Gitahod ba Ninyo ang Inyong Dapit sa Pagsimba?
“Sukad pa gayod sa pagsugod sa ebanghelyo, ang mga Kristohanon kanunay aduna gayoy ilang permanente ug tino nga dapit alang sa pagsimba sa Diyos.”—“Primitive Christianity,” ni William Cave.
ANG katawhan sa Diyos nalipay kanunay sa pakigtigom alang sa pagsimba. Matuod kini sa unang siglo sama karong adlawa. Ang unang mga awtor ug mga teologo, sama kang Lucian Clement, Justin Martyr, ug Tertullian, tanan miuyon nga ang mga Kristohanon may espesipikong mga dapit diin sila nagtigom sa pagsimba sa regular nga paagi.
Ang Bibliya nagpalig-on sa samang punto, naghisgot ug daghang reperensiya sa regular nga mga tigom nga gihimo pinaagi sa mga pundok sa mga Kristohanon. Kining mga grupoha nailhan nga mga kongregasyon. Kini tukma tungod kay ang pulong “kongregasyon” sa orihinal nga mga pinulongan sa Bibliya nagpasabot ug usa ka pundok sa mga tawo nga nagkatigom alang sa usa ka partikular nga katuyoan o kalihokan.
Unang mga Dapit sa Kristohanong Pagsimba
Unsay gibuhat sa unang-siglong mga Kristohanon sa dihang sila nagtigom? Daghan ang gihubit sa Bibliya bahin niining mga tigoma ug gipakita nga ang pagtudlo maoy usa ka hinungdanong bahin. (Buhat 2:42; 11:26; 1 Corinto 14:19, 26) Gihikay ang edukasyonal nga mga programa, nga may mga pakigpulong, ang pag-asoy ug makapalig-ong mga kasinatian, ug ang mainampingong pagtagad sa mga sulat nga nadawat gikan sa nagamandong lawas sa Jerusalem o gikan sa usa ka apostol.
Diha sa Buhat 15:22-35, atong mabasa nga human gibasa ang usa nianang mga sulata diha sa usa ka grupo sa mga Kristohanon sa Antioquia, si Judas ug Silas “nagdasig sa mga igsoon uban sa daghang pakigpulong ug gilig-on sila.” Ang laing asoy nag-ingon nga sa dihang si Pablo ug Bernabe miabot sa Antioquia “ug natigom nila ang kongregasyon, ilang giasoy ang daghang butang nga gibuhat sa Diyos pinaagi kanila.” Ang pag-ampo kang Jehova maoy dakong bahin usab sa ilang Kristohanong mga tigom.—Buhat 14:27.
Ang mga dapit nga gitigoman alang sa pagsimba sa unang-siglong mga kongregasyon dili maluhong mga tinukod sama sa daghang simbahan sa Kakristiyanohan karong adlawa. Sa kinadak-ang bahin, ang unang mga Kristohanon nagtigom diha sa pribadong mga balay. (Roma 16:5; 1 Corinto 16:19; Colosas 4:15; Filemon 2) Kasagaran diha sa lawak sa atop o sa lawak sa itaas sa usa ka pribadong balay ang gigamit. Diha sa usa ka lawak sa itaas gihimo ang Panihapon sa Ginoo. Diha usab sa lawak sa itaas nga gidihogan ang 120 ka tinun-an sa balaang espiritu sa Pentekostes.—Lucas 22:11, 12, 19, 20; Buhat 1:13, 14; 2:1-4; 20:7, 9.
Karong adlawa gisunod sa mga Saksi ni Jehova ang sumbanan nga gitukod sa mga apostoles. Ilang gigamit ang mga tigomanan nga nailhan ingong mga Kingdom Hall. Didto sila ginabansay ingong mga magwawali sa maayong balita sa Gingharian sa Diyos. (Mateo 24:14) Diha sa Kingdom Hall, tun-an usab nila ang Kasulatan, mag-ampo, ug magdinasigay sa usag usa. Kini nahiuyon sa tambag sa Bibliya sa Hebreohanon 10:24, 25: “Mamalandong kita alang sa pagdinasigay sa usag usa sa paghigugma ug sa maayong mga binuhatan, sa dili pagbiya sa atong panagtigom, ingon sa gibuhat sa uban, apan magdinasigay sa usag usa, ug labi na gayod nga makita ninyo nga ang adlaw haduol na.”
Paggamit sa Atong Dapit sa Pagsimba sa Hustong Paagi
Nakahinumdom ka ba sa mga pulong ni apostol Pablo: “Ang Diyos dili Diyos sa kasamok, kondili sa kahusay” ug, “Ang tanang butang kinahanglang himoon sa paagi nga maligdong ug mahusay”? Kon imong susihon ang konteksto niining mga pulonga, imong madiskobrehan nga si Pablo naghisgot sa hustong paagi sa pagdumala sa Kristohanong mga tigom. Sama sa panahon sa mga apostoles, kinahanglang tinoon sa mga Kristohanon karong adlawa nga ang ilang mga tigom mahusay ug maayong pagkaorganisar.—1 Corinto 14:26-40.
