Gikan sa Among mga Magbabasa

Bagang Lasang sa Amazon Ako nakadayeg pag-ayo sa serye sa mga artikulong “Ang Bagang Lasang sa Amazon​—Mga Tumotumo ug mga Kamatuoran.” (Marso 22, 1997) Ingong usa ka ekolohista sa tanom sa Forest Service sa T.B., kinahanglan kong tun-an ang daghang literatura bahin sa kalikopan. Bisan pa, giisip ko ang inyong artikulo nga mao ang kinamaayohan nga akong nabasa sukad bahin sa ulohan. Maayo kaayo kini nga pagkatuki, matulon-anon, ug tukma-sa-panahon, ug kahimut-anan gayod ang pagbasa niini. Makapalipay alang nako nga makasabot sa mga ideya sama sa panagkadaiya sa kalalangan, ekstraksiyon, pagkunhod sa kalasangan, ug sistema sa ekolohiya nga makita diha sa usa ka magasin nga may ingon ka kaylap internasyonal nga pag-apod-apod. Kini magpaarang-arang sa mga kahimtang.

D. S., Tinipong Bansa

Ako 12 anyos, ug buot kong ipahayag ang akong kinasingkasing nga pasalamat sa mga artikulo. Kinahanglang basahon ko kana sa mismong gabii nga among nadawat ang magasin! Sanglit kami naghisgot niining ulohana diha sa klase sa geograpiya sa tunghaan, akong gihatagag usa ka kopya ang akong magtutudlo sa geograpiya sa sunod nga adlaw. Siyempre, kana naghimo sa uban diha sa klase nga makisayron, ug naglaom ako nga makapahimutang ug dugang mga magasin uban kanila.

T. E., Alemanya

Ang mga artikulo maoy tinuod nga makalingaw. Ang mga espisye sa mga insekto nga gihisgotan hilabihan gayod ka daghan, ang matag usa may kaugalingong buluhaton nga buhaton ilalom sa mga dahon diha sa salog sa lasang. Gitino ni Jehova nga ang pagkaon ikatagana sa tanang nagpuyo didto. Akong masabtan kon nganong siya ‘magagun-ob niadtong mga nagagun-ob sa yuta.’​—Pinadayag 11:18.

D. K. H., Tinipong Bansa

Pagdaogdaog​—Unsay Daotan Niana? Salamat sa artikulong “Mga Batan-on Nangutana . . . Pagdaogdaog​—Unsay Daotan Niana?” (Marso 22, 1997) Sa tunghaan ang tanan nagpakaulaw sa kinaluyahan, ug ako usab nahaylo sa pagbuhat sa samang butang. Apan ang tambag nga gihatag niining artikuloha nga ibutang ang kaugalingon diha sa kahimtang sa laing tawo nagtabang kanakog dako nga modumili sa pagdaogdaog. Salamat pag-usab.

M. N., Pransiya

Ako 17 anyos, ug ako nagpasalamat ug dako alang sa artikulo. Kini maoy tubag sa akong mga pag-ampo, ug kini nagdasig gayod kanako. Ang pagkasayod nga gidumtan ni Jehova ang pagdaogdaog nagtabang kanako ug dako sa paghimog gikinahanglang mga kausaban sa akong panggawi. Nakadayeg usab ako sa Bulawanong Lagda ug sa panig-ingnan ni Jesus, ug sila nagtabang kanako nga molihok nga matul-id.

V. T., Italya

Sa dili pa dugay, diha sa lawak hulatanan, gipunit ko ang Pagmata! ug nakadiskobre niining maayong pagkasulat nga artikulo. Nasabtan ko gayod ang dumalayong kadaot nga ikapahinabo sa pagdaogdaog. Ang akong igsoong lalaki maoy abusado [kanako, iyang igsoong babaye] sa sinultihan, emosyon, ug sa pisikal. Kon sukmatan, siya mokihol, mokatawa, ug moingon nga kadto komedya lang. Sultihan niya ako nga ako ang may problema sanglit ako dili hingatawa! Sa dihang ako 13 ug siya 15, siya misugod sa paghulga kanako sa pagmolestiya sa sekso. Ako kanunayng nahadlok kaniya tungod kay siya magulang, dako, ug kusgan kaayo! Wala gayod ako panalipdi sa akong mga ginikanan. Salamat, Pagmata!, sa paghisgot sa seryosong mga isyu sa kinabuhi. Nahibalo ako nga nagkinahanglag kaisog ang paghisgot niining mga isyuha. Gibati ko nga nakatandog kamo sa daghang kasingkasing pinaagi niining artikuloha.

B. S. M., Tinipong Bansa

Hardinerong mga Olmigas Human mabasa ang artikulong “Usa ka Ekspertong Hardinero” (Marso 22, 1997), ako nakaduaw sa usa ka eksibit ug nakasaksi sa mismong kalihokan nga inyong gibatbat. Kadto daw mga dahong nagalatay diha sa usa ka pisi nga nagbitay sa kisame. Sa pagkatinuod, ang mga olmigas ang nagdala niadto nga mga dahon, ug sa duol sila puliki sa pagtikad sa agup-op nga tanaman. Ang pagkakita sa inyong gihisgotan maoy usa gayod ka makapahibulong nga talan-awon ug nagpasuod kanako ug sa akong duha ka gagmayng batang babaye sa atong mahigugmaong langitnong Amahan, si Jehova.

P. F., Scotland