Usa ka Publikasyon nga May Katuyoan
USA ka manedyer sa publikong librarya sa Prague, Republika sa Czech, nagpaskin sa duha-ka-panid nga resulta sa pagsusi bahin sa Pagmata! diha sa paskinag-pahibalo sa librarya. Lakip sa mga butang nga iyang gisulat mao ang mosunod:
“Ako dili usa sa mga Saksi ni Jehova. Ni ako usa ka debotadong tigpaluyo ni dulot nga tigsupak sa Watch Tower Society. Bisan pa niana, mainiton nakong ikarekomendar ang magasing Pagmata!, nga taudtaod ko nang ginabasa. Ang pagbasa lamang sa ulohan niini kausa sa usa ka adlaw makahatag kanimog dakong kaayohan. Hinunoa, dili lamang ang ulohan kondili ang mismong mga kaundan niining magasina maoy maayong suplemento sa komersiyal nga mga magasin . . .
“Gipamalandong pag-ayo ang ideya diha sa Pagmata! Nagtagana kinig mga artikulo bahin sa mga ulohan nga ang ubang mga magasin nagpanuko sa pagpatik tungod sa nagkalainlaing mga katarongan. Nagpunting kini sa lohikal nga kalabotan tali sa mga butang, nag-edukar bahin sa tibuok-kalibotang kaamgohan . . . Dili mohukom ang Pagmata! Nagtanyag kinig mga impormasyon ug mga panglantaw sa mga awtoridad, naghatag sa positibo ug negatibong baroganan, nag-atubang sa mga suliran karon pinaagi sa mga pangutlo sa Bibliya, ug naghatag ug higayon sa magbabasa sa paghukom sa iyang kaugalingon. Dugang pa, ang Pagmata! nagsukna—ug nagtudlo sa mga magbabasa sa pagsukna—ug mga pangutana.”
Sa panid 4 sa matag magasin, ang seksiyon nga “Kon Nganong Gipatik ang Pagmata!” nagsaysay: “Labing bililhon, kining magasina mougmad sa pagsalig sa saad sa Maglalalang sa usa ka makigdaiton ug may-kasegurohang bag-ong kalibotan nga hapit nang mopuli sa tuman-kadaotan, malapasong sistema sa mga butang karon.”
Imong makaplagan kining saad sa Diyos nga gihisgotan diha sa kataposang duha ka seksiyon sa 32-panid nga brosyur nga Unsa ang Katuyoan sa Kinabuhi? Sa Unsang Paagi Makaplagan Nimo Kini? Kini nga mga seksiyon nag-ulohang “Katuyoan sa Diyos Hapit Nang Matuman” ug “Mabuhing Walay-Kataposan sa Yutang Paraiso.” Makadawat ka niining brosyura pinaagi sa pagpil-ap ug pagpadala sa kaubang kupon ngadto sa adres nga gipakita sa kupon o sa tukmang adres nga gilista sa panid 5 niining magasina.
□ Padad-i ako ug usa ka kopya sa Unsa ang Katuyoan sa Kinabuhi? Sa Unsang Paagi Makaplagan Nimo Kini?
□ Palihog kontaka ako bahin sa usa ka libreng pagtuon sa Bibliya sa balay.