Tubig ug Imong Panglawas
“DILI ka makasalig sa kauhaw aron sultihan ka kon unsa ka daghang tubig ang gikinahanglan sa imong lawas,” nagpunting ang magasing Health. Bisan pa niana, ang pag-inom ug daghang tubig hinungdanon sa atong pisikal ug emosyonal nga kaayohan, ug bisan sa atong panagway. Ang atong mga lawas padayong mawad-ag tubig pinaagi sa pagsingot, paghilak, ug pag-ihi ingon man pinaagi sa atong pagginhawa. Kining nawalang pluwido kinahanglang pulihan. Unsa ka daghan ang gikinahanglan? Daghang awtoridad ang nagrekomendar sa pag-inom ug labing menos walo ka basong tubig—duha ka litro—kada adlaw.
Ngano? Ang tubig hinungdanon sa pagdala sa mga sustansiya sulod sa atong mga lawas ug sa pagpagawas sa mga hugaw. Kinahanglanon kini sa pagpaangay sa atong temperatura ug pagpadanlog sa atong mga lutahan. “Bisan ang kinagamyang kakulang sa tubig mopabati kanimong gikapoy . . . o masakiton,” nag-ingon ang Health. “Ang pagkawala sa tubig sa lawas maoy kasagarang wala lantawang hinungdan sa kakapoy.” Ang magasin nagrekomendar: “Ayaw palimbong sa likidong kinaiyahan sa kape ug tsa, may caffeine nga mga soft drink, ug alkoholikong ilimnon; kini sa pagkatinuod makaamot sa pagkawala sa tubig sa lawas.” Ang caffeine ug alkoholikong ilimnon nagsilbing mga tigpaihi ug magpahinabo sa lawas nga mawad-an ug tubig.
Dugang pa, “ang imong panit nagkinahanglan ug tubig aron magpabiling humok ug lumoy.” Sa pagtabang niini, ang mga tigpaumog (moisturizer) mahimong ihaplas usab sa panit. Apan kini sila dili magpadugang sa kaumog. Hinunoa, magbilin kini ug mapanalipdanong taklap nga motabang aron mahuptan ang kaumog nga anaa na sa panit. Ang paghupot niini nga kaumog mahimong mas hinungdanon inigkaedaran na, sanglit ang atong panit mawad-an sa pipila ka katakos niini sa paghupot sa tubig samtang kita magkatigulang.
Ikasubo, sa dakong bahin sa kalibotan, dakong paningkamot ang gikinahanglan aron makabaton ug lunsay, hinlong tubig. Apan takos kini sa paningkamot. Sa pagkatinuod, inom ug daghang tubig, ug pahimusli kining yanong paagi aron maayo kang tan-awon ug maayo ang imong bation!