“Pagpangita sa Kinalabwang Sinati-sa-Arte”
Mao kana ang ulohan sa Pagmata! sa Nobyembre 8, 1995. Ang mga magbabasa sa tibuok kalibotan adunay maayong reaksiyon sa maong ulohan.
Si Amang misulat gikan sa Douala, Cameroon: “Ang mga artikulo adunay dakong epekto kanako tungod kay ako mahiligon sa arte, ilabina sa maayong mga dibuho. Karon akong giapresyar nga adunay Sinati-sa-Arte nga labaw pa kay kang Van Gogh, Rembrandt, Da Vinci, ug uban pa—walay lain gawas kang Jehova nga Diyos mismo.”
Gikan sa St. Barthélemy, sa Pranses nga West Indies, si Frederick miingon: “Kaupat nako kana gibasa, ug matag higayon ako matugob sa pagpasalamat tungod sa matahom nga mga butang nga gihatag sa atong Maglalalang kanato.”
Si Assunta misulat gikan sa Italya: “Kini nagpukaw sa akong tinguha sa pagdibuho. Kini nagpadulot sa akong kadasig alang sa bag-ong kalibotan sa Diyos.” Ug si Irena, nga taga-Republika sa Czech, miingon: “Sa dihang kita moduaw sa mga museyo, kinahanglan kitang mobayad aron makakita sa mga buhat sa arte, samtang ang Maglalalang sa tanang kinaiyanhong katahom nagtanyag niana kanato nga libre, kada adlaw.” Si Aline misulat gikan sa Brazil: “Bisan tuod kanunay kitang may mga artikulo sa pagtabang kanato sa pag-apresyar sa personalidad ni Jehova, kini nakatandog sa akong kasingkasing. Kini naghatag ug daghang detalye mahitungod sa kalalangan nga magpalambo sa atong apresasyon sa gugma ni Jehova.”
Gikan sa mabugnaw kaayong Wisconsin, T.B.A., si Anne misulat: “Kini nagtabang kanako sa pag-apresyar sa katahom sa kalalangan. Usahay sa tingtugnaw lisod kana nga makaplagan. Sa samang adlaw nga akong gibasa ang artikulo, ako migawas ug mitan-aw sa niyebe diha sa usa ka sanga, usa ka dahon nga natabonan sa niyebe, mga tunob sa mananap diha sa niyebe. Salamat sa makausa pa sa pahinumdom kon sa unsang paagi maapresyar nato ‘ang Kinalabwang Sinati-sa-Arte.’”
Kon buot nimong makadawat nga regular niining magasina, palihog kontaka ang mga Saksi ni Jehova sa inyong silinganan o pagsulat ngadto sa kinadul-ang adres nga nalista sa panid 5.