Unsay Giingon sa Bibliya Bahin sa Tibuok Kalibotang Krisis sa Tubig?
Kitang tanan nanginahanglag hinlong tubig aron mabuhi. Pero “kay nagkadaghan ang nanginahanglan ug tubig sa tibuok kalibotan, nag-atubang ta ug grabeng krisis sa tubig,” miingon ang UN Secretary-General nga si António Guterres. Binilyong tawo sa tibuok kalibotan ang naglisod na sa pagpangitag tubig nga mainom.
Strdel/AFP via Getty Images
Naa pa ba tay igong tubig para sa tanan? O kanunay na lang ba tang mag-atubang ug krisis sa tubig? Unsay giingon sa Bibliya?
Kon unsay gisaad sa Bibliya bahin sa suplay sa tubig
Ang Bibliya nag-ingon nga wala na unyay kanihit sa tubig. Hinuon, abunda na unya sa hinlong tubig.
“Mobugwak ang katubigan sa kamingawan, ug ang mga sapa sa desyertong kapatagan. Ang yuta nga napagba sa kainit mahimong linaw nga punog tangbo, ug ang uhaw nga yuta mahimong mga tubod sa tubig.”—Isaias 35:6, 7.
Nganong makatuo ta ana nga saad sa Bibliya? Konsideraha kon unsay giingon sa Bibliya bahin sa pagkadisenyo sa atong planeta.
Kon unsay giingon sa Bibliya bahin sa yuta ug sa water cycle
“[Ang Diyos] wala maglalang [sa yuta] sa wala lamay kapuslanan, apan nag-umol niini aron puy-an.”—Isaias 45:18.
Kay gihimo sa Diyos ang yuta aron makasuportar ug kinabuhi, nagdisenyo siyag natural nga mga proseso aron naay abunda nga hinlong tubig.
“Ipasaka [sa Diyos] ang mga tinulo sa tubig; dayon kini mahimong gabon ug ulan; unya ang mga panganod magbubo niini; kini moulan nganha sa katawhan.”—Job 36:27, 28.
Sa ato pa, nagdisenyo ang Diyos ug natural nga proseso aron maseguro nga ma-recycle ang tubig ug naay igong suplay niini. Ang tubig gikan sa yuta ug dagat mosaka, moalisngaw, ug dayon mahimong ulan. Maseguro niini nga proseso nga dili mahutdag suplay sa hinlong tubig ang mga tawo ug hayop.—Ecclesiastes 1:7; Amos 5:8.
“Hatagan mo nakog ulan sa hustong panahon, ug ang yuta maghatag sa iyang abot, ug ang mga kahoy sa kapatagan mamunga.”—Levitico 26:4.
Gisaaran sa Diyos ug abundang abot ang mga Israelinhon kaniadto, nga kasagaran mga mag-uuma, pinaagi sa paghatag kanila ug regular nga suplay sa tubig. Nahibalo ang Diyos nga importante gyod ang ulan aron naa silay maani ug makaon.
Ang gihimo sa Diyos sa karaang nasod sa Israel iya pod unyang himoon sa tibuok kalibotan. (Isaias 30:23) Pero sa pagkakaron, nagkagrabe ang krisis sa tubig sa daghang lugar sa kalibotan. Ug apil na sa problema ang panagsa lang nga pag-ulan o kaha wala gyoy ulan. Unsa pay giingon sa Bibliya bahin sa solusyon sa problema karon sa tubig?
Kon sa unsang paagi matapos ang krisis sa tubig
Ang Bibliya nag-ingon nga ang Diyos, pinaagi sa iyang Gingharian, magsulbad sa mga problema nga nakaapektar sa atong planeta, apil na ang krisis karon sa tubig. (Mateo 6:9, 10) Ang Gingharian sa Diyos maoy gobyerno sa langit nga magmando sa tibuok yuta. (Daniel 2:44; Pinadayag 11:15) Dugang pa, sulbaron sa Gingharian sa Diyos ang dili kayang sulbaron sa tanang gobyerno sa tawo. Wagtangon niini ang mga hinungdan sa atong problema sa tubig.
