Pagkabuang sa Loteriya—Ang Sugal sa Kalibotan
“ANG gikinahanglan lang nimo mao ang usa ka dolyar ug usa ka damgo.” Ang damgo mao ang pagdaog sa jackpot sa loteriya sa New York nga 45 milyong dolyares. Mabayran sa usa ka dolyar ang usa ka pagsulay sa pagdaog. Milyonmilyon ang nangabot nga mga magdadamgo. Sila, nga nanglinya aron sa pagpalit sa ilang mga tiket, nag-estoryahay mahitungod sa mga yate ug sa mga kupo nga ginamag balhibo sa mink ug sa mga palasyo—mga butang nga paliton nila kon sila makadaog sa premyong kuwarta. Sa usa ka punto, sa tibuok nga estado, kusog silang namalit ug mga tiket sa proporsiyon nga 28,000 matag minuto. Sa kataposang tulo ka adlaw una pa sa pagripa, mipalit silag 37.4 milyong tiket.
Sa Hapon kusog kanunay ang negosyo diha sa 10,000 awtorisadong mga baligyaan sa loteriya diin magpanon ang mga tawo sa pagpalit ug mga tiket alang sa Tapos-Tuig nga Jumbo Takarakuji (Loteriya). Sa usa ka baligyaan sa Tokyo diin lima ka unang-premyong mga tiket gikatahong nabaligya sa nangaging mga tuig, mga 300 ka tawo ang nanglinya na sa pagbukas sa baligyaan aron mamaligya. Usa ka dalaga, kinsa nagtuo nga ang suwerte mopabor sa makauna, naghulat na sukad pa sa 1:00 s.b. Ang gitinguhang jackpot sa miaging tuig: usa ka kinatas-ang kantidad nga 100 milyong yen ($714,285, U.S.).
Sa usa ka kaulohan sa West Africa, ang gitawag sa mga tagadidto nga dapit sa Lotto College kanunay nga punog mga tawo nga manganha aron sa pagpalit ug mga tiket ug sa pagbanabana sa umaabot nga mga numero. Ang tag-as nga mga listahan sa nangaging mga numero nga nakadaog ginabaligya ngadto sa mga naglaom nga hikit-an niana ang gamayng ilhanan sa umaabot nga mga kombinasyon. Alang sa mga nagtuo sa misteryosong kahibalo, ang mga propeta sa lotto anaa aron sa pagtagna, nga may bayad, sa mga numero nga pustahan.
Talagsang mga hitabo? Dili gayod. Ang pagkabuang sa loteriya kaylap kaayo. Apektado niini ang tanang kontinente. Ang datong mga nasod ug kabos nangabuang niini. Nahinam niini ang batag tigulang sa tanang ekonomikanhon, sosyal, ug edukasyonal nga hut-ong sa katilingban.
Oo, dakong negosyo ang mga loteriya, ug nagmauswagon ang negosyo. Sa Tinipong Bansa lamang, ang mga loteriya sa Estado nakasapig $18.5 libong milyon niadtong 1989. Sa 27 lang ka tuig nga miagi, ang maong numero maoy sero. Apan karon ang mga loteriya mao ang ikaduha-kinadak-ang matang sa sugal sa Tinipong Bansa, ug ang industriya nagatubo sa 17.5 porsiento matag tuig, sama ka kusog sa industriya sa kompiyutir.
Ang halin sa loteriya sa tibuok nga kalibotan niadtong 1988, sumala sa kinaulahiang mga numero nga nakuha gikan sa magasing Gaming and Wagering Business, mitotal ug $56.38 libong milyon, nga usa ka dako kaayong kantidad. Kana motumbas sa kapig napulo ka dolyar alang sa matag lalaki, babaye, ug bata sa yuta! Ug kana sa usa ra ka tuig!
Bisan tuod walay makalimod nga nagauswag ang mga loteriya, daghan ang nagaergo batok niini nila. Ang sunod duha ka artikulo magatuki sa mausbawong kabantog sa mga loteriya ug sa panaglantugi nga nagpaluyo niini. Samtang palandongon nimo ang mga kamatuoran, makaarang ka sa paghukom kon kaha ang mga loteriya maoy alang kanimo. Ang pagdula ba niini maoy pagkalantip sa utok? Unsa ka sayon ang pagdaog niini? Labaw ba sa salapi ang mapildi nimo?