Ang Oktubre 15, 1969, nga isyu sa The Watchtower nag-ingon: “Ang espirituwal nga atmospera sa Kingdom Hall maoy tinuod, nagagikan sa tinuod nga interes sa putli nga pagsimba ug pagtudlo sa Bibliya. Ug ang haruhay, kinaiyanhong mga palibot sa tigomanan nagadasig niadtong nagatambong nga magmasayaon ug mahigalaon, wala pugngi sa usa ka ginapatuman nga misteryosong pagkasolemne.” Siyempre, kinahanglan usab ang pag-amping aron ang paggamit sa Kingdom Hall kanunay nga mopabanaag ug pagtahod ug dignidad.
Ang Kakristiyanohan nagpakitag hilabihang kawalay-pagtahod niining bahina. Gigamit sa ubang relihiyosong mga organisasyon ang ilang mga dapit sa pagsimba ingong mga sentro sa kalingawan sa komunidad. Sila may mga aktuwal nga pasundayag sa relihiyosong musika nga rock, mga lawak alang sa barbel, mga lamesa sa bilyar, mga nurseriya, ug mga sinehan sa sulod. Usa ka simbahan may gihimong bangga sa dumog ingong bahin sa ilang programa. Kini wala gayod mahiuyon sa sumbanan nga gihatag sa mga apostoles.
Kon may kongregasyon sa unang-siglo nga milihok nga di-husto, ang pagtul-id nahiangay. Pananglitan, gigamit sa uban diha sa Kristohanong kongregasyon sa Corinto ang pagsaulog sa Panihapon sa Ginoo ingong usa ka okasyon alang sa pagkaon ug pag-inom. Ilang dalhon ang ilang panihapon ug mokaon sa dili pa o sa panahon sa miting, ang uban gani naghinobra sa pagkaon ug pag-inom. Kini wala sa lugar. Si apostol Pablo misulat kanila: “Tino nga kamo dunay mga balay alang sa pagkaon ug pag-inom, dili ba?”—1 Corinto 11:20-29.
Nahiuyon sa tambag ni Pablo, naningkamot ang mga Saksi ni Jehova sa pag-atiman sa personal nga mga butang diha sa balay o sa laing dapit inay kay sa Kingdom Hall. Matuod, ang atong regular nga mga tigom nagatagana ug kombeniyenteng higayon nga makita ang daghan sa mga higala sa usa ka panahon. Ugaling, ang Kingdom Hall gipahinungod ngadto kang Jehova, busa kini bug-os nga gamiton alang sa iyang pagsimba. Dili nato pahimuslan ang atong pagtambong didto aron himoon ang sekular nga negosyo o atimanon ang personal nga mga transaksiyon sa panalapi.
Dugang pa, ang mga Kingdom Hall dili gamiton sa kongregasyon alang sa mga programa sa lulinghayaw, mga kalihokan sa pagpatungha ug salapi, o sosyal nga mga serbisyo, sama sa pag-atiman sa bata. Dunay ubang mga dapit nga maatiman sa usa ang maong personal ug mga butang sa negosyo.
Ang mga ansiano sa usa ka Kingdom Hall nakamatikod nga may mga membro sa kongregasyon nga gibatasan ang paghulam ug pagbalik sa mga hinulam sa panahon sa mga tigom. Usab, nabatasan nilang magbayloay ug mga videocassette sa Kingdom Hall. Bisag kini nga kalihokan dili negosyo, gitabangan sila sa mga ansiano sa pagkakita sa kaalam sa pag-atiman niining mga butanga diha sa balay kon posible.
Aron malikayan ang mga situwasyon nga makahatag ug sayop nga impresyon ug sa pagtino nga gamiton ang Kingdom Hall sa hustong paagi, angayng pangutan-on sa matag usa ang iyang kaugalingon: ‘May personal bang mga butang nga ginaatiman ko diha sa Kingdom Hall nga mahimong maatiman sa balay?’ Pananglitan, kon mag-organisar ug lulinghayaw o ubang sosyal nga mga panagtapok, dili ba mas maayong hisgotan kanang mga kahikayana sa balay? Magamit ba nato ang telepono o moduaw sa mga balay niadtong buot natong kontakon? Sa paghulam sa mga pulong ni Pablo, kita makaingon: ‘Tinong kita dunay mga balay sa pagdumala sa maong mga butang, dili ba?’
Usa ka Tinudlong Panahon ug Dapit sa Pagsimba Kang Jehova
Ang Bibliya nag-ingon diha sa Ecclesiastes 3:1: “Adunay tinudlong panahon alang sa tanang butang, bisan panahon alang sa tagsatagsa ka tuyo ilalom sa kalangitan.” Sa dihang motambong sa mga tigom sa Kingdom Hall, bug-os nga magmaokupado kita sa mga kalihokan nga nalangkit sa Kristohanong ministeryo. Kini maoy tinudlong panahon sa pagsimba kang Jehova.
