Paghuyang sa Relihiyon sa Britanya

SINULAT SA KORESPONSAL SA PAGMATA! SA BRITANYA

ANG The Sunday Times sa London nagtaho nga 1,500 ka Britano ang nagapamiya gikan sa iladong mga relihiyon matag semana. Ang Romano Katolikong Iglesya nawad-ag mga 600,000 nga tigsimba sukad sa 1980, ug ang Iglesya sa Inglaterra—sa gihapon nawad-ag daghang membro nga 600 matag semana—wala nay usa ka milyon ang nagatambong sa mga serbisyo niini, menos pa sa katunga sa mga tigsimba mga 50 ka tuig kanhi. Human sa desisyon sa Heneral nga Sinodo sa 1992 nga nag-ordinar sa mga babaye, mga 500 ka klerigo sa Iglesya sa Inglaterra ang namahawa.

Daghang namahawa sa mga iglesya ang kasagarang nasuko ug nahigawad nga walay misulay sa pagpugong kanila sa pