Mga Kahikayan Alang sa mga Dapit sa Pagsimba

ANG matuod nga mga magsisimba ni Jehova gisugo nga magtigom aron makadawat ug instruksiyon ug magdinasigay sa usag usa. (Heb. 10:23-25) Ang unang dapit sa pagsimba alang sa piniling katawhan sa Diyos, ang mga Israelinhon, mao ang “tabernakulo, ang tolda nga tagboanan.” (Ex. 39:32, 40) Sa ulahi, ang anak ni David nga si Solomon nagtukod ug balay, o templo, para sa kahimayaan sa Diyos. (1 Hari 9:3) Human malaglag ang maong templo sa 607 B.C.E., ang mga Hudiyo naghimog panagkatigom diha sa mga tinukod nga gitawag ug sinagoga aron simbahon ang Diyos. Sa ulahi, gitukod pag-usab ang templo ug nahimo na sab nga sentro sa matuod nga pagsimba. Si Jesus nanudlo sa mga sinagoga ug sa templo. (Luc. 4:16; Juan 18:20) Naghimo pa gani ug panagkatigom si Jesus didto sa bukid.​—Mat. 5:1–7:29.

² Human mamatay si Jesus, ang mga Kristohanon sa unang siglo nagtigom diha sa publikong mga dapit ug sa pribadong mga balay aron itudlo ang Kasulatan ug makig-uban sa mga isigkamagtutuo. (Buh. 19:8, 9; Roma 16:3, 5; Col. 4:15; Filem. 2) Usahay, kinahanglan silang magtigom sa tago nga mga dapit aron dili mamatikdan sa mga maglulutos. Dayag nga ang matinumanong mga alagad sa Diyos kanhi naningkamot gayod sa pag-adto sa mga dapit sa pagsimba aron ‘matudloan ni Jehova.’​—Isa. 54:13.

³ Karon sab, ang publikong mga dapit ug pribadong mga balay gigamit para sa Kristohanong mga tigom. Ang pribadong mga balay sagad maoy gigamit ingong tagboanan alang sa pagsangyaw. Alang niadtong nagpagamit sa ilang balay para sa maong katuyoan, usa gayod kini ka pribilehiyo ug gibati nila nga sila nakabenepisyo sa espirituwal.

KINGDOM HALL

⁴ Ang pangunang tigomanan sa mga Saksi ni Jehova mao ang Kingdom Hall. Kasagaran, dunay paliton nga propidad, ug tukoran kinig bag-ong Kingdom Hall o i-renovate lang ang daang bilding. Aron makadaginot sa galastohan ug mapuslan pag-ayo ang mga pasilidad, ubay-ubayng kongregasyon ang puwedeng mogamit sa usa ra ka Kingdom Hall kon praktikal. Sa ubang lugar, kinahanglang moabang ug pasilidad aron katigoman. Alang sa bag-ong mga Kingdom Hall ug niadtong dako ang gihimong renovation, haom lang nga dunay himoong dedikasyon. Pero kon gamay ra ang gihimong renovation, dili na kinahanglan ang dedikasyon.

⁵ Ang Kingdom Hall kinahanglang dili himoong sobra ka nindot aron mapabilib ang uban. Bisag ang disenyo sa Kingdom Hall magkalahi sa matag lugar, ang katuyoan sa pagtukod niini parehas ra. (Buh. 17:24) Depende sa kahimtang sa matag lugar, kini kinahanglang komportable ug kombenyente alang sa Kristohanong panagkatigom.

⁶ Ang tanang kongregasyon sa mga Saksi ni Jehova naghatag ug donasyon para sa paggamit ug pagmentinar sa Kingdom Hall diin sila naasayn. Walay himoong pagpangolekta o pag-solicit ug kuwarta alang sa pondo. Dunay kahon sa kontribusyon alang sa mga nanambong nga gustong mohatag ug donasyon para sa importanteng mga galastohan sa paggamit sa tigomanan. Ang ilang pag-amot maoy kinabubut-on ug kinasingkasing.​—2 Cor. 9:7.

⁷ Giisip sa tanang magmamantala nga pribilehiyo ang pagsuportar sa Kingdom Hall sa pinansiyal nga paagi ug ang pagboluntaryo aron kanunay kining hinlo ug maayong pagkamentinar. Usa ka ansiyano o ministeryal nga alagad ang kasagarang iasayn sa paghimog eskedyul para niini nga buluhaton. Sagad, ang pagpanghinlo ginahimo sa mga grupo sa pagsangyaw, diin ang tigdumala sa grupo o iyang asistant maoy manguna. Ang sulod ug gawas sa Kingdom Hall kinahanglang magrepresentar kang Jehova ug sa iyang organisasyon.

