“Salamat sa Inyong Paglungtad”

Mao kana ang gisulat sa usa ka lalaki nga taga-North Carolina, T.B.A., ngadto sa hedkuwarter sa mga Saksi ni Jehova sa Brooklyn, New York. Miingon usab siya: “Ako mihangyog pagtuon sa Bibliya sa balay nga inyong gitanyag sa Pagmata! Apan mihangyo usab ako ug bisan unsa ug sa tanang impormasyon nga mahimong ikahatag ninyo bahin sa ulohang impiyerno. . . .

“Ako namatuto sa Baptist Church, apan bisan sa gamay pang bata, may usa ka butang bahin sa ilang mga pagtulon-an o doktrina nga wala ako makauyon.

“Tigbasa na ako sa inyong mga publikasyon sukad pa sa 1965. Akong tan-awon ang Bibliya samtang nagbasa, ug ang tanan diha sa inyong mga basahon tukma sa Bibliya. Nagtinguha gayod ako nga mahibalo sa kamatuoran mahitungod sa Diyos ug kang Jesus, ug ako sa kamatinud-anon makaingon nga nakaplagan ko ang tinuod nga mga tubag pinaagi sa inyong basahon ug sa Bibliya.”

Tingali pabilhan usab nimo ang impormasyon bahin sa binase-sa-Bibliya nga mga pagtulon-an sa mga Saksi ni Jehova. Kon buot nimong makadawat ug kopya sa tract nga Unsay Gituohan sa mga Saksi ni Jehova? o makabaton ug libreng pagtuon sa Bibliya sa balay, palihog pagsulat sa Watch Tower, P.O. Box 2044, 1099 Manila, o sa nahiangay nga direksiyon nga nalista sa panid 5.