Ang Hunahuna sa Bibliya

Mga Loteriya—Kinsay Modaog?

“KON buot nimong modaog kinahanglang modula ka.” “Duha ka jackpot sa bili sa 1.” “Labaw nga daog alang sa usa ka dolyar kay sukad masukad!” Mosamot ang tensiyon ug kaukyab. Kay madasig sa maong mga eslogan, ang mga lalaki, mga babaye, ug bisan mga batan-on, sa bisan diin mokuot sa ilang mga bulsa ug mga pitaka. Bisan ang mga kombira sa kasal mabalda niana. Ginalantaw nimo ang kagubot tungod sa loteriya!

Sa kataposan, ang “suwerteng numero” ipahibalo. Kalipay alang sa pinili nga diyutayng tawo. Ang kaliboan, tingali, minilyon, nga dolyar dihadiha ilang maangkon. Ang pagdaog sa usa ka loteriya sa milyong dolyar, nanghambog ang usa ka mananaog, maoy “‘adorno sa keyk’ sa usa ka matagbawong kinabuhi.” Matud sa lain, “Makaparelaks kaayo ang pagkasayod nga dili ka na gayod makabsan ug kuwarta.” Apan alang sa kinabag-an—ang mga napildi—ang mga kalihokan sa kinabuhi mahibalik ngadto sa normal niining paso.

Ang haylo sa loteriya nakadani ba kanimo? Sa unsang paagi ikaw ug ang imong kaugmaon maapektahan niana? Kinsa gayoy modaog?

Pagkahimong Wala nay Suliran sa Salapi?

Ang mga loteriya makapukaw diha sa mga kasingkasing sa mga magdudula sa tinguha nga madato. Bisan pa niana, ang Bibliya nagaingong kining “gugma sa salapi mao ang gamot sa tanang matang sa makadaot nga mga butang, ug sa pagtinguha niining gugmaha ang pipila . . . nalagbaslagbasan sa daghang kasakit.” Ang mga loteriya dili eksepsion.—1 Timoteo 6:9, 10.

Ang mga magdudula mahimong mga giyanon sa sugal. Si Dr. John Watt, medikal direktor sa Homewood Sanitarium sa Guelph, Canada, miingong ang usa ka indibiduwal mahimong ‘mahiligon sa loteriya, sama ra nga ang usa ka tawo mahimong alkoholiko,’ sa paningkamot nga makaikyas sa kamatuoran. Gitawag niya kana nga lotteryitis.

Ug kon makadaog ang usa, motungha ang bag-ong mga suliran. “Abi kog ako mawad-an na sa suliran sa salapi sa nahibilin kong kinabuhi,” matud ni Erika, usa ka mananaog sa usa ka milyong dolyar nga loteriya. Apan tapos sa duha ka diborsiyo ug kanunayng mga pangayo sa maniningil ug buhis, siya mimulo: “Kon hisayran ko pa kon unsay mahitabo, gigisi ko na unta kadtong tiketa.” Ang uban mikomento nga ang pagdaog sa ‘loteriya mao ang sinugdanan sa kinabuhing gisakit sa sakit, kahadlok, ug sa kataposan pagdumot.’ “Ang tanang hugyaw sa pagdaog gipulihan sa bug-at nga mga pas-anon sa akong mga abaga.” “Dili na ko mosalig sa mga tawo—kana ang gihimo kanako sa pagdaog sa loteriya.” Alang sa mga mananaog sa loteriya, ang opisyales nagasugyot pa sa pagsuhol sa badigard ug manedyer sa pagpanalipod sa ilang “mga ganti ug sa ilang kaugalingon.” Oo, bisan ang mga mananaog mahimong mga napildi.

Labi Pang Dagkong mga Pusta

Ang pipila, apil ang iladong relihiyosong mga pangulo, nangatarongan nga ang pagdula sa loteriya matarong basta kini legal. Bisan pa niana, ang kamatuorang ang loteriya legal diha sa pila ka nasod dili mohimo niana nga matarong. Sa pag-ilustrar: Kon ang inyong lokal nga gobyerno maglegal sa prostitusyon o pagpamampam, kana maghimo ba niana nga tukma? Dili sumala sa Bibliya. (1 Corinto 6:9, 10) Ang usa ka tawo nga buot magpahimuot sa Diyos mabalak-on ilabina sa ginapadayag sa Iyang Pulong, ang Bibliya. Lagmit kana usab ang imong dakong kabalaka. Apan ang Bibliya may ikasulti ba bahin sa loteriya?

