Aduna ba Unyay Igong Tubig?
“Duha ka porsiento lamang sa tibuok nga gidaghanon sa tubig sa Yuta ang tab-ang, ug 2/3 nianang mainom nga abiyo nabagtok sa mga dapit sa polo ug kayelohan, nga nagbilin ug [menos sa] 1% nga likido, tab-ang nga tubig.”—Research and Exploration, publikasyon sa National Geographic.
ADUNA ka bay mainom nga tubig sa gripo diha sa imong balay? Nan lakip ka sa mas bulahang mga tawo. Minilyong tawo ang kinahanglang magkalos sa ilang tubig, kasagaran daghang milya ang gilay-on—ug unya kasagaran dili pa mainom. Ang uban kinahanglang magtigom diha sa publikong mga gripo o sa mga trak aron mokuhag diyutayng rasyon sa bililhong likido. Ang Research and Exploration nag-ingon: “Sa dihang modaghan ang mga tawo, ang mga suliran sa paggamit ug pagdumala sa tubig mouswag. Kining mga sulirana mas grabe pa sa nagaugmad nga mga kalibotan, diin mga 1 ka bilyong tawo ang nalisdan o imposibleng makabaton ug mainom nga tubig.” Kana nagkahulogan nga halos 1 sa 5 sa populasyon sa kalibotan ang adunay grabeng mga suliran sa pagpangitag magamit nga tubig.
Ang mga binhi sa umaabot nga mga panagbangi gisugdan na pagpugas niining kakulang sa tubig. Usa ka eksperto ang miingon: “Ang nagauswag nga dakong gidaghanon sa mga tawo dili makapauswag sa ilang kinabuhi, nga magapuyo sa mga barongbarong diin ang mga paningkamot nga mabuntog ang kakabos, kapakyasan sa kultura, ug etnikong panag-away mapakyas tungod sa kakulang sa mainom nga tubig, yuta nga matikad, ug dapit nga kapuy-an.”
Unsay mahimo sa matag usa kanato sa paggamit nga maalamon niining bililhong kahinguhaan sa maalamong paagi? Daginota kana ug ampingi—kini bililhon ug may kinutoban.
1) Ayawg usiki ang tubig. Ayaw pasagdi nga magpadayon pag-agas ang mga gripo nga wala kinahanglana—sama sa dihang nagsipilyo sa ngipon o namarbas. Ayaw pagdugay diha sa shower—kon ugaling ikaw bulahan nga may shower!
2) Ayawg hugawi ang tubig. Kon ang hugaw nga suba o sapa moagos duol sa imong gipuy-an, adunay usa sa ibabaw nga bahin niana ang nagdaot sa hinungdanong kutay sa kinabuhi sa inyong katilingban. Kasagaran ang manubag pag-ayo niining maong polusyon mao ang mga awtoridad sa siyudad, mga industriyalista, mga mag-uuma, ug uban pa nga tingali nagtugot sa wala-maproseso nga mga basura ug kemikal nga mga produkto nga moagos o moawas ngadto sa mga sapa ug mga suba.
Ang Diyos, ingong Maglalalang ug Tag-iya sa yuta, may katungod nga makighusay sa paagi nga gigamit nato ang atong planeta. Ang Bibliya nagtagna nga si Jehova sa pagkatinuod ‘magalaglag niadtong mga nagalaglag sa yuta.’—Pinadayag 11:18.