Ang Yuta—Gasa sa Diyos Kanato
“SA SINUGDAN gilalang sa Diyos ang mga langit ug ang yuta.” Siya nagpahayag usab nga ang yuta “maayo kaayo.” (Genesis 1:1, 31) Walay nagtambak nga basura nga nagdaot sa katahom niana; walay mga basurahan nga naghugaw niana. Usa ka matahom nga gasa ang gihatag alang sa katawhan: “Mahitungod sa mga langit, iyaha ni Jehova ang mga langit, apan ang yuta gihatag niya sa mga anak sa mga tawo.”—Salmo 115:16.
Diha sa Isaias 45:18, gipahayag niya ang iyang katuyoan alang sa yuta: “Kini mao ang giingon ni Jehova, ang Maglalalang sa mga langit, Siya ang matuod nga Diyos, ang Mag-uumol sa yuta ug ang Magbubuhat niana, Siya ang Usa nga malig-ong nagtukod niana, nga wala maglalang niana nga walay kapuslanan, nga nag-umol niana aron pagapuy-an: ‘Ako si Jehova, ug wala nay lain.’”
Espesipikong gipakita niya kon unsay kaakohan sa tawo nganha sa yuta—“aron tikaron ug atimanon kini.”—Genesis 2:15.
Si Jehova nagpakitag panig-ingnan. Ginaatiman niya ang yuta. Ang usa ka paagi mao ang pagresiklo sa importanteng mga tagana sa yuta, ang mga butang nga niana nagadepende ang tanang kinabuhi sa yuta. Usa ka linaing isyu sa Scientific American may mga artikulo bahin sa ubay-ubay niining mga sikloha, nga naglakip sa siklo sa enerhiya sa yuta, sa siklo sa enerhiya sa biosphere, sa siklo sa tubig, sa siklo sa oksihena, sa siklo sa karbon, sa siklo sa nitrohena, ug sa mga siklo sa mineral.
Ang Yuta—Katingalahan ug Matahom
Ang gibantog kaayong biyologo nga si Lewis Thomas, diha sa magasin sa siyensiya nga Discover, misulat niining walay-kutokuto nga pagdayeg sa yuta:
“Ang katingalahan kaayo, ang katingad-ang gambalay nga atong nahibaloan hangtod karon sa tibuok uniberso, ang kinadak-an sa tanang mga gumonhap sa siyensiya labot sa kahusay sa uniberso, nga nagpakawang sa tanan natong mga paningkamot sa pagsabot niini, mao ang yuta. Kita nagsugod lamang karon sa pagkasabot sa kahulogan kon unsa kini ka katingad-anan ug kamaanindot, kon unsa kini ka makapahingangha, ang kinatahomang butang nga naglutaw palibot sa adlaw, nga naliminan sa kaugalingong asul nga bula sa atmospera, nagagama ug nagahanggab sa kaugalingong oksihena niini, nagaayo sa kaugalingong nitrohena niini gikan sa hangin ngadto sa kaugalingong yuta niini, nagapatunghag kaugalingong klima niini sa ibabaw sa bagang kalasangan niini, nagatukod ug gahing tabon niini gikan sa buhing mga bahin: mga pangpang nga tisa, katakotan, mga fossil gikan sa unang mga porma sa kinabuhi nga karon natabonan sa mga lut-od sa bag-ong kinabuhi nga nasalapid sa palibot sa globo.”
Kini maoy pipila lamang sa mga tagana nga gipahimutang ni Jehova sa paghupot sa yutang nagalihok ingong usa ka matahom nga gasa alang sa katawhan, usa ka pinuy-anang gilalang nga molahutay hangtod sa kahangtoran alang sa katawhan ug sa di-maihap nga minilyong ubang buhing mga linalang. Ang Salmo 104:5 nag-ingon: “Gitukod niya ang yuta diha sa lig-ong mga dapit niini; kini gibuhat nga dili matarog hangtod sa panahong walay katinoan, o sa walay kataposan.” Ang laing dinasig nga saksi nagpamatuod sa samang pagkapermanente sa yuta: “Usa ka kaliwatan moagi, ug laing kaliwatan moabot; apan ang yuta mopabilin bisan hangtod sa panahong walay katinoan.”—Ecclesiastes 1:4.
