Mga Pangutana Gikan sa mga Magbabasa

Sanglit ang mga Kristohanon dili mopustag salapi, mahimo ba silang modawat ug mga tiket o makigbahin sa hulbot diin sila makadaog ug mga primyo?

Kini maoy pangutana nga mitungha matag karon ug unya, busa kini nahisgotan na sa atong mga publikasyon. Sa ubang mga pinulongan, nakatagana na kami ug mga indese sa atong mga literatura, sama sa Watch Tower Publications Index 1930-1985 (ug sama niana nga nagkobre sa 1986-1990). Kon ang Kristohanon may mga indese sa iyang pinulongan, kini mapuslanon kaayo sa pagpangitag makapatagbaw nga mga tubag.

Ang pangutana nga gisukna sa itaas maoy usa ka pananglitan. Sa pagtan-aw sa Index sa 1930-1985 ubos sa ulohang “Questions From Readers,” ang usa makakaplag ug sub-ulohang “‘drawings,’ may Christian accept ticket for?” Giagak ang magbabasa sa seksiyong “Questions From Readers” diha sa The Watchtower sa Pebrero 15, 1973, panid 127.a Daghang Saksi ang adunay tomo (o indibiduwal nga mga isyu) sa The Watchtower sa 1973, o makasusi ka sa librarya sa daghang Kingdom Hall.

Ang diskusyon nga gipatik diha sa 1973 nagpatin-aw nga ang mga Kristohanon angay maglikay sa bisan unsang sweepstakes o mga hulbot nga maglangkit sa pagpalit ug mga tiket (sama sa ripa o loteriya) o mogamit ug salapi sa pagpalit ug tiket aron makadaog ug primyo. Sa yanong pagkasulti, kita maglikay sa pagpanugal, nga dayag maoy usa ka pagpakita sa kadalo.​—1 Corinto 5:11; 6:10; Efeso 4:19; 5:3, 5.

Ang usa ka tindahan o negosyo, hinunoa, tingali mogamit ug mga hulbot ingong usa ka paagi sa paanunsiyo. Ang buhaton lang sa usa ka tawo mao ang paghatag sa iyang ngalan o sa pagpadala ug porma o tiket, nga walay paliton nga bisan unsa. Ang hulbot maoy bahin sa laraw sa paanunsiyo; kini gidesinyo nga usa ka dili mapihigong paagi sa pagdesider kon kinsa ang hatagan sa primyo o mga primyo. Ang ubang mga Kristohanon tingalig mobati nga ilang madawat ang primyo sa hulbot nga wala maglangkit ug sugal, sama nga sila makadawat ug libreng mga sampol o ubang mga regalo nga gamiton sa usa ka negosyo o tindahan sa programa niini sa paanunsiyo.

Apan, likayan sa ubang mga Kristohanon kini, kay dili gusto nga makapandol o makalibog sa uban ug usab naningkamot sa pagpalayo sa bisan unsang pangdani sa pagsalig sa gitawag kunohay nga Diyosa sa Suwerte. Sama sa gipakita sa Isaias 65:11, ang mga alagad sa Diyos dili makiglangkit sa “diyos sa Maayong Suwerte” o sa “diyos sa Kapalaran.” Tingali maghunahuna usab sila nga dili nila gustong mahimong bahin sa bisan unsang publisidad nga tingali kinahanglang apilan sa mga nakadaog. Kadtong adunay ingon niini nga hunahuna dili angay mosaway sa usa ka Kristohanon o mga Kristohanon kansang konsensiya motugot kanila sa pag-apil sa maong hulbot.​—Itandi ang Roma 14:1-4.

[Footnote]