Kanus-a man nga ang Putyukan Dili Putyukan?

Puliki kaayo ang mga kinabuhi sa mga putyukan, nga mobisita sa ginatosgatos ka bulak kada adlaw ug magdalag nektar ngadto sa balayan sa putyukan. Inig-abot sa tingpamulak, ang laking mga putyukan mangitag kapikas. Alang niini, mosalig sila sa panan-aw ug panimhot. Ugaling, ang pagtagad sa putyukang mubog panan-aw gitinguha usab sa talagsaong tigpangulitawo​—ang orkid.

Sa habagatang Uropa, adunay ubay-ubayng ihalas nga mga orkid kansang pertilisasyon nagdepende sa ilang pagsundog sa bayeng mga putyukan. Ang maong mga orkid kinahanglang magpadalag “parsela” sa malo ngadto sa isigka-orkid. Ang mga putyukan mao ang labing maayong mga magdadala. Apan sanglit ang mga orkid walay lamiang nektar aron pagdani sa mga putyukan, ang mga orkid kinahanglang mogamit ug panglansis, ingnon ta. Ug ang panglansis mao nga ang dagway ug baho sa bulak mahisama gayod sa bayeng putyukan nga ang laking putyukan mosulay sa pagpakigsanay niini! Ang matag espisye sa maong mga orkid adunay kaugalingong takoban ug baho.

Inigkaamgo sa putyukan sa iyang sayop, ang orkid nakabutang nag hagkot nga parsela sa malo diha sa iyang lawas. Unya ang putyukan molupad, nga unya hilimbongan na usab sa laing orkid, nga maoy makadawat sa malo. Human sa ubay-ubayng ingon nga mga panglansis, ang putyukan makaamgo nga ang maong mga orkid dili angayng saligan. Sa maong panahon, lagmit nga iya nang namalohan ang pipila ka bulak.

Sa unsang paagi kining walay-pangisip nga mga orkid nakabaton sa angayng baho ug dagway aron paglansis sa mga putyukan? Ang maong talagsaong mga mekanismo nagpamatuod sa usa ka intelihenteng Tigdesinyo, kansang kalalangan dili gayod mapakyas sa pagpahingangha ug paglingaw.