Ang igsoon ni Jesus sa inahan nga si Santiago mihatag ug tambag batok sa pagpakitag paboritismo sulod sa Kristohanong kongregasyon. (Santiago 2:1-9) Sa unsang paagi atong ikapadapat kining tambaga diha sa atong mga Kingdom Hall? Ang dagway sa paboritismo ikapakita sa dihang himoon didto ang dayag nga pagpasa sa sinulat nga mga imbitasyon alang sa sosyal nga mga okasyon. Sa usa ka kongregasyon ang batasan mao ang pagbutang sa maong mga imbitasyon diha sa mga bag sa libro o sa mga Bibliya niadtong mitambong. Tugotan ta, kini mas kombeniyente kay sa ipadala ang mga imbitasyon pinaagig koreyo o paghatod niini sa matag balay. Ugaling, unsay bation niadtong wala makadawat ug imbitasyon human nga makita nga ang mga imbitasyon ginapasa ngadto sa ubang mga indibiduwal? Dili ba kini pagpakitag dagway sa paboritismo?
Siyempre, dili kinahanglan ang istriktong lagda nga nag-ingon nga walay usa ang makatunol ug personal nga mensahe o usa ka pakete samtang anaa sa Kingdom Hall; ni sayop nga mag-estoryahay diha sa Kingdom Hall bahin sa adlaw-adlaw nga mga kalihokan o mga okasyon, sa pagdapit sa usa ngadto sa imong balay, o sa paghangyo ug usa nga mouban kanimo diha sa usa ka lulinghayaw. Apan kini wala planoha ug himoon sa maalamon ug dili dayag nga paagi. Ang personal nga mga kahikayan dili angay makabalda sa tinuod nga katuyoan sa atong pagkaanaa sa Kingdom Hall, nga mao, aron mapalig-on sa espirituwal.—Mateo 6:33; Filipos 1:10.
Mga Lalaki nga Nagapakitag Panig-ingnan
Ang mga ansiano ug ministeryal nga mga alagad masibotong nagapakitag panig-ingnan sa pagpakita ug pagtahod sa Kingdom Hall. Sa katibuk-an adunay usa o duha ka ansiano ug ministeryal nga mga alagad ang gitudlo sa pagkoordinar sa mga butang maylabot sa pag-atiman sa Kingdom Hall. Kon labaw sa usa ang nagagamit sa samang tigomanan, usa ka komite sa mga ansiano ang moatiman niining mga butanga.
Samtang dayag nga adunay mga espesipikong gitudlo sa pag-atiman sa maong mga buluhaton, ang tanang ministeryal nga mga alagad ug mga ansiano magpasundayag ug tinuod nga interes sa tigomanan. Ilang ilhon nga ang Kingdom Hall gipahinungod ngadto kang Jehova ug ginagamit alang sa iyang pagsimba.
Dili angay maglanganlangan ang mga ansiano kon adunay panginahanglan sa pag-ayo. (2 Cronicas 24:5, 13; 29:3; 34:8; Nehemias 10:39; 13:11) Diha sa ubang mga kongregasyon ang regular nga inspeksiyon sa Kingdom Hall ginahimo aron maatiman dayon ang gikinahanglang mga ayohonon. Ang mga imbentaryo ginatipigan sa pagtino nga ang gikinahanglang mga suplay magamit ug mabatonan. Kon adunay gitudlo nga dapit nga katagoan sa mga suplay, kagamitan, ug mga himan sa paghinlo, ang tanang mga ansiano ug ministeryal nga mga alagad angayng magpakita ug interes sa kahimtang niini, magatino nga kini mahapsay. Kadtong nagadumala sa literatura ug magasin makapakita sa ilang interes sa pagtinong walay magkatag nga mga karton nga walay sulod diha sa tigomanan.
Pinaagi sa pagpakita ug panig-ingnan, ang mga ansiano ug ministeryal nga mga alagad makatabang sa nahibilin sa kongregasyon sa pagpakitag kasibot alang sa Kingdom Hall. (Hebreohanon 13:7) Ang tanan makapakitag hustong pagtahod pinaagi sa pagtabang sa paghinlo sa tigomanan ug magpakita ug tinuod nga interes sa tibuok nga hitsura niini.
Si Jesus miingon diha sa Mateo 18:20: “Kon asa magakatigom ang duha o tulo sa akong ngalan, anaa ako sa ilang taliwala.” Oo, si Jesus interesado kon unsay atong ginabuhat kon kita nagakatigom sa pagsimba kang Jehova. Kini naglakip sa tanang mga tigom nga gihimo diha sa pribadong mga balay ug sa dagkong mga tigomanan sama sa mga kombensiyon o mga asembliya.
Alang sa minilyong mga Saksi ni Jehova, walay laing dapit nga suod sa ilang kasingkasing kay sa ilang regular nga dapit sa pagsimba, ang Kingdom Hall. Sila nagapakita ug hustong pagtahod nianang dapita. Sila nagapasundayag ug makugihong espiritu sa pag-atiman niini, ug sila naningkamot kanunay sa paggamit niini sa hustong paagi. Hinaot imong sundon usab ang tambag nga gihatag ni Jehova mismo: “Bantayi ang imong mga tiil dihang ikaw moadto sa balay sa matuod nga Diyos.”—Ecclesiastes 5:1.