Mga Pangutana Gikan sa mga Magbabasa

◼ Angay bang mopalit ang usa ka Kristohanon ug mga tiket sa loteriya isip yanong kalingawan kon ang kita niini ihatag diha sa usa ka institusyon nga tigtabang?

Ang Bibliya sa pagkamatuod wala magdili sa tukmang kalingawan, kay si Jehova maoy usa ka “malipayong Diyos.” (1 Timoteo 1:11) Mahimong kalipayan sa iyang katawhan ang musika, ang makasaranganong sayaw, makasaranganong pagkaon o pag-inom, ug balanseng mga paugnat sa kusog ug mga dula. (Salmo 150:4; Ecclesiastes 2:24) Apan, ang pagpanugal sa matin-aw supak sa maalamong tambag sa Diyos, ug kini matuod bahin sa pag-apil sa mga loteriya.

Unsa man gayod ang loteriya? Kini nag-apil sa pagpalit ug mga tiket aron may tsansa nga madaog ang mga premyo. Ang mga mananaog tinoon pinaagig ripa o pila ka panalagma nga pagpilig numero.a Sa kasagaran dako ang premyo, tingali mototal ug milyonmilyong dolyares, pesos, o pounds. Ang kamadanihon sa sobra ka dakong premyo dako kaayo nga gumikan niana ang mga loteriya nahimong mao “ang labing kaylap nga porma sa sugal.” (The World Book Encyclopedia) Ginatos ka milyong mga tawo manugal pinaagi sa mga loteriya.

Ang ubang mga tawo nangatarongan nga ang pag-apil sa loteriya dili sayop o daotan tungod kay ang kantidad sa tiket (tsansa) gamay, tungod kay kadtong nagaapil kinabubut-ong naghimo niini, ug tungod kay ang ubang kita tingali gamiton man alang sa katuyoan sa pagtabang, sama sa pagtabang sa kabus. Unsa ka lig-on kini nga pangatarongan?

Samtang ang uban nangangkon nga yano ang pagpalit ug tiket sa loteriya, menos ug gasto nga kalingawan, dili ikalimod ang bahin sa pagkahakog. Ang mga tawo mopalit ug tiket sa loteriya nga nagalaom nga makadaog ug daghang kuwarta. Kini sa tino supak sa balaang tambag batok sa pagkadalo, nga mahimong seryosong bisyo nga makababag sa usa ka tawo sa ‘pagpanunod sa gingharian sa Diyos.’ Busa, kon ang usa ka Kristohanon magpakitag padayong kahakog pinaagi sa pagpanugal, siya mahimong ipalagpot gikan sa kongregasyon. (1 Corinto 5:11; 6:10) Ang Bibliya nag-ingon: “Ang usa ka panulondon makuha pinaagi sa kahakog sa sinugdan, apan ang kaugmaon niana dili pagapanalanginan.” (Proverbio 20:21) Kon bation sa usa ka Kristohanon ang pangagda sa ‘pagpamasin’ sa loteriya, iyang seryosong hunahunaon ang kahakog nga niini gibase ang loteriya. Ang Efeso 5:3 nag-ingon nga ang ‘kahakog dili gani angay hisgotan sa atong taliwala,’ labaw na ang pag-apil sa usa ka Kristohanon niini.

Ang dakong bahin sa mga magdudula sa loteriya kasagarang makita diha sa kabus nga mga komunidad. Busa bisag gamay ang kantidad sa tiket, ang gamayng salapi makuhaan nga angay moadto unta sa matuod nga mga panginahanglan sa pamilya​—dugang pagkaon, igong panapot, arang-arang medikal nga pag-atiman. Ang tawo nga nagaangkong usa ka Kristohanon apan nagapasagad sa maong mga panginahanglan sa pamilya “labi pang daotan kay sa usa ka tawo nga walay pagtuo.”​—1 Timoteo 5:8.

Bisan pa kon ang kantidad sa usa ka tiket sa loteriya dili makadaot sa personal o sa panalapi sa pamilya sa usa ka tawo, kana wala magkahulogan nga ang uban dili madaot. Ngano man? Tungod kay halos ang tanan nga nagapalit ug tiket sa loteriya gustong makadaog. Diin gikan ang iyang premyo nga salapi? Kon ang iyang tiket nagkantidad ug diyes pesos ug ang premyo maoy usa ka milyong pesos, kana nagkahulogan nga iyang gikuha ang kuwarta sa tiket gikan sa ginatos ka libo ka tawo. Kana ba nahiuyon sa tambag sa Diyos batok sa pagkaibog sa bahandi sa uban? (Deuteronomio 5:21) Sa pagkamatuod, ang iyang premyo nagalangkit sa kuwarta nga kinuha gikan sa daghan pang tawo, kay kapin sa usa ka gatos ka libong mga tiket ang kinahanglang ibaligya. Ang dakong bahin sa kuwarta moadto sa mga gastos sa pagpalakaw, ingon man sa pipila ka katuyoan sa pagtabang nga gianunsiyo nga maoy katuyoan sa loteriya. Busa bisag makaarang pa ang tawo sa diyes pesos alang sa iyang tiket, komusta ang daghan pang uban? Dugang pa, malagmit ang iyang kadaogon igasibya, nga magapukaw sa daghan sa pagsugod sa pagdula sa loteriya o sa pagpalit ug daghang tiket, bisag dili sila makaabot niini.

Dili ikalimod nga ang tumong sa loteriya mao ang damgo nga madaog ang salapi nga walay paghago niana. Oo, ang loteriya nagadasig sa pagkatapolan o nagadani niana. Apan, ang Bibliya nag-awhag sa katawhan sa Diyos nga magmadaginoton, makugihon, ug masingkamoton. Inay ipasiugda ang ‘pagkuhag usa ka butang gikan sa wala’ nga espiritu, kini nagatambag: “Kon dunay magadumili sa pagtrabaho, ayaw ninyo siya pakan-a.”​—2 Tesalonica 3:10; Proverbio 13:4; 20:4; 21:25; 1 Tesalonica 4:9-12.

Nga ang uban tingali moapil sa loteriya sa ilang pagbuot ug nga kini legal dili makapamatarong sa pag-apil sa mga Kristohanon niini. Gihimong legal sa gobyerno ang ubang mga porma sa pagsugal, ingon man ang pagpamampam ug poligamiya. Bisag legal pa kadtong mga butanga ug daghang tawo ang maikagong nalangkit niini, kini wala magkahulogan nga kining mga kalihokana matarong sa panan-aw sa Diyos. Ang mga Kristohanon, hinunoa, maningkamot sa pagpabanaag sa panlantaw ni David: “Ipakita kanako ang imong mga dalan, O Jehova; itudlo mo kanako ang imong mga alagianan. Tultoli ako sa imong kamatuoran ug tudloi ako, kay ikaw mao ang Diyos sa akong kaluwasan.”​—Salmo 25:4, 5.

Kon ang usa ka Kristohanon tiunay gayod nga gustong motabang sa kabus, baldado, o sa tigulang, siya makahimo sa direkta o sa usa ka paagi nga dili malangkit ang pagpanugal.

[Mga Footnote]