Huptan Nato ang Atong Dapit sa Pagsimba nga Maayog Kahimtang
1. Ang Kingdom Hall nagsilbi sa unsang katuyoan?
1 Sa tibuok kalibotan dunay kapin sa 94,000 ka kongregasyon sa mga Saksi ni Jehova. Kadaghanan sa mga kongregasyon magtigom alang sa pagtuon sa Bibliya ug Kristohanong panag-ubanay diha sa usa ka Kingdom Hall, nga nagsilbing usa ka lokal nga tigomanan alang sa putli nga pagsimba.
2. Nganong hinungdanong huptang hinlo ug presentable ang Kingdom Hall?
2 Regular nga Eskedyul sa Pagpanghinlo: Ang buluhaton nga ginahimo sa pagmentinar sa Kingdom Hall maoy hinungdanong bahin sa atong sagradong pag-alagad. Ang librong Atong Ministeryo nag-ingon diha sa mga panid 61-2: “Kinahanglang ilhon sa kaigsoonan nga usa ka pribilehiyo dili lang sa pagsuportar sa Kingdom Hall sa galastohan kondili usab sa pagboluntaryo sa ilang mga serbisyo sa paghupot niana nga mahinlo, presentable ug ginaayo. Sa sulod ug sa gawas niana, ang Kingdom Hall kinahanglang hustong representasyon sa organisasyon ni Jehova.” Tungod kay ang Kingdom Hall ginagamit sa ubay-ubayng panahon sa matag semana, adunay panginahanglan sa regular nga pagpanghinlo ug pagmentinar. Kasagaran ang mga boluntaryo gikan sa (mga) kongregasyon nga magtigom diha sa maong Kingdom Hall mao ang moatiman niining mga butanga. Sama sa kapanahonan sa Bibliya, ang mga alagad ni Jehova karong adlawa angayng magmakugihon sa “pag-ayom ug sa pag-ayo” sa atong dapit sa pagsimba.—2 Cron. 34:10.
3. Sa unsang paagi giorganisar ang pagpanghinlo sa Kingdom Hall, ug kinsa ang mahimong makig-ambit sa maong pribilehiyo?
3 Ang usa ka eskedyul sa senemanang pagpanghinlo sa Kingdom Hall kinahanglang ipaskin diha sa information board. Ang mga grupo sa pagtuon sa libro kinahanglang magpulipuli sa pagpanghinlo sa tigomanan matag semana, nga sundon ang listahan sa mga butang nga angayng himoon. Ang tanang makaarang angayng makig-ambit sa maong senemanang pribilehiyo sa paghupot sa Kingdom Hall nga hinlo ug presentable. Uban sa superbisyon sa ginikanan, ang mga bata mahimong makig-ambit sa pagpanghinlo, sa ingon nagtudlo kanila sa pagpakitag pagpabili sa maong pribilehiyo. Ilabina kon kapin sa usa ka kongregasyon ang naggamit sa usa ka Kingdom Hall, ang maayong kooperasyon gikinahanglan aron ang pag-atiman niining hinungdanong bahin sa atong pagsimba dili ikatugyan sa pipila lang ka indibiduwal.
4. Unsay angayng buhaton aron mahibalo ang kongregasyon kon unsay himoon sa dihang manglimpiyo sa Kingdom Hall?
4 Ang usa ka listahan sa mga butang nga angayng himoon mahimong ipaskin, tingali sa dapit diin gihiposan ang mga gamit sa pagpanghinlo. Ang maong listahan angayng magpatin-aw sa mga buluhaton nga himoon kada semana, nga naglakip sa paghinlo sa mga bentana, pagtrapo sa mga lamesa, paglabay sa mga basura, pagpunas sa salog, ug paglimpiyo sa mga salamin. Ang ubang mga buluhaton dili tingali himoon nga regular, sama sa pagpasinaw sa bisan unsang muwebles nga kahoy ug paglimpiyo pag-ayo sa mga lingkoranan, kortina, ug mga suga. Ang tanang kemikal nga gamiton sa pagpanglimpiyo kinahanglang hiposon nga dili makab-ot sa mga bata ug kinahanglang markahan sa tin-awng paagi. Ang mubong pagpatin-aw kon unsaon paggamit ang maong mga kemikal angayng ihatag.
5. Unsa ka hinungdanon ang kahilwasan, ug unsang mga butanga ang kinahanglang susihon sa popanahon? (Tan-awa ang kahon sa panid 4.)
5 Ang kahilwasan diha sa Kingdom Hall maoy hinungdanon kaayo. (Deut. 22:8) Tungod niini, ang kahon sa panid 4 naglista sa pipila ka butang nga kinahanglang susihon sa popanahon aron malikayan ang mga aksidente.
