Kinsa ang Ginikanan? Kinsa ang Anak?

USA ka sikologo sa California, T.B.A., ang nagpadayag ug kabalaka sa gidak-on sa pagkunhod sa awtoridad sa ginikanan niining dili pa dugayng katuigan. “Sa akong opisina,” siya nagsulat, “akong nasaksihan ang dili maihap nga mga diskusyon tali sa mga ginikanan ug mga anak nga gihimo nga morag tali sa duha ka hamtong, dili sa usa ka anak ug usa ka ginikanan. Ang komplikadong mga pagpakigsabot nga gihimo sa kinadak-an natong mga korporasyon gihimo maylabot sa tanang butang gikan sa oras nga ikatulog ngadto sa alawans ngadto sa mga buluhaton sa panimalay. Usahay lisod mailhan kon kinsa ang ginikanan ug kinsa ang anak.”

Ang Bibliya nagtaganag timbang nga tambag para sa mga ginikanan. Nagpasidaan kini bahin sa kapeligrohan sa labihan nga pagkaestrikto nga makapalagot sa ilang anak, tingalig maghimo sa bata nga magul-anon ug maminghoy. (Colosas 3:21) Apan nagpasidaan usab kini sa mga ginikanan batok sa laing paghingapin​—ang sobrang pagkamatugtanon, nga magbiya sa ilang awtoridad. Ang Proverbio 29:15 nag-ingon: “Ang usa ka bata nga pasagdan lamang sa iyang kaugalingon magapakaulaw sa iyang inahan.” Ang laing panultihon sa Bibliya nagkanayon: “Kadtong magpalabi sa pagpangga sa iyang sulugoon gikan sa pagkabata, magahimo kaniya nga dili mapasalamaton sa kataposan.” (Proverbio 29:21) Bisan pag kini nga kasulatan nagtumong sa usa ka sulugoon, ang prinsipyo tukma usab nga mapadapat sa kabataan.

Ang mga ginikanan nga maghikaw sa ilang mga anak sa kinahanglanong paggiya ug disiplina moantos sa seryosong mga sangpotanan sa ulahi​—usa ka panimalay nga dili madumala. Mas maayo gayod nga ipadapat ang tambag sa Bibliya! Tinuod, ang pagbuhat sa ingon nanginahanglan ug paningkamot, apan makahatag kini ug tibuok-kinabuhing mga kapuslanan. Ang Bibliya nag-ingon: “Bansaya ang bata diha sa dalan nga iyang pagalaktan; bisan kon siya matigulang na siya dili mobiya gikan niana.”​—Proverbio 22:6.