Ang Umaabot nga Klima
ANG polusyon sa atong atmospera maoy usa lamang sa mga problema sa kalikopan nga namugna sa tawo. Ang uban naglakip sa sobrang pag-upaw sa lasang, pagpatay sa mga espisye sa mananap, ug ang polusyon sa mga suba, lanaw, ug mga dagat. Ang matag usa niining mga problemaha gianalisar pag-ayo, ug ang mga sugyot gihimo sa pagsulbad niini. Sanglit globonhon man ang mga problema, nagkinahanglan kini ug globonhong mga solusyon. Ang kadaghanan nagkauyon labot niining mga problemaha ug kon unsay himoon aron kini masulbad. Matag tuig, kita makadungog ug mga panawag ug aksiyon. Matag tuig, diyutay lang ang nahimo. Kasagaran ang mga tighimog polisa nagreklamo sa mga problema ug nagkauyon nga kinahanglan adunay himoon apan nagdugang, sa tinuod, “dili pinaagi kanamo, dili una karon.”
Niadtong 1970 sa orihinal nga Adlaw sa Yuta, ang mga demonstrador sa New York City nagdala ug usa ka dakong karatula. Gilarawan sa karatula ang planetang Yuta nga nagsinggit ug “Tabang!!” May motubag ba niana nga pangaliyupo? Ang Pulong sa Diyos nagtubag: “Ayaw pag-ibutang ang inyong pagsalig sa mga prinsipe, ni sa mga anak sa tawo, nga kaniya walay kaluwasan. Mogula ang iyang espiritu, sa iyang yuta siya mobalik; nianang adlawa mahanaw ang iyang mga hunahuna.” (Salmo 146:3, 4) Gipunting sunod sa salmista ang Maglalalang, kay Siya lamang ang may gahom, kaalam, ug kabubut-on sa pagsulbad sa tanang komplikadong mga problema nga giatubang sa tawo. Atong mabasa: “Malipayon ang usa . . . kansang paglaom anaa kang Jehova nga iyang Diyos, ang Magbubuhat sa langit ug yuta, sa dagat, ug sa tanan nga anaa kanila.”—Salmo 146:5, 6.
Ang Mahigugmaong Saad sa Maglalalang
Ang yuta maoy usa ka gasa gikan sa Diyos. Siya ang nagdisenyo ug naglalang niini, lakip sa tanang komplikado ug katingalahang mga mekanismo nga naghimo sa klima sa yuta nga maayo. (Salmo 115:15, 16) Ang Bibliya nag-ingon: “[Ang Diyos] mao ang Magbubuhat sa yuta pinaagi sa iyang gahom, ang Usa nga lig-ong nagtukod sa mabungahong yuta pinaagi sa iyang kaalam, ug ang Usa kinsa pinaagi sa iyang pagsabot nagbuklad sa kalangitan. Inigtingog niya adunay kasamok sa tubig sa kalangitan, ug siya nagpasaka sa mga alisngaw gikan sa mga kinatumyan sa yuta. Siya nagbuhat pa gani ug mga awasan alang sa ulan, ug nagpagula sa hangin gikan sa iyang mga tipiganan.”—Jeremias 10:12, 13.
Ang gugma sa Maglalalang alang sa mga tawo gihubit ni apostol Pablo ngadto sa mga tawo sa karaang Listra. Siya nag-ingon: “Wala biyai [sa Diyos] ang iyang kaugalingon nga walay saksi sa pagkaagi nga siya naghimo ug maayo, nga naghatag kaninyog ulan gikan sa langit ug mabungahong mga panahon, nga nagbuhong sa inyong mga kasingkasing sa pagkaon ug sa kasaya.”—Buhat 14:17.
Ang umaabot sa planeta wala magadepende sa mga paningkamot ug mga kasabotan sa mga tawo. Mahitungod sa klima, ang Usa nga may gahom sa pagkontrolar niana nagsaad sa iyang karaang katawhan: “Ako magahatag gayod kaninyo ug mga ulan sa ilang hustong panahon, ug ang yuta magahatag sa iyang mga abot, ug ang mga kahoy sa kapatagan magahatag sa ilang bunga.” (Levitico 26:4) Sa dili madugay tagamtamon sa mga tawo ang maong mga kahimtang sa tibuok yuta. Dili na gayod kahadlokan pa sa mga tawong masinugtanon ang malaglagong mga bagyo, buhawi, lunop, hulaw, o bisan unsa pang kinaiyanhong mga katalagman.
Ang mga balod, hangin, ug klima tanan makahatag ug kalipay. Ang mga tawo tingali maghisgot gihapon bahin sa klima, apan sila walay himoong bisan unsa labot niini. Sa umaabot nga ipatungha sa Diyos, ang kinabuhi mahimong mahimayaon unya kaayo nga dili na kinahanglang may himoon pa sila alang niini.