6. Sa unsang paagi ang buluhaton sa pagmentinar sa Kingdom Hall ginapatakdo?
6 Pagmentinar sa Kingdom Hall: Ang lawas sa mga ansiyano mao ang responsable sa pagpanguna sa pagmentinar sa Kingdom Hall. Kasagaran, usa ka ansiyano o ministeryal nga alagad ang itudlo sa pagpatakdo sa maong buluhaton. Organisahon niya ang adlaw-adlaw nga kalihokan sa Kingdom Hall, nga paneguroong mahuptang hinlo ug maayog kahimtang kini ug adunay igong mga suplay sa pagpanghinlo nga mabatonan. Hinungdanon nga walay peligrosong mga kahimtang ang naglungtad diha sa sulod o gawas sa tigomanan. Kon may duha o kapin pang mga kongregasyon nga naggamit sa mao rang tigomanan, ang mga lawas sa mga ansiyano magtudlo ug usa ka nagaatiman nga komite aron sa pag-organisar sa mga kahikayan alang sa pag-atiman sa tinukod ug sa propiedad. Ang maong komite magalihok ubos sa pagtultol sa mga lawas sa mga ansiyano.
7. (a) Unsay ginabuhat matag tuig aron sa pagseguro nga ang Kingdom Hall anaa kanunay sa maayong kahimtang? (b) Unsang mga butanga ang kinahanglang tagdon sa popanahon? (Tan-awa ang kahon sa panid 5.)
7 Ang usa ka detalyadong inspeksiyon sa Kingdom Hall ginahimo kada tuig. Ang mga ansiyano maoy responsable sa paghimog mga kahikayan aron maatiman pag-ayo ang bisan unsang butang nga kinahanglang tagdon. Mahimong dapiton ang mga magmamantala sa pagtabang sa kinahanglang ayohon ug mentinahon. Ang tanan angayng magmaalisto sa pagtagad bisan sa ginagmayng mga butang ug angayng magmadali sa pag-atiman sa mga butang nga nagkinahanglag pagtagad.
8. Kanus-a mahimong kontakon sa mga ansiyano ang Kingdom Hall Construction Desk mahitungod sa mga butang nga angayng mentinahon?
8 Kon bation sa mga ansiyano nga kinahanglan nila ang sugyot o tabang sa pagmentinar sa Kingdom Hall, mahimong kontakon nila ang Kingdom Hall Construction Desk sa sangang buhatan. Mahimong maglakip kini sa mga butang sama sa pag-ayo sa tinukod ug pag-ayum-ayom sa mga tulo, agup-op, ug sobrang kaumogon diha sa maong tinukod.
9. Unsang pamaagi ang kinahanglang sundon kon dunay panginahanglan sa pagkuha ug kontraktor?
9 Gamita ang Pondo sa Kongregasyon sa Maalamong Paagi: Kadaghanan sa buluhaton diha sa sulod ug gawas sa Kingdom Hall ginahimo sa mga boluntaryo. Ang ilang nagasakripisyo-sa-kaugalingon nga mga paningkamot maoy usa ka maayong kapahayagan sa gugma ug makatabang ug dako sa pagpakunhod sa mga gasto. Kon gikinahanglan gayod nga mokuhag kontraktor aron sa pag-atiman sa pipila ka trabaho, sama sa pagkontrol sa dangan o usa ka dakodakong ayohonon, ang mga ansiyano mangitag interesadong mga kontraktor nga makahimo sa maong buluhaton sa ekonomikal nga paagi. Himoon nila kini pinaagi sa pag-andam una ug sinulat nga detalye sa matang sa trabaho nga himoon ug bisan unsang materyales nga kinahanglang isuplay. Ang usa ka kopya sa maong listahan ihatag ngadto sa nagkalainlaing nga suplayer aron ang tanang interesadong mga kontraktor makahatag ug gibanabanang kantidad nga may samang pagsabot sa mga kinahanglanon. Human madawat ang sinulat nga mga gibanabanang kantidad gikan sa ubay-ubayng posibleng kontraktor, ang mga ansiyano mopili sa labing maayong tanyag. Ang maong pamaagi kinahanglang sundon bisan pag may igsoon nga mitanyag nga maoy motrabaho o mosuplay sa gikinahanglang mga materyales sa usa ka tinong kantidad.
