Kon Unsay Mahimo sa mga “Tract” sa Bibliya

Sa siyudad sa Golitsino, duol sa Moscow, Rusya, usa sa mga Saksi ni Jehova ang mihatag sa tract nga Magkalipay sa Kinabuhing Pamilyahanon sa usa ka babaye nga nagtulod ug karetilya sa bata. Ang Saksi padayon nga naglakaw, apan sa wala madugay iyang nadunggan ang babaye nga mitawag sa pagkuha sa iyang pagtagad. Midagan siya aron maapsan ang Saksi, samtang nagtulod sa iyang karetilya sa bata.

Ang babaye miingon nga interesado siya sa pagkat-on ug dugang, busa ang Saksi mihatag kaniya ug duha pa ka tract nga dunay mga topiko sa Bibliya. Gihatag usab niya ang iyang numero sa telepono aron makontak siya sa ulahi. Mitawag ang babaye nianang gabhiona ug may gihimong mga kahikayan aron makabaton siya ug pagtuon sa Bibliya kada semana. Sa sulod lamang sa pito ka bulan, siya ug ang iyang igsoong babaye naghimog pagpahinungod sa pag-alagad sa Diyos ug nabawtismohan.

Kon buot mong mobasa sa mga tract sa Bibliya nga Magkalipay sa Kinabuhing Pamilyahanon, Kahupayan Alang sa Naluya, Kinsa Gayod ang Nagamando sa Kalibotan?, ug Kinabuhi sa Malinawong Bag-ong Kalibotan, palihog pagsulat sa Watch Tower, P.O. Box 2044, 1060 Manila, o sa kinadul-ang adres nga gilista sa panid 5.