Ang mga Siyentipiko Nagpagula ug Pasidaan

“ANG mga tawo ug ang kinaiyanhong kalibotan nagapadulong sa pagkabangga. . . . Pipila na lang ka dekada ang nahibilin una ang purohan sa pagsumpo sa mga hulga [sa kalikopan] mahanaw.”

Kining maong pasidaan, nga gipagula sa UCS (Union of Concerned Scientists), gipatik sa Annals, usa ka Canadianhong medikal nga magasin. Kon ang nagahulga-sa-kinabuhi nga mga batasan sa tawo magpadayon, ang taho midugang, kini “mahimong mag-usab pag-ayo sa kalibotan nga dili na kini makapatunhay sa kinabuhi sa paagi nga atong nasayran.”

Ang pipila sa mga butang nga gihisgotan taliwala sa dinaliang mga suliran nga kinahanglang tagdon mao ang pagkaut-ot sa ozone; paghugaw sa tubig; pagkaupaw sa kalasangan; pagkadagol sa yuta; ug ang pagkapuo sa mga espesye, nga sa tuig 2100 mahimong mag-apil sa ikatulong bahin sa tanang espesye nga buhi karon. “Ang atong pagpanghilabot sa nagsaligay nga kutay sa kinabuhi,” matod sa UCS, “makapahinabog kaylap nga mga epekto, lakip ang pagkahugno sa biolohikanhong mga sistema kansang mga paagi sa pagtubo dili nato bug-os nga masabtan.”

Ang mga kabalaka sa UCS gipalig-on sa kapin sa 1,600 ka siyentipiko sa tibuok kalibotan, lakip sa 104 ka mananaog sa Premyong Nobel. Sumala sa UCS, “kining tigulang nga mga membro sa siyentipikanhong katilingban sa kalibotan nagpasidaan sa tanang katawhan nga ang usa ka kausaban sa atong pagdumala sa yuta gikinahanglan aron malikayan ang dakong kagul-anan sa tawo.”

Ang Bibliya miuyon nga ang tawo sa pagkatinuod “nagalaglag sa yuta.” (Pinadayag 11:18) Nag-ila pa kini nga ang kausaban sa pagdumala sa kalibotan gikinahanglan. (Jeremias 10:23; Daniel 2:44) Sa pagkatinuod, ang Bibliya nagsaad nga ang maong kausaban mahitabo, dili pinaagi sa mga paningkamot sa tawo, kondili pinaagi sa Gingharian sa Diyos, ang langitnong kagamhanan nga gitudlo ni Jesus nga iampo sa iyang mga sumusunod.​—Salmo 145:16; Isaias 11:​1-9; Mateo 6:​9, 10.

[Picture Credit Line sa panid 31]

Letrato: Godo-​Foto