10. Unsay himoon aron maseguro nga ang mga pondo sa kongregasyon gigamit sa hustong paagi?
10 Sa dihang kapin sa usa ka kongregasyon ang naggamit sa Kingdom Hall, ang nagaatiman nga komite maghupot ug separadong pondo sa bangko ug maghatag ug binulang sinulat nga pinansiyal nga taho ngadto sa matag lawas sa mga ansiyano, sa ingon kanunayng mahibalo ang mga ansiyano kon sa unsang paagi gigasto ang maong pondo. Ang mga ansiyano maoy responsable alang sa hustong paggasto sa mga pondo sa kongregasyon.
11. Unsay angayng himoon kon gikinahanglan ang malukpanong pagmentinar o pag-ayo?
11 Malukpanong Pagmentinar ug Pag-ayo: Sa dihang mamatikdan sa nagaatiman nga komite nga dunay dakong panginahanglan maylabot sa paggamit o pagmentinar sa Kingdom Hall, ang komite magpahibalo sa maong butang ngadto sa mga lawas sa mga ansiyano alang sa direksiyon. Kon matino nga gikinahanglan ang malukpanong pagmentinar o pag-ayo o gikinahanglan ang tabang gikan sa gawas sa mga kongregasyon nga nagtigom sa maong Kingdom Hall, ang mga ansiyano angayng magkontak sa Kingdom Hall Construction Desk. Ang maong departamento magtagana ug mapuslanong mga sugyot kon sa unsang paagi mahimo ang maong trabaho. Kon nalangkit ang dakong galastohan, hinungdanong kuhaon ang tukmang mga banabana sa galastohan ug mag-andam ug resolusyon nga uyonan sa kongregasyon.—Tan-awa ang “Pangutana” sa Agosto 1984 nga Atong Ministeryo sa Gingharian.
12. Sa unsang paagi ikapakita nato ang atong pagpabili alang sa pribilehiyo nga makatambong sa mga tigom diha sa Kingdom Hall?
12 Pagkadako sa atong pagpabili sa atong pribilehiyo nga magkatigom diha sa Kingdom Hall! Dili gayod nato buot pasagdan o sayonsayonon lamang kini. Ang tanan makaamot sa kalamposan sa maong tagana alang sa pagdasig kanato pinaagi sa bug-os nga pagpakig-ambit sa pag-atiman sa atong Kingdom Hall. Kini makabayaw sa putli nga pagsimba ug makapasidungog sa ngalan ni Jehova. Magmadeterminado kita sa paghupot sa atong dapit sa pagsimba nga maayog kahimtang.
[Kahon sa panid 4]
Tamdanang Listahan sa Kahilwasan
◻ Ang mga fire extinguisher kinahanglang daling makuha ug gimentinar matag tuig.
◻ Ang mga gawsanan ug mga hagdanan kinahanglang gimarkahan nga tin-aw, hayag, ug daling maagian, ug ang mga kuptanan kinahanglang lig-on.
◻ Ang mga bodega ug mga kasilyas kinahanglang hinlo, hapsay, ug walay daling masunog nga mga materyales, personal nga mga butang, ug basura.
◻ Ang mga atop ug mga sandayong kinahanglang regular nga susihon ug hinloan.
◻ Ang mga agianan sa daplin ug ang parkinganan kinahanglang adunay suga ug walay mga butang nga makapadakin-as o makapatumba.
◻ Ang mga sistema sa elektrikal ug bentilasyon kinahanglang susihon ug mentinahon pag-ayo.
◻ Ang bisan unsang mga tulo kinahanglang ayohon dayon aron malikayan ang mas grabeng mga problema sa kaumog.
◻ Ang tinukod kinahanglang trangkahan kon wala nay tawo sa sulod.
[Kahon sa panid 5]
Pag-atiman sa Tinukod ug sa Propiedad
◻ Sa gawas: Maayo bag kahimtang ang atop, bungbong, pintal, mga bentana, ug ang karatula sa Kingdom Hall?
◻ Sa lagwerta: Hinlo ba ang lagwerta? Maayo bag kahimtang ang mga agianan sa daplin, mga koral, ug ang luna sa parking?
◻ Sa sulod: Presentable ba ang salog, mga kortina, mga lingkoranan, mga linya sa suga ug tubig, pintal sa bungbong, ug mga kabinet sa literatura?
◻ Mga gamit: Maayo bag kahimtang ang suga, sound system, bentilasyon, ug air-conditioning?
◻ Mga kasilyas: Hinlo ba kini ug walay diperensiya?
◻ Mga dokumento sa kongregasyon: Nunot ba sa panahon ug tukma ang mga dokumento sa korporasyon o ang mga titulo sa yuta? Nakaaplay na ba ug eksemsiyon sa buluhisan sa propiedad?