Gikan sa Among mga Magbabasa
Sanong sa Personal nga Asoy Daghan kaayong salamat sa makapatandog sa kasingkasing nga sugilanon ni Larry Rubin, “Dili na Usa ka Bato o Usa ka Isla.” (Nobyembre 22, 1994) Kasagaran daghan ang mapakyas sa pagkonsiderar niadtong nag-antos kaniadto. Giingnan ako kas-a sa akong anak nga lalaki nga kon tinuod gayod akong may pagtuo, dili unta ako mabalaka! Apan dili tanan ang makalimot lang dayon sa kagahapon. Palihog padayon sa pagsulat ug tawhanong mga kasinatian nga ingon niini. Ako nanghinaot nga mopahumok kini sa pipila ka kasingkasing.
M. L., Britanya
Naglisod ako pagpangitag mga pulong sa pagpahayag sa akong mga pasalamat. Kasagaran kaayo nga makahibalag kita ug mga tawo nga nadaot ang emosyon gumikan sa kanhing mga pag-abuso. Ang pagtabang kanila nga makaobra sulod sa kongregasyon ug sa pag-ugmad ug relasyon uban kang Jehova maoy dako kaayong buluhaton. Ang artikulo nagpakita nga posible alang sa maong mga tawo ang pagkat-on nga mobati ug gugma ug pagsalig.
J. D., Canada
Ako usa ka Kristohanon sulod na sa 25 ka tuig karon. Ako nag-alagad nga matinumanon sa Diyos uban sa akong kinaadman, apan ang akong kasingkasing daw nabato na. Nagdako ako sa usa ka alkoholikong pamilya ug nag-antos sa mga pagbunal, seksuwal nga pag-abuso, ug ubang masakit nga kasinatian. Daghan kaayo ug nahimo si Jehova kanako, apan dili ako makabati ug gugma kaniya. Ang sugilanon ni Larry Rubin naghatag kanako ug diyutayng paglaom nga basin, basin na lang, usa ka adlaw niana makahimo ako sa paghilak bahin sa akong kagahapon ug mobati. Tingali mabatonan usab nako ang nabatonan ni Larry Rubin karon—gugma, pagsalig, ug pagdawat.
A. F., Tinipong Bansa
Ang pipila sa miaging mga sugilanon sa kinabuhi maoy mahitungod sa mga tawo nga morag gamhanang mga tawo—walay kahadlok, walay sulodnong panagbangi, walay kahuyangan. Ang sugilanon ni Larry Rubin giasoy gikan sa lahing anggulo. Siya madayganon ug nagyagyag sa iyang pribadong mga pagbati. Ang mga sugilanon sa kinabuhi nga ingon niini tinuod alang kanato tungod kay kini maoy bahin sa mga butang nga nahitabo sa atong kaugalingong mga kinabuhi.
F. D. S., Brazil
Rh Factor Tinuod gayod nga dalayegon kon sa unsang paagi gidumala sa Pagmata! ang maong kontrobersiyal nga mga ulohan. Sa artikulong “Ang ‘Rh Factor’ ug Ikaw” (Disyembre 8, 1994), ang gigamit nga paagi dili nianang sa relihiyosong panatiko. Ang ulohan gidumala uban sa siyentipikanhong katukma, nga nagagamit sa nunot-sa-panahong medikal nga mga termino, apan sa mga pulong nga tin-aw ug masabtan. Kini nagpanghimakak sa sumbong nga ang mga Saksi ni Jehova maoy dili-makataronganong mga panatiko nga walay pagpabili sa tawhanong kinabuhi.
I. R., Alemanya
Ako nagsabak, ug giingnan ako sa akong doktor nga nagkinahanglan ako ug indiyeksiyon aron dili ako makahimog mga antibody batok sa dugo sa akong bata. Wala akoy nahibaloan bahin sa Rh factor ug wala mosupak. Sa dihang sa ulahi akong nasayran nga ang indiyeksiyon hinimo sa dugo, ako nahadlok nga basin nakalapas ako sa balaod sa Diyos bahin sa dugo. Ang inyong artikulo nagtabang kanako pinaagi sa pagpatin-aw nga ang pagpaindiyeksiyon nag-agad lamang sa konsensiya.
C. W., Tinipong Bansa
Paghisgot Bahin sa Relihiyon Bisan tuod ako gimatuto ingong usa ka Kristohanon, ako maulaw kaayo sa bug-os nga pagpakig-ambit sa publikong buluhatong pagsangyaw, ilabina taliwala sa akong mga kauban sa eskuylahan. Ang tambag nga inyong gihatag sa artikulong “Mga Batan-on Nangutana . . . Nganong Maghisgot Bahin sa Diyos?” (Septiyembre 22, 1994) nagpahinumdom kanako sa pagkahinungdanon nianang buluhatona. Hinumdoman nako ug ipadapat ang inyong pagdasig aron mokuwalipikar ingong magtutudlo sa Pulong sa Diyos.
K. K., Nigeria
Ako nag-edad ug 12 anyos, ug sa pagkatinuod maulaw ako nga moingong ako usa sa mga Saksi ni Jehova. Ako nanghinaot nga ang akong mga kauban sa eskuylahan dili makakita kanako nga nagsangyaw sa kanataran. Ang artikulo nakatabang kanako sa pagsabot nga dili lang kay ako ra ang kinahanglang mosagubang niining sulirana, ug kini nakatabang kanako sa pagbuntog niining mga pagbatia sa kaulaw.
M. V. S., Brazil