Problema: Ang climate change maoy usa sa mga hinungdan nga dili balanse ang water cycle. Miresulta nig grabeng mga hulaw ug pagbaha tungod sa grabeng pag-ulan o pagsaka sa lebel sa dagat.
Solusyon: Ayohon sa Gingharian sa Diyos ang kadaot sa atong kinaiyahan aron ang atong planeta maulian. Ang Diyos nagsaad: “Tan-awa! Ginabag-o nako ang tanang butang.” (Pinadayag 21:5) Ang uga nga mga yuta abunda na unya sa hinlong tubig nga magpaposible sa mga tanom sa pagtubo bisag sa mga lugar nga dili na kapuy-an karon. (Isaias 41:17-20) Ang Gingharian sa Diyos, ubos sa pagmando ni Jesu-Kristo, magkontrol sa puwersa sa kinaiyahan.
Sa dinhi pa si Jesus sa yuta, dali ra niyang gipahunong ang kusog kaayo nga unos nga nagpakita sa gahom nga gihatag sa Diyos kaniya. (Marcos 4:39, 41) Ubos sa pagmando sa Kristo ingong hari sa Gingharian sa Diyos, wala nay kalamidad. Mabatonan sa mga tawo ang tinuod nga kalinaw ug kasegurohan nga dili mahadlok sa bisan unsang kalamidad.
Problema: Ang hakog nga mga kompaniya ug mga tawo nga wala maghunahuna sa resulta sa ilang binuhatan naghugaw sa mga suba, linaw, ug sa pondohanag tubig ilalom sa yuta, mao nga gamay na lang ang hinlong tubig.
Solusyon: Hinloan sa Diyos ang atong planeta ug ipaposible niya nga maulian ang mga suba, linaw, kadagatan, ug yuta. Ang atong planeta mahimong paraiso. Gani, nindot kaayo ang giingon sa Bibliya: “Ang kamingawan ug ang umaw nga yuta magsadya, ug ang desyertong kapatagan magkalipay ug mamulak sama sa safron.”—Isaias 35:1.
Pero unsa may mahitabo niadtong mga tawo nga nagdaot sa atong planeta ug sa ubang mga tawo? Ang Diyos nagsaad nga iyang wad-on o ‘laglagon ang mga nagadaot sa yuta.’—Pinadayag 11:18, footnote; Proverbio 2:21, 22.
Problema: Giusikan sa mga tawo ang tubig, maong mas paspas mahurot ang suplay sa tubig.
Solusyon: Pinaagi sa Gingharian, ang kabubut-on sa Diyos—dili ang kabubut-on sa hakog nga mga tawo—’matuman dinhi sa yuta.’ (Mateo 6:9, 10) Ang Gingharian sa Diyos maghatag sa mga tawo sa pinakamaayong edukasyon. Ang Isaias 11:9a nag-ingon: “Ang yuta mapuno gayod sa kahibalo bahin kang Jehova.” Tungod niining labaw kaayo nga kahibalo, ug tungod sab sa lawom nga gugma nila sa Diyos ug sa tanan niyang gihimo, maatiman na pag-ayo sa mga tawo ang atong nindot nga planeta ug ang mga butang diha niini.
Para sa dugang impormasyon kon unsay himoon sa Gingharian sa Diyos, tan-awa ang artikulong “Unsay Himoon sa Gingharian sa Diyos?”
Diha sa Bibliya, basaha ang Isaias kapitulo 35 aron imong mahibaloan kon sa unsang paagi ang yuta mahimong paraiso.
Aron makahibalo kag dugang kon unsay gustong himoon sa Diyos para sa yuta ug sa mga tawo, tan-awa ang video nga Nganong Gilalang sa Diyos ang Yuta?
a Jehova ang personal nga ngalan sa Diyos. (Salmo 83:18) Tan-awa ang artikulong “Kinsa si Jehova?”