“Dili Ko Kapugngan ang Akong mga Luha”

“Pipila ka yugto ang milabay, natapos ko pagbasa ang brosyur nga Sa Dihang ang Imong Minahal Mamatay, ug dili ko kapugngan ang akong mga luha.” Nganong si Alicia, nga usa ka Mexicana, naapektahan pag-ayo niining publikasyona? Siya mitubag: “Ang mga katin-awan ug ang mga kasinatian nga nalakip niini nagpahayag sa mga pagbati nga akong nabatonan sa dihang ang akong amahan namatay siyam ka tuig kanhi ug sa dihang nakuhaan ako mga 18 ka bulan kanhi.”

Unsay ilabinang nakatabang kaniya sa iyang kagul-anan? Ang kahon nga nag-ulohang “Pagkanakuhaan ug Pagpanganak ug Patayng-Daan​—Mga Inahan Naguol” ug ang mga bahin nga “Sa Unsang Paagi Masagubang Ko ang Akong Kasubo?” ug “Sa Unsang Paagi Makatabang ang Uban?”

Si Alicia misulat usab: “Ang asoy mahitungod sa pagkabanhaw ni Lasaro makapatandog kaayo ug nagpalig-on sa tataw nga paagi sa akong pagtuo sa pagkabanhaw.”​—Juan 5:​28, 29.

Kon buot nimong makadawat ug kopya niining makapadasig nga 32-panid nga brosyur, palihog pagsulat sa mga Saksi ni Jehova sa Watch Tower, P.O. Box 2044, 1099 Manila, o sa tukmang direksiyon nga nalista sa panid 5.