Giila sa Pari ang Maayong Panggawi sa mga Saksi

Sinulat sa koresponsal sa Pagmata! sa Australia

NIADTONG 1991 ang Kingdom Hall sa mga Saksi ni Jehova sa Condobolin sa New South Wales, Australia, naugdaw sa kalayo. Pipila ka semana sa ulahi, ang lokal nga Anglikanong pari sa iyang sulat sa parokya mipahayag ug simpatiya “tungod sa pagkawala sa dapit sa pagsimba.” Ang iyang sulat nagkanayon:

“Bisan pa sa kamatuoran nga dunay dayag nga mga kalainan tali sa atong mga tulumanon ug sa ilaha, ako sa daghang katuigan nakadayeg gayod niadtong mga bahin sa tulumanon sa ilang pagtuo nga gituohan nako nga maayo sa ilang kaugalingon.” Unsay pipila niining positibong mga bahin?

Una: “Sila mabalak-on kaayo mahitungod sa pagtulon-an sa ilang relihiyon. Motigom sila ug duha o tulo ka higayon matag semana alang niining maong katuyoan.” Kini maoy tinuod​—ang mga Saksi ni Jehova maoy himasa, tigtudlo, ug tigwali nga relihiyon. Duna silay tulo ka tigom matag semana.

Ang ikaduhang punto sa pari mao: “Sila . . . sa regular mohimog mga pagduaw aron magwali sa ebanghelyo ngadto sa kabalayan sa mga tawo. . . . Buot nilang masayran nato nga ang ikatulong kinadak-ang denominasyon sa Australia maoy kapunongan sa mga tawong nagasulti nga Walay Relihiyon (3,841,000 ka tawo). Ang mga JW dili makontento nga huptan sa ilang kaugalingon ang ilang pagtuo kondili buot nila kining ipaambit ngadto sa ubang tawo.” Nasayod ang mga Saksi ni Jehova nga kinahanglang mosanong sila sa Mateo 24:14 ug Marcos 13:10 pinaagi sa pagwali sa maayong balita.

Ang ikatulong punto: “Wala sila magpatunghag salapi gikan sa komunidad pinaagi sa Pagtinda sa Daplin sa Dalan ug paggamit sa ubang mga paagi sa pagpatunghag-pundo. Ang ilang panalapi nagagikan sa sulod sa [ilang] komunidad.” Ang Bibliya nagaingon, ‘nakadawat kamo nga walay bayad, pagpanghatag nga walay bayad’ ug, ‘dunay labaw nga kalipay sa paghatag kay sa pagdawat.’ Mao nga, wala sila mangolekta. Dunay mga kahon alang sa amot diha sa daplin sa ilang mga tigomanan.​—Mateo 10:8; Buhat 20:35.

Unsay kataposang dalayegong bahin nga iyang gihisgotan? “Ilang gitukod ang ilang mga dapit sa pagsimba sa mubong panahon ug gamayng salapi. . . . Hayan gusto ninyong moduaw sa Gum Bend Lake Road . . . ug motan-aw sa lokal nga mga JW . . . nga nagtrabaho sa konstruksiyon sa usa ka bag-ong Kingdom Hall. Ilang gibanabana nga dangtan ug tulo ka adlaw ang ilang pagtiwas sa trabaho.” Dayon unsay iyang gitambag sa iyang panon?

“Ginasugyot nako nga basahon ninyog balik ang upat ka puntos nga akong gihisgotan sa ibabaw ug mangutana kon sa unsang paagi kini makatabang kaninyo sa pagpamalandong bahin sa dayag nga pagtuman sa inyong pagtuo. . . . Buot kong isugyot nga may kalabotan sa upat ka mga puntos nga gihisgotan, gipakita sa mga JW nga ang aberids nga Anglikano ug ubang Kristohanong mga parokya patay sa espirituwal.”

Kon buot nimong moduaw sa usa ka Kingdom Hall ug motan-aw sa personal kon sa unsang paagi nagasimba ang mga Saksi ni Jehova ug kon unsay ilang gituohan, ayawg panuko sa pag-adto sa Kingdom Hall nga labing duol kanimo, o pagsulat kanamo alang sa adres sa tigomanan nga labing duol kanimo.

[Hulagway sa panid 31]

Kingdom Hall sa Condobolin, New South Wales