“Ang Pagpanabako Makaluod”

Niining ulahing katuigan ang California Department of Health Services mihimog kusganong edukasyonal nga kampanya batok sa pagpanabako. Ang mensahe mubo ug direkta ug makita diha sa mga karatola latas sa estado. Unsa ang pipila sa mga mensahe? “Giyanon ang mga hinabako. Mga pusher ang mga kompaniya sa tabako. Ang pagpanabako makaluod.” “Ang gipabulhot nga aso mopatay sa 50,000 ka wala manabako niining tuiga. Ang pagpanabako makaluod.” Laing karatola nagaingon, ubos sa simbolo sa kaha sa sigarilyo, “Palit karon, Bayri unya.” Bayran sa imong kinabuhi, siyempre. Usa ka karatola nga Kinatsila nag-ingon: “Me muero por fumar.” Dula kini sa mga pulong nga mahimong basahon, “Mamatay ko ug di katabako” o, “Himalatyon ako tungod sa pagpanabako.” Ang letrato sa ulo nga katunga sa nawong kalabera nagpatin-aw sa ideya.

Ang laing paagi nga gigamit sa pila ka nasod aron danihon ang mga tawo nga molikay sa pagpanabako ug sa nikotina mao ang brand sa sigarilyo nga gitawag “Death.” Ang itom nga kaha dunay simbolo sa bagolbagol ug nag-ekis nga mga bukog ug usa ka mensahe nga nagaingon: “Ang mga sigarilyo makagiyan ug makadaot. Kon wala ka manabako, ayawg sugdi. Kon nanabako ka, undangi.”

Kon duna bay epekto ang ubang mga paagi sa paggamit ug makapakurat nga mga mensahe sa mga karatola niadtong nanabako na lisod nga masayran. Hinuon, latas sa ulahing unom ka tuig, “ang gigamit nga tabako sa California mihagsa ug 27 porsiento, mga tulo ka pilo sa nasodnong aberids.” (The Washington Post National Weekly Edition) Ang kampanya sa paskin malagmit nga makapahilayo bisan sa umaabot nga mga tigtabako gikan niining peligrosong bisyo. Sa walay duhaduha kadtong nagaangkong mga Kristohanon kinahanglang molikay niining mahugaw, hinakog nga bisyo. Si apostol Pablo nagsulat: “Sanglit aduna man kita niini nga mga saad, mga hinigugma, hinloan nato ang atong kaugalingon sa tanang kahugawan sa unod ug espiritu, nga magahingpit sa kabalaan diha sa kahadlok sa Diyos.”​—2 Corinto 7:1.