Pag-atubang sa Hagit sa Labing Karaang Teritoryo sa Yuta
“ANG gingharian sa langit haduol na.” Alang sa 370 ka magmamantala sa “maayong balita” sa modernong Estado sa Israel, ang pagwali sa balita dunay linain nga kahulogan. Ngano? Tungod kay dinhi nga ang balita sa Gingharian unang gisangyaw ni Jesu-Kristo duolan sa 2,000 ka tuig kanhi. (Mateo 4:17; 24:14) Kana ang nagpahimo sa Israel nga labing karaang teritoryo sa yuta nga ginasangyawan sa maayong balita.
Apan, sukad pa sa sinugdan, kini maoy usa ka mahagiton nga teritoryo. Bisag daghan ang nagapakitag interes sa balita ni Jesus, pipila lang ang miuswag labaw pa niana. (Juan 6:2, 66) Karong adlawa, ang hagit mao ang panagkadaiya sa relihiyon, kultura, ug politikanhong mga hunahuna.
Sa usa ka bahin, dunay 2.2 ka milyong mga Arabe. Tali kanila mao ang nagaangkong mga Kristohanon, nagapraktis ug wala-magapraktis nga mga Muslim, mga sakop sa relihiyong Druze, ug nagaangkong mga ateyista. Sila usab nakig-anib sa nagkalainlaing paagi sa politika, ang uban nagapabor sa pagtukod sa usa ka independente nga estado sa Palestina sa West Bank ug sa Gaza Strip.
Sa lain nga bahin, dunay 3.5 ka milyong Hudiyohanong mga Israelitas, nga nabahin usab sa daghang paagi. Ang uban milalin gikan sa Morocco, Yemen, Iraq, ug Syria. Ang uban gikan sa Uropa ug Russia. Ang uban pa gikan sa India, sa mga yuta sa Amerika, Ethiopia, Habagatang Aprika, ug sa ubang dapit. Sila nagpuyo sa mga komunidad nga dunay ilang kaugalingong mga kultura ug mga tradisyon ingon man sa ilang tagsaong interpretasyon sa Judaismo ug kon unsaon sa pagpraktis niana.
Pananglitan, dunay usa ka hepe nga rabbi sa Ashkenazi (Uropanhon) nga mga Hudiyo ug usa alang sa Sephardic (Tungang Silangan) nga mga Hudiyo. Samtang ang kadaghanan nagpakitag dakong kaikag sa politikanhon nga mga isyu, dunay relihiyoso kaayong mga Hudiyo kinsa wala gani moila nga nagalungtad ang Estado sa Israel ug nagadumili sa pagbayad ug mga buhis. Unya anaa pa ang mga nakalabang-buhi sa Holocaust, ang kadaghanan kanila ginatugaw gihapon sa ilang kasakitang naagian, ang matag usa dunay iyang kaugalingong makapakitbi sa kasingkasing nga eksperyensiya nga isaysay. Nagadugang, usab, ang nagaangkong mga ateyista, naghawid sa daghang klaseng personal nga mga pilosopiya. Ang bugtong pisi nga naghawid sa Hudiyohanong populasyon mao ang pagkaluwas niini ingong katawhan ug politikanhon nga lawas.
Pag-atubang sa Hagit
Human sa kal-ang nga kapin sa 1,800 ka tuig, ang buluhaton sa pagwali sa Gingharian nabalik dinhi sa gamayng sukod sa 1913. Niadtong panahona, usa ka batan-ong lalaki naikag sa Bibliya ug misugod sa pagpugas sa binhi sa Gingharian sa Ramallah, mga desisayis ka kilometros sa amihanan sa Jerusalem. Gikan didto ang maayong balita mikaylap ngadto sa Arabeng mga molupyo sa Beit-Jala ug Haifa. Wala magdugay human sa Gubat sa Kalibotan II, duha ka igsoong babaye nga Saksi nga Hudiyohanon ug kagikan misugod sa buluhaton sa lugar sa Tel Aviv/Jaffa. Karong adlawa, dunay unom ka kongregasyon ug duha ka grupo sa mga Saksi nga nag-alagad sa lugar sa Haifa, Tel Aviv, Bethlehem, Ramallah, Lod, ug sa Beer-Sheba.