⁸ Kon kapin sa usa ka kongregasyon ang naggamit sa tigomanan, ang mga ansiyano sa maong mga kongregasyon magpormag Kingdom Hall Operating Committee, nga maoy moasikaso sa mga butang maylabot sa bilding ug propidad. Ang mga ansiyano sa mga kongregasyong naggamit sa maong Kingdom Hall mao ang mopilig brader nga mahimong koordinetor sa operating committee. Ubos sa pagdumala sa mga ansiyano sa nalangkit nga mga kongregasyon, imonitor sa operating committee ang pagpanghinlo sa tigomanan, nga seguroon nga kini maayong pagkamentinar ug dunay igong suplay nga magamit. Kini nagkinahanglag kooperasyon sa tanang kongregasyon nga nalangkit.

⁹ Kon daghang kongregasyon ang mogamit sa usa ka Kingdom Hall, puwede silang magbayloay ug eskedyul sa tigom. Hisgotan sa mga ansiyano ang eskedyul uban ang pagkamahunahunaon ug inigsoong gugma. (Filip. 2:2-4; 1 Ped. 3:8) Walay usa ka kongregasyon ang angayng modesisyon para sa ubang kongregasyon. Inigduaw sa tigdumala sa sirkito sa usa sa mga kongregasyong naggamit sa Kingdom Hall, i-adjust sa ubang kongregasyon ang oras sa ilang tigom nianang semanaha kon gikinahanglan.

¹⁰ Ang Kingdom Hall mahimong gamiton para sa kasal ug diskurso bahin sa patay ubos sa pagtugot sa Komite sa Pag-alagad sa Kongregasyon. Timbangtimbangon pag-ayo sa maong komite ang matag hangyo ug ibase ang ilang desisyon sa direksiyon nga gitagana sa sangang buhatan.

¹¹ Kadtong tugotan sa paggamit sa Kingdom Hall alang niini nga mga katuyoan gidahom nga mogawi sa paaging haom sa tinuod nga Kristohanon. Kinahanglang walay himoon diha sa Kingdom Hall nga makapandol sa mga igsoon o makapasipala kang Jehova ug sa reputasyon sa kongregasyon. (Filip. 2:14, 15) Ubos sa direksiyon sa sangang buhatan, ang Kingdom Hall puwedeng gamiton alang sa ubang espirituwal nga kalihokan, sama sa Kingdom Ministry School ug Pioneer Service School.

¹² Ang kongregasyon angayng magpakita kanunay ug pagtahod sa tigomanan. Kinahanglang makita sa atong sininaan, pamostura, ug panggawi ang dignidad nga angay sa pagsimba kang Jehova. (Eccl. 5:1; 1 Tim. 2:9, 10) Pinaagi sa pagpadapat sa tambag bahin niini, atong gipakita ang atong pagpabili sa Kristohanong mga tigom.

¹³ Ang pagmentinar sa kahapsay panahon sa mga tigom importante. Mas maayo nga itapad sa mga ginikanan ang ilang mga anak. Kadtong dunay gagmayng anak puwedeng dasigon nga molingkod sa puwesto nga dili kaayo sila makadisturbo sa uban kon kinahanglan nilang dalhon sa gawas ang ilang anak aron disiplinahon o atimanon ang ubang panginahanglan sa bata.

¹⁴ Ang kuwalipikadong mga brader iasayn ingong mga atendant panahon sa mga tigom sa Kingdom Hall. Sila angayng alisto, mahigalaon, ug maayog panghukom. Lakip sa ilang mga responsibilidad mao ang pagtimbaya ug pag-abiabi sa mga bisita, pagtabang sa mga naulahi nga makakitag kalingkoran, pagrekord kon pilay nanambong, ug pagseguro nga sakto ra ang temperatura ug bentilasyon sa tigomanan. Kon gikinahanglan, ang mga atendant magpahinumdom sa mga ginikanan nga bantayan ang ilang mga anak aron dili magdagandagan sa dili pa ug human sa tigom o magdula sa plataporma. Sa malumo ug mataktikanhong paagi, hangyoon sa atendant ang ginikanan nga igawas ang bata dihang kini magpabadlong pag-ayo aron dili makadisturbo sa uban. Dakog ikatabang ang mga atendant aron ang tanan makapahimulos sa mga tigom. Mas maayo kon mga ansiyano ug ministeryal nga mga alagad ang gamiton ingong atendant.