Ang mga astronot nga naglibot sa yuta nahimong balaknon bahin niining matahom, talandogong planeta nga naglawig sa tuyokanan niini libot sa adlaw ug nakapahayag sa panginahanglan sa katawhan sa pag-apresyar sa katahom niini ug sa pag-atiman niini. Ang astronot nga si Edgar Mitchell, sa dihang una niyang nakita ang yuta gikan sa wanang, nagradyo sa Houston: “Kini samag usa ka magilakong asul ug puting mutya . . . nga naengkahean ug hinayhinayng nagtuyok nga puting mga belo . . . , samag gamayng perlas diha sa mabagang itom nga dagat sa misteryo.” Ang komento ni astronot Frank Borman mao: “Atong giambitan kining maong matahom nga planeta. . . . Ang dakong katingalahan mao nga kon nganong dili kita makapabili sa atong nabatonan.” Usa sa mga astronot sa Apollo 8 nga milibot sa bulan mikomento: “Sa tibuok uniberso, bisan asa kita motan-aw, ang may bulok lamang mao ang yuta. Didto atong makita ang lutong asul nga kadagatan, ang tabonon ug brawon nga kayutaan, ug ang puting mga panganod. . . . Kadto mao ang labing matahom nga butang nga makita, sa tibuok kalangitan. Ang mga tawo dinhi wala masayod kon unsay ilang nabatonan.”
Ang mga kamatuoran nagpakita nga tinuod kana nga pahayag—ang mga tawo wala masayod sa bahandi nga ilang nabatonan. Imbes atimanon kining gasaha nga gikan sa Diyos, ang katawhan nagahugaw ug nagadaot niini. Nakita usab kini sa mga astronot. Si Paul Weitz, ang komander sa unang panaw sa salakwanang nga Challenger, miingon nga ang kadaot nga nahimo sa tawo sa atmospera sa yuta “makalilisang” kon tan-awon gikan sa wanang. “Ikasubo, kini nga planeta paspas nga nahimong usa ka abohon nga planeta.” Siya midugang pa: “Unsa ang mensahe? Atong ginahugawan ang atong kaugalingong pinuy-anan.” Ug kining maong pagdaot ilabinang misamot nga makalilisang niining “kataposang mga adlaw.” Gipahayag ni Jehova ang iyang paghukom batok niadtong nagdaot sa yuta, nga mao, nga siya ‘magdala ngadto sa kagun-oban niadtong mga nagagun-ob sa yuta.’—Pinadayag 11:18.
Usa ka Walay-Utang-Kabubut-on nga Katilingban nga Dili-Takos sa Gasa sa Diyos
Giyatakan sa materyalistikanhong katilingban ang espirituwal nga mga sukdanan aron mapatuyangan ang tinguha sa unod. Ang praktikal nga mga giya nga gihatag ni Jehova sa katawhan alang sa malipayon ug kontentong pagkinabuhi gisalikway tungod sa pagpangibabaw sa hakog nga pagkamakiako nga maoy kinaiya sa atong panahon.
Ang 2 Timoteo 3:1-5 bug-os nga nagbatbat sa makuyawng mga panahon nga atong gikinabuhian: “Hibaloi kini, nga sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos, managbaton ug dagway sa diyosnong pagkamahinalaron apan nagapanghimakak sa gahom niini; ug gikan niini nila magpahilayo ka.”
Ang komersiyalismo nagdasig sa pagpamalit, ug ang paanunsiyo maoy galamiton niini. Daghang paanunsiyo maayo; daghan dili. Ang ulahi haom sa obserbasyon ni Eric Clark diha sa The Want Makers: “Dili lamang kay nakatabang ang paanunsiyo sa pagbaligyag dili maayong mga butang ngadto sa mga tawong dili makaabot niana, kini sagad nagbuhat niana sa mga prisyo nga sagad sobra ka mahal.” Miingon si Alan Durning diha sa World Watch: “Ang mga tigpaanunsiyo namaligya dili sa mga produkto kondili sa mga estilo-sa-kinabuhi, mga tinamdan, ug mga handurawan, nga naglangkit sa ilang mga baligya sa walay kataposang mga pangandoy sa kalag.” Ang tumong sa paanunsiyo mao ang paghimo kanatong walay katagbawan sa kon unsay atong nabatonan ug tinguhaon ang wala nato kinahanglana. Makamugna kinig dili-matagbaw nga gana; kini motultol sa makadaot nga sobrang pagpamalit; kini nagmugnag kusog nga pagtambak sa mga basura nga maghugaw sa yuta. Kini hinayhinay ug malimbongong mosulod bisan sa nangaluyang mga kasingkasing niadtong nagkinabuhi sa walay paglaom nga kakabos. Daghang tigpaanunsiyo agresibong namaligyag mga baligya nga nahibaloang makamatay o makahatag ug sakit sa mga tawo.
Ang hinungdanon mao ang atong baroganan sa Diyos, sama sa giingon sa Ecclesiastes 12:13: “Ang kataposan sa butang, ang tanan nadungog na, nga mao: Kahadloki ang matuod nga Diyos ug tumana ang iyang mga sugo. Kay kini mao ang tibuok nga katungdanan sa tawo.” Kadtong nagabuhat niana makuwalipikar alang sa kinabuhi diha sa mahinlo nga Paraiso ni Jehova! Si Jesus misaad: “Ayaw kahibulong niini, tungod kay ang takna nagasingabot diin kadtong tanan nga anaa sa handomanang mga lubnganan makadungog sa iyang tingog ug managpanggula, kadtong mga nagbuhat ug maayong mga butang ngadto sa pagkabanhaw sa kinabuhi, kadtong mga nagbuhat ug ngil-ad nga mga butang ngadto sa pagkabanhaw sa paghukom.”—Juan 5:28, 29.