Sama sa kaso sa 19 ka siglo kanhi, ang balay-balay nga ministeryo mao gihapon ang labing epektibong paagi sa pagkaplag niadtong interesado sa maayong balita. (Lucas 8:1; itandi ang Buhat 5:42.) Sa pagkamatuod, kon itandi sa ubang mga nasod, makalilipay ang pagsangyaw niining paagiha dinhi. Sa katibuk-an, ang mga tawo mausisaon mahitungod sa atong balita ug manapit sa mga magmamantala sa Gingharian alang sa diskusyon. Kini nga pagkamausisaon kasagarang motultol sa pagkapahimutang sa atong mga magasin ug sa ubang basahon sa Bibliya. Sa masubsob, kining mga publikasyona ginapasa gikan sa silingan ngadto sa laing silingan, nga miresulta diha sa pila ka indibiduwal sa pagkahibalo sa kamatuoran sa Bibliya.
Kining mao gihapon nga pagkamausisaon, hinunoa, masubsob nga mahimong hulga sa tandogonon nga binhi sa kamatuoran diha sa mga kasingkasing sa mga bag-ohan. (Mateo 13:20, 21) Ang mga silingan, mga higala, ug ilabina ang relihiyosong mga lider mohimo sa ilang grabe nga pag-ipit, pagtamay, paghadlok, ug sa pila ka kaso sa pisikal nga pag-abuso niadtong nagapakitag interes sa balita sa Gingharian. Ingong resulta, ang uban nawad-an ug trabaho, samtang ang pipila bug-os naputol gikan sa mga higala ug mga pamilya. Kadtong nagabarog nga malig-on ug nangahimong mga Saksi ni Jehova kinahanglan mag-antos sa mga kalayo sa pagsupak.—Itandi ang Juan 9:22.
Ang pagsupak nagaabot usab sa ubang mga paagi. Ang mga Saksi nga Hudiyohanon ug kagikan ginaatake sa mga tawo. Ang sangang buhatan ug ang Kingdom Hall sa Tel Aviv ug ang Kingdom Hall sa Haifa nahimong target sa mga arsonista. Karon dunay dakong pag-ipit sa Arabe ug Hudiyohanong mga Saksi sa pagdapig sa politikanhong away batok sa pagtukod sa estado sa Palestina. Ang paghupot ug neyutral nga baroganan niining mga butanga, mataktikanhon nga ginapatin-aw sa mga igsoon nga walay tawhanong ahensiya ang makasulbad sa mga suliran sa masakitong katawhan. Hinunoa, sa pagsunod sa ilang Lider, si Jesu-Kristo, ang mga Saksi nagapunting sa Gingharian sa Diyos ingon nga mao lamang ang bugtong sulbad.—Juan 17:16; 18:36.
Nakapatunghag Bunga sa Gingharian
Bisan pa sa mga hagit diha niining labing karaang teritoryo sa pagpanaksi, kadtong “nakadungog sa pulong ug nakasabot niana” nakapatunghag bunga sa Gingharian niining natara. (Mateo 13:23) “Dunay mga tawo nga giuhaw sa kamatuoran, mga mahigugmaon sa pagkamatarong kinsa sa literal nagapangita niana,” miingon ang usa ka eksperyensiyadong bug-os panahong ministro. “Sila wala maimpluwensiyahi sa mga opinyon o sa mga pag-ipit sa uban. Sa dihang ang higayon sa pagkat-on sa kamatuoran miabot, gisakmit dayon kini nila.” Gipakita sa daghang eksperyensiya kining puntoha.