PAGTUKOD UG KINGDOM HALL

¹⁵ Sa unang siglo, ang ubang Kristohanon dato ug ang uban dili, busa si apostol Pablo misulat: “Pinaagi sa pag-angay-angay, ang inyong sobra sa pagkakaron mohulip sa ilang panginahanglan, aron nga ang ilang sobra makahulip sab sa inyong kakulangan, ug busa dunay pag-angay-angay.” (2 Cor. 8:14) Karon, gipadapat sab nato ang prinsipyo sa “pag-angay-angay.” Ang mga kontribusyon gikan sa mga kongregasyon sa tibuok kalibotan giusa aron masuportahan ang pagpanukod ug pag-renovate sa mga Kingdom Hall. Ang pagkamahinatagon sa mga igsoon sa tibuok kalibotan gipabilhan pag-ayo sa organisasyon ug sa mga kongregasyong nakabenepisyo niana.

¹⁶ Ang sangang buhatan maoy mag-asayn kon asa nga Kingdom Hall pinakamaayong magtigom ang mga kongregasyon. Ang sangang buhatan sab ang magtino kon kanus-a ug asa tukoron ang bag-ong mga Kingdom Hall ug i-renovate ang mga tigomanan sa teritoryong sakop niini. Dihang may mga katalagman, dunay himoong kahikayan para sa pag-ayo sa naguba nga mga Kingdom Hall ug, usahay, sa naguba nga balay sa mga igsoon.

¹⁷ Ang sangang buhatan maoy mag-organisar sa mga boluntaryo aron motabang sa pagpalit ug propidad, pagdisenyo sa mga Kingdom Hall, pagkuhag mga building permit, pagpanukod, ug pagmentinar. Kay daghang Kingdom Hall ang kinahanglang tukoron diha sa kadaghanang nasod, gikinahanglan ang daghang boluntaryo. Ang tanang bawtismadong magmamantala nga kuwalipikado ug gustong moboluntaryo gidasig sa pagpil-ap ug aplikasyon ug ihatag kana sa ilang Komite sa Pag-alagad sa Kongregasyon. Bisan kadtong dili bawtismadong magmamantala puwedeng makaboluntaryo sa pagtukod o pag-renovate sa ilang Kingdom Hall.

MGA ASSEMBLY HALL

¹⁸ Ang mga Kristohanon sa unang siglo kasagarang magtigom diha sa ginagmayng grupo. Apan may panahon nga magtigom ang “dakodakong panon sa katawhan.” (Buh. 11:26) Sa susama, ang katawhan ni Jehova karon dunay dagkong panagkatigom sama sa sirkitong asembliya ug rehiyonal nga kombensiyon. Sagad mag-abang ug mga pasilidad alang niini nga katuyoan, pero kon walay maabangan o kombenyente nga pasilidad, puwedeng magpalit o magtukod ug tigomanan nga gitawag ug Assembly Hall.

¹⁹ Usahay, dunay bilding nga paliton, i-renovate, ug gamitong Assembly Hall. Pero sagad, mopalit ug propidad ug tukoran kinig bag-ong tigomanan. Lainlaig gidak-on ang mga Assembly Hall, depende sa lokal nga panginahanglan. Ang sangang buhatan magdesisyon kon mopalit ba o magtukod ug bilding human nga masusi pag-ayo kon pilay magasto ug kon kapila kini magamit.

²⁰ Ang sangang buhatan magtudlog mga brader nga maoy mag-atiman sa paggamit ug pagmentinar sa Assembly Hall. Dunay mga kahikayan aron ang mga sirkito dunay eskedyul sa regular nga pagpanghinlo, sa pagpanghinlo matag unom ka bulan, ug sa pagpang-ayo aron kini mamentinar. Naa gyoy kaayohan ang pagboluntaryo sa mga brader sa paghimo niini. Busa gidasig ang mga kongregasyon nga kinasingkasing nga mosuportar niini nga mga kahikayan.​—Sal. 110:3; Mal. 1:10.

²¹ Usahay, puwede sab gamiton ang Assembly Hall alang sa ubang teokratikanhong kalihokan, sama sa mga Bible school ug espesyal nga mga miting para sa mga tigdumala sa sirkito. Sama sa Kingdom Hall, ang Assembly Hall gidedikar usab ingong dapit sa pagsimba. Dihang magtigom ta sa Assembly Hall, kinahanglang dunay dignidad ang atong panggawi, sininaan, ug pamostura, sama ra dihang magtigom ta sa Kingdom Hall.

²² Daghan kaayong bag-ohan ang nahimong bahin sa organisasyon sa Diyos niining kaulahiang bahin sa kataposang mga adlaw. Ebidensiya kini sa panalangin ni Jehova. (Isa. 60:8, 10, 11, 22) Busa gusto natong suportahan ang mga kahikayan sa pagbaton ug pagmentinar ug hinlo ug komportableng mga dapit sa pagsimba. Sa paghimo niana, atong gipakita ang atong apresasyon sa papel sa maong mga pasilidad sa pagtabang kanato nga magdinasigay sa usag usa, ilabina gyod samtang nakita nato nga ang adlaw ni Jehova nagkaduol na.