Dihang Pabilhan Unya ang Gasa sa Diyos
Ug pagkadili-katuohan sa pagkaanindot nga yuta unya kana! Gihatagan kita ni Jehova ug makapahinganghang kabatbatan bahin niana: “Nakita ko [Juan] ang usa ka bag-ong langit ug usa ka bag-ong yuta; kay ang kanhing langit ug ang kanhing yuta nahanaw na man, ug ang dagat wala na. Iyang [Diyos] pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Pinadayag 21:1, 4.
Mahanaw usab unya ang maong kanhing mga butang sama sa tambak nga mga basura, makahilong mga biya, ug kadtong naglabay sa ilang mga basura pinaagi sa pagtambak niana diha sa uban. Dayon ang mga tawo nga mabuhi lamang sa yuta mao unya kadtong nahigugma sa ilang mga silingan sama sa ilang kaugalingon, kinsa nagadayeg kang Jehova tungod sa iyang gasa sa yuta, ug kinsa malipay sa pag-atiman ug pag-amping niana sa paraisonhong kahimtang.—Mateo 22:37, 38; 2 Pedro 3:13.
[Kahon sa panid 11]
Ang Pagkakawang sa Materyalismo
Gisulti ni Jesus ang prangkang kamatuoran sa dihang siya nagpasidaan: “Pabiling bukha ang inyong mga mata ug pagbantay batok sa tanang matang sa hakog nga kaibog, tungod kay bisag adunay kadagaya ang usa ka tawo ang iyang kinabuhi wala magagikan sa mga butang nga iyang gipanag-iya.” (Lucas 12:15) Dili importante kon unsa ang atong nabatonan; ang importante mao ang kon unsa kita. Dali ra kaayong malinga sa okupadong kinabuhi—ang pagpangitag salapi, ang pagtigom ug mga butang, ang dinalidaling pagkab-ot sa tanang kalipay nga gipangandoy sa unod—ug sa paghunahunang kita nagpahimulos sa kinabuhi sa bug-os, nga walay gisayloan, sa dihang nasayloan tingali nato ang kinamaayohan nga ikatanyag sa kinabuhi.
Makaamgo lamang kita kon unsa ang atong nasayloan sa dihang nagkaupos na ang kinabuhi. Nahibalo kita sa kamatuoran bahin sa gisulti sa Bibliya: Ang kinabuhi mubo kaayo—usa ka gabon nga mawagtang, usa ka buga sa aso, usa ka gininhawa, usa ka anino nga moagi, lunhawng sagbot nga malaya, usa ka bulak nga malawos. Diin kini paingon? Unsay atong nahimo? Nganong kita ania dinhi? Mao ba lamang kini? Kakawangan sa tanang kakawangan, usa ka pag-agpas sa hangin?—Job 14:2; Salmo 102:3, 11; 103:15, 16; 144:4; Isaias 40:7; Santiago 4:14.
Usa ka tawo sa ospital, nga himalatyon, nagtan-aw sa gawas sa bintana, nakakita sa bungtod nga nadan-agan sa mainit nga silaw sa adlaw, sa nagkadaiyang sagbot ug balili, sa pipila ka naningkamot nga mga bulak, sa maya nga nangakha sa yuta nga nangitag pipila ka liso—dili kaayo maanindot nga talan-awon nga makatukbil sa galamhan. Apan alang sa tawong himalatyon, kini maanindot. Ang makapasubong pangandoy nakatandog kaniya, sa pagpalandong sa yanong kalipay nga iyang nasayloan, ang gagmayng mga butang nga hinungdanon kaayo. Ang tanan sa dili madugay mahanaw!
Yanong gipadayag kini sa Gregong Kasulatan sa Bibliya: “Wala kitay gidalang bisan unsa nganhi sa kalibotan, ug ni kita makadala ug bisan unsa pagawas. Busa, nga may makaon ug ikasapot, kita makontento na niining mga butanga.” (1 Timoteo 6:7, 8) Mas direktang gipadayag kini sa Hebreohanong Kasulatan: “Ingon sa iyang paggula gikan sa tagoangkan sa iyang inahan, hubo siya nga mopauli pag-usab, ingon sa iyang paggula; ug walay madala bisan unsa sa iyang kabudlay, nga madala unta niya sa iyang kamot.”—Ecclesiastes 5:15.
[Picture Credit Line sa panid 8]
Letrato sa NASA