Gipadako diha sa kombento sa Gresya, si Benvenida naikag kaayo sa gipamulong sa Bibliya mahitungod sa “dagway sa pagsimba nga putli ug dili bulingon,” nga mao, “ang pagduaw sa mga ilo ug sa mga balo sa ilang mga kasakitan, ug ang pag-amping sa kaugalingon nga dili mahugawan sa kalibotan.” (Santiago 1:27) Ingong usa ka batan-ong babayeng Hudiyohanon, siya walay laing naagian kondili ang “kalamidad gikan sa laing kalamidad,” nga maoy iyang gipamulong bahin niana. Iyang giantos ang kalisod sa panahon sa okupasyon sa Nazi ug ang sibil nga gubat, nga diin namatyan siyag bana. Apan ang iyang paglaom sa pagkaplag ug mga tawong matinud-anon ug dili-salingkapaw wala gayod mahanaw.
Human nga milalin sa Israel sa 1949, gipadayon ni Benvenida ang karera sa pagkamananabang hangtod sa iyang pagretiro sa 1974. “Sulod niadtong panahona,” siya miingon, “masubsob nga gipangutana nako ang akong kaugalingon: ‘Hain na man kadtong buotan ug matinud-anong mga tawo nga gihisgotan sa Bibliya? Hain na man ang hustisya niining kalibotana?’” Mikuha siya ug Judaismo, mitambong sa sinagoga ug nagtuman sa Adlawng-Igpapahulay ug sa mga piyesta-opisyal. Apan ang tabitabi ug panag-away taliwala sa mga sakop sa iyang lokal nga kongregasyon nakadugang sa iyang kagutom sa “dagway sa pagsimba nga putli ug dili bulingon.”
Sa kataposan, sa 1985, ang usa sa tinuig nga pagduaw ni Benvenida sa dapit sa pangalim sa Gresya, usa ka Saksi nga babaye nga gitambalan didto nakabukas ug kokabildo uban niya. Ang taas nga diskusyon misugod. Niana mismong gabhiona, mitambong si Benvenida sa iyang unang miting sa lokal nga Kingdom Hall ug naikag kaayo sa kainit ug katim-os sa mga igsoong lalaki ug babaye didto.
Si Benvenida nagpadayon sa iyang pagtuon sa dihang mibalik siya sa Israel, ug hapit usa ka tuig ug tunga sa ulahi, siya gibawtismohan sa pagsimbolo sa iyang pagpahinungod sa Diyos sa kamatuoran, si Jehova. “Sa kataposan,” siya miingon, “human niining mga tuiga ug sa panuigong 70, akong nakita ang mga tawong makasaranganon ug mapainubsanon nga gihisgotan sa Bibliya, mga tawo nga nagatratar kanako nga usa ka tawo. Karon, matag adlaw nga ako nabuhi maoy adlaw sa kalipay ug katuyoan!”
Si Moshe maoy laing tigpangitag kamatuoran nga naghulat lamang nga ‘makadungog sa maayong tingog sa magbalantay.’ (Itandi ang Juan 10:14-16.) Bisan pa nga maikagon si Moshe sa Kasulatan, kadto maoy gikan sa usa ka kopya sa “Bag-ong Tugon” nga hapit nang ilabay sa iyang igsoon nga iyang nakat-onan ang bahin kang Jesu-Kristo, ug siya naikag kaayo. Sa ulahi, miapil si Moshe sa usa ka kauban sa trabaho sa iyang pagtuon sa Bibliya uban sa usa ka Saksi ug mitambong sa pakigpulong nga gihatag sa nagaduaw nga mamumulong. “Mao kini ang dugay na nakong gustong madunggan!” siya miingon human nianang unang miting.
