Ang Ipasabot sa mga Balita

Mga Katoliko ug Bawtismo

Nagdugang ang gidaghanon sa mga edaran ginabawtismohan sa Romano Katolikong Iglesya sa Pransiya, mitaho ang Le Monde, usa ka Pranses nga mantalaan. Sa pagkamatuod, ang peryodiko nangangkon nga “ang tulo ka numero midoble kapin sa upat ka tuig sa miagi.” Ang una-bawtismo nga mga klase ginahimo kapin sa 4,000 ka edarang mga Pranses nga gustong mahimong bawtismadong mga Katoliko. Dos tersiya maoy mga babaye tali sa edad nga 20 ug 40. Usa sa upat ka bahin dili mga Pranses.

Ang pag-andam alang sa pagbawtismo sa edaran, hinunoa, molungtad ug duha o tulo ka tuig. Ang pari nga si Guy Cordonnier, nga responsabli bahin niining una-bawtismo nga mga klase sa dapit sa Versailles, miingon: “Aron mabawtismohan, dili igo ang pag-ingon nga ang usa nagtuo sa Diyos. Kinahanglang tun-an ang pagkinabuhi sulod sa usa ka komunidad.”

Ang bawtismo sa edaran, sa pagkamatuod, dili butang bag-o. Si Jesus mismo gibawtismohan sa edad nga 30 anyos. Nga ang yanong pagtuo sa Diyos gikinahanglan alang sa bawtismo dili usab butang bag-o. Ang sugo ni Jesus sa iyang mga sumusunod mao ang “paghimog mga tinun-an . . . , sa pagbawtismo kanila” ug “sa pagtudlo kanila” sa pagtuman sa iyang mga sugo.​—Mateo 28:19, 20.

Apan, sanglit ang Katolikong Iglesya sa daghan nang kasiglohan nagapraktis sa pagbawtismo sa masuso, ang baroganan sa iglesya bahin sa pagbawtismo sa mga edaran daw sumpaki. Ang mga awtoridad sa iglesya nag-ingon nga kinahanglan duha o daghan pang mga tuig aron maandam ang usa ka edaran alang sa bawtismo, apan sila nagtuo nga ang bawtismo sa masuso angay. Sila nangangkon nga ang bawtismo makahinlo sa mga masuso sa napanunod nga sala, apan si apostol Juan misulat: “Ang dugo ni Jesus . . . nagahinlo kanato gikan sa daghang sala.” (1 Juan 1:7) Sanglit ang mga masuso dili pa man makabaton ug pagtuo sa Diyos ug sa giula nga dugo ni Kristo, nan nganong bawtismohan man sila?

Mga Pulong nga Wala Gayod Hidunggi

Halos katunga sa 3,800 ka asawa nga gisurbi sa usa ka Hapones nga kompaniya sa seguro “wala makadungog sa mga pulong ‘gihigugma ko ikaw’ gikan sa ilang mga bana sa daghang tuig,” mitaho ang The Daily Yomiuri. Ang porsiento sa mga asawa nga wala makadungog niining mga pulonga nagkadaghan uban sa edad, ug kadtong anaa sa ilang edad 50, ang katingalahang 82 porsiento miingon nga sila wala gayod makadungog niining mga pulonga gikan sa ilang mga bana. Bisan taliwala sa mga asawa sa ilang panuigong 20, 10 porsiento lamang nakadungog sa ilang mga bana nga nagpahayag niining mga pulonga kada adlaw.

Diha sa sugilanon sa gugma sa maalamong Haring Solomon nga naglangkit sa usa ka magbalantay sa hayop ug sa matahom nga dalaga sa banika sa karaang siyudad sa Shunem, pinaagi sa “mga pahayag sa pagmahal” nga nabihag sa batan-ong ulitawo ang kasingkasing sa dalaga. (Awit ni Solomon 1:2) Sa dihang mabihag na sa mga bana ang mga kasingkasing sa ilang mga asawa, kinahanglan pa ba gihapon ang pagpahayag sa ilang pagmahal? Oo! Ang Bibliya nagtambag: “Mga bana, padayon kamo sa paghigugma sa inyong mga asawa, maingon man usab nga si Kristo nahigugma sa iglesya ug mitugyan sa iyang kaugalingon alang niana.”​—Efeso 5:25.

Sa gabii nga gibudhian siya, masubsob nga mipahayag si Jesus sa iyang gugma alang sa iyang mga tinun-an. (Juan 13:34; 14:19-21; 15:9, 10, 12) Kinahanglang hunahunaon sa bana ang panginahanglan sa asawa nga mapasaligan sa iyang gugma. Kinahanglang hinumdoman usab sa mga bana nga si Kristo ‘mitugyan sa iyang kaugalingon alang niana.’ Busa, iyang gipahayag ang iyang gugma sa pulong ug sa mga buhat. Sa matin-aw, maayong sundon sa mga bana ang pananglitan ni Kristo.