Wala sa laktud, apan sanglit ang pangunang panghaylo sa loteriya mao ang gugma sa salapi, kini nakagamot sa kadalo. Ang kadalo mopatungha lamag daotang mga bunga. Ang Bibliya nagatambag nga kita dili mag-ugmad sa kadalo diha sa atong mga kasingkasing. (1 Juan 2:15, 16) “Pasagding . . . ang kadalo dili pagahisgotan sa inyong taliwala.”—Efeso 5:3.

Ang gugma sa mga loteriya gibase sa kahakog. Dili ba ang matag entrante magtinguha sa iyang kaugalingong kaayohan, nga mao ang pagdaog kon unsay gibayad sa iyang silingan? Apan, ang Bibliya nagaawhag sa matag usa sa “pagtinguha, dili sa iyang kaugalingong kaayohan, kondili ang iya sa laing tawo.” Busa, dili ba daotan ang pagkalipay ug pagbatog ganansiya gikan sa kapildihan sa ubang tawo?—1 Corinto 10:24; Proverbio 17:5.

Ang loteriya mahimo usab nga lit-ag sa usa ka kabos, nga magkuha gikan kaniya sa butang mismo nga gikinahanglan niya ug sa iyang pamilya—ang salapi. Ang purohang mapildi maoy dako kaayo. Ang mga awtoridad nagaingong lagmit ka pang maigo sa liti kay sa modaog sa loteriya. Ug sumala sa Lightning Protection Institute, ang purohang maigo sa liti si bisan kinsa maoy usa ka milyon sa usa. Busa, ang purohang dili makadaog sa dakong kantidad mahimo tingaling pila ka milyon sa usa!

Apan may lain pang hinungdan sa kabalaka. Ang mga magdudula sa loteriya nagasalig sa suwerte ug dili sa kahanas, sa banabana ug dili sa katarongan. Ingong sangpotanan, daghan ang makiling nga mahimong matuotuohon. Mosangko kini sa unsa? Ang Bibliya nagahisgot niadtong “nagahikay sa usa ka talad alang sa diyos sa Maayong Kapalaran.” Ang pagsimba sa diyosdiyos mao ang ngalan niana. Busa, dili lamang ang purohang dili makadaog sa loteriya mismo, kondili mamahimong kini unang tikang padulong sa pagsimbag diyosdiyos, nga makapasupak kanila kang Jehova nga Diyos.—Isaias 65:11-14.

Labi Pang Maayo kay sa Maayong Pagsugal

Ang Bibliya nagapahinumdom kanatong adunay “labaw nga kalipay sa paghatag kay sa pagdawat.” Sa pagkamatuod, ang pagkabuang sa loteriya dili mopausbaw sa espiritu sa dili-mahakogong paghatag, nga matuod magantihon.—Buhat 20:35.

Ang matuod nga kalipay hikaplagan kon isandig nato ang atong paglaom “dili sa walay-piho nga mga bahandi, kondili sa Diyos, kinsa nagatagana kanato sa tugob sa tanang butang alang sa atong kalipay; sa pagbuhat sa maayo, nga magmabahandianon sa maayong mga buhat, . . . andam makig-ambit.” Busa, kita sa luwas makatigom alang sa atong kaugalingon “sa usa ka maayong patukoranan alang sa umaabot” ug “pagpangupot nga hugot sa tinuod nga kinabuhi.”—1 Timoteo 6:17-19.

Niining paagiha, mahimo kang garantisadong mananaog. Ug kini dili mahimong sulagma o pagbatog “suwerteng numero.” Hinunoa, sumala sa tin-awng gipahayag ni Jesu-Kristo ‘kinahanglang magbaton ka sa tukmang kahibalo sa bugtong matuod nga Diyos’ ug sa iyang mga katuyoan. Unya, lihok sumala niana. Pagkinabuhing nahiuyon sa iyang Pulong. Ang imong kaugmaon nagadepende niana, “kay siya nagahatag kanato sa kadaogan.” Ang ganti labi pang bililhon kay sa jackpot sa loteriya. Kini maoy “kinabuhing walay kataposan”!—Juan 17:3; 1 Corinto 15:57.

[Blurb sa panid 22]

Bisan ang mga mananaog mahimong napildi

[Blurb sa panid 23]

Lagmit ka pang maigo sa liti kay sa modaog sa loteriya