Usa ka “Elektronikong Pag-atake sa Utok”

ANG telebisyon makalingaw ug matulon-anon. Apan, si Propesor Moshe Aronson sa Tel-Aviv University nagpasidaan nga ang sobrang pagtan-aw ug TV makadaot sa imong panglawas. Sa unsang paagi?

Ang dili-aktibong tumatan-aw, miangkon si Aronson, makasinati ug pag-uswag sa tensiyon nga dili mahupay samtang naglingkod atubangan sa telebisyon. Magpatungha kini ug mga stress hormone nga kon daghan na kaayo makadaot sa selula sa utok diha sa hippocampus​—usa ka bahin sa utok nga hinungdanon sa paghinumdom. Bisan tuod giingon nga dugang pagtuon ang gikinahanglan, si Aronson nagsuspetsa nga kining maong kadaot motultol sa pagkamalimtanon, lagmit maghimo pa gani sa usa nga dali rang masakit sa sakit nga Alzheimer sa ulahing bahin sa kinabuhi. Sa bisan unsang kahimtang, ang magasing New Scientist nagtawag sa sobrang pagtan-aw ug telebisyon nga usa ka “elektronikong pag-atake sa utok.”

Kaatbang sa pagtan-aw ug TV, ang pagbasa magpalihok sa handurawan ug magpukaw sa mga katakos sa paghunahuna​—aktibo gayod nga kalihokan! Samtang ang matag talan-awon o tingog gihubad alang sa nagtan-aw ug TV, ang magbabasa magmugna ug iyang kaugalingong talan-awon ug mga tingog. Kining mamugnaong paggamit sa katakos sa paghunahuna mosanta sa pagkahabol sa pangisip, sa ingon makaayo sa panglawas sa usa. Tungod niini, dili ba maalamon nga limitihan ang panahon nga inyong gigugol atubangan sa telebisyon?