, kondili pugngi ang pakigsekso,” matud sa usa ka magdudula sa Montreal Canadiens. “Ayaw pakigsekso hangtod maminyo ka.” Dili kana bag-o nga tambag, kay ang Bibliya nag-awhag: “Likayi ang pakighilawas.”​—1 Corinto 6:18.

[Picture Credit Line sa panid 31]

Focus On Sports