Gitahod Mo ba ang Inyong Kingdom Hall?
1 Sanglit kay ang Kingdom Hall mao man ang sentro sa matuod nga pagsimba diha sa atong dapit, kinahanglang pabilhan ta gayod kana. Mao kanay dapit nga kita magkatigom uban sa atong mga igsoon sa pagpalig-on kanila. (Heb. 10:24, 25) Ato ba gayod kanang gitahod? Ang tanan kanato kinahanglang moambit sa paghupot nianang mahinlo ug anaa sa maayong kahimtang. Kon ang atong grupo sa pagtuon sa libro natudlo sa paghinlo sa hawanan, buot tang moambit niining buluhatona, nga sa ingon nagapakita sa atong apresasyon alang sa malinis ug makapadaning tigomanan.
2 Kitang tanan makapakitag interes sa Kingdom Hall, kita man natudlo sa paghinlo o wala. Sa unsang paagi? Pinaagig paghinlo sa atong mga tiil sa dihang mosulod sa hawanan aron dili motapot ang hugaw. Kon mogamit kita sa kasilyas, atong matrapohan ang lababo human sa paggamit niana aron malinis alang sa sunod nga tawo. Kadtong anaa sa mga dapit sa literatura ug magasin kinahanglang hiposon dayon ang walay sulod nga mga karton ug mga putos. Ang tanang basura kinahanglang isulod sa mga panudlanan nga gitagana alang sa maong katuyoan. Kon makita ta ang basura diha sa salog, ato gayod kanang puniton inay kay biyaan lang alang sa laing tawo sa pagpunit niana. Ang Atong Ministeryo sa Gingharian sa Pebrero, 1989 mihatag ug mga sugyot sa paghupot nga mahinlo sa ‘information board.’ Ang uban kinahanglang mokooperar sa nagadumalang magtatan-aw sa pagpaneguro nga kining tambaga ginasunod.—km 2/89, p. 4.
3 Ang samang mga prinsipyo mapadapat man sa motambong kitag mga asembliya. Ang dapit asembliyahanan maoy usa ka sentro sa pagsimba, ug busa pagatagdon kana uban ang pagtahod. Ato gayod kanunay nga susihon nga walay mabilin nga bisan unsang hugaw o basura sa atong gilingkoran. Dili ta gayod bation nga kadtong natudlo sa paghinlo anaa man sa pagsunod kanato aron hinloan kana.
PAG-AMBITAY SA USA KA HAWANAN
4 Daghang Kingdom Hall gigamit ug kapin sa usa ka kongregasyon. Ang kada kongregasyon kinahanglang magmainteresado sa Kingdom Hall, nga nagaila nga kana iya ni Jehova ug gigamit kana alang sa iyang pagsimba. Ang pagtahod sa tigomanan nagalakip sa pagpakitag gugma alang sa atong mga igsoon sa ubang mga kongregasyon nga nagagamit sa maong hawanan.
5 Sa kasagaran, ang paghinlo sa Kingdom Hall ginahimo makausa sa matag semana. Diin kapin sa usa ka kongregasyon ang nagagamit sa hawanan, maoy maayo nga ang pipila ka paghinlo pagahimoon human sa tigom segon sa itugot sa panahon aron ang sunod nga kongregasyon nga mogamit niana makakaplag nga presentable ang hawanan. Kini usab mapadapat sa mga Domingo sa dihang ang usa ka kongregasyon mosunod sa paggamit; basin hinuon ang hawanan mahimong hugaw kaayo sa pagkatapos sa maong adlaw.
6 Maingon nga kita “nahiusa pag-ayo diha sa samang hunahuna” maylabot sa espirituwal nga mga butang, hinaot nga kita usab mahiusa sa pagpakitag pagtahod alang sa atong mga Kingdom Hall.—1 Cor. 1:10.