Tapos sa unang kakulian, kusog ang pag-uswag ni Moshe. Sulod sa unom ka bulan, siya gibawtismohan. Apan, ang iyang pag-uswag nakapukaw ug pagsupak sa iyang pamilya, ilabina sa iyang asawa. Misamot kini sa dihang siya, isip kinamagulangan sa pamilya, midumili sa pag-apil sa seremoniyal nga mga pag-ampo sa paglubong sa iyang amahan. Dugang pa, gisultihan sa mga higala ug mga paryenti ang iyang asawa nga kinahanglan siya dunay ‘himoon sa madali’ sa dili pa niya pirmahan ang tanang butang ngadto sa kongregasyon. “Akong gihupay ang iyang mga kahadlok pinaagi sa pagtanyag sa pagbutang sa apartment diha sa iyang ngalan,” miingon si Moshe. Ug pinaagi sa tukmang pag-iskedyol sa iyang oras, siya nakabaton ug malipayong panimbang tali sa iyang pamilya ug sa mga responsabilidad sa kongregasyon.
Hinunoa, dili tanan sa mga paryenti nagabatok sa kamatuoran. Gipaambit ni Nehai ang iyang nakat-onan sa Bibliya uban sa iyang bana, si Hanna, kinsa aktibo kaayo sa politika. Wala magdugay, naamgohan nilang duha nga ang Gingharian sa Diyos mao lamang ang bugtong paglaom alang sa dinaogdaog nga katawhan. Busa sila nahimong dedikadong mga alagad ni Jehova ug misugod sa pagpamatuod sa mga pamilyang Arabe sa Haifa ug sa silingang mga balangay. Ilabinang nagapamatuod sila sa ilang pamilya sa gawas, diin ang tanan maoy duolan sa 252 ka tawo.
Nahimo ba kining hagit? Oo, kay gawas sa pagmanehog usa ka oras ug tunga matag paingon sa mga balangay sa Arabe sa paghimo sa pagduaw, dakong pailob ug pag-antos ang gikinahanglan. “Usahay lainlain ang mosulti kanimo nga dili na sila gustong mamati pa. Kon mahitabo kana, kinahanglang mohunong ka sa pagsulti. Sa ulahi, tingali mataktikanhon nimong ibalik pag-usab ang ulohan. Sama kini nga gipatiran ka sa pultahan ug mikatkat ug balik diha sa bentana,” miingon si Hanna. Kining tanan nabaslan ra. Busa hangtod dinhi, 24 sa iyang 36 ka suod nga mga paryenti mipadayag ug seryosong interes sa Kasulatan, ug 13 kanila ang nagtuon sa Bibliya uban kang Hanna o sa ubang mga Saksi. Sa pagkakaron, lima sa iyang suod nga mga paryenti maingon man sa iyang kaugalingong mga anak nakapahinungod sa ilang mga kinabuhi kang Jehova, ug tulo pa ang nagauswag paingon niana nga tumong.
Bag-ong Kinatas-ang mga Ihap Diha sa Labing Karaang Teritoryo
Ang makapalipay sa kasingkasing nga mga eksperyensiya sama niini nagadugang dinhi sa Israel, ug ang palaabuton sa pagtubo labing makapadasig. Sa miaging 1988 ang gidaghanon sa mga magmamantala sa Gingharian nakaabot sa kinatas-ang ihap nga 370. Ang aberids nga gidaghanon sa mga pagtuon sa Bibliya nga ginadumala kada bulan diha sa mga balay sa mga tawong interesado milukso gikan sa 89 sa 1979 ngadto sa 301 sa 1988—240-posiento nga pag-uswag!
Kining tanan nakahatag dakong kalipay sa mga Saksi ni Jehova niining karaan nga nasod. Kami nagapaabot sa labi pang dakong mga panalangin gikan sa atong Diyos, si Jehova, samtang kami nagapadayon sa buluhaton sa paghimog-tinun-an diha sa labing karaang teritoryo sa yuta.
[Mga hulagway sa panid 26, 27]
Ibabaw: Tanamang Lubnganan, Jerusalem
Sa Pikas: Tiyanggihan ug mga talan-awon sa karsada sa Israel
Ubos: Sangang buhatan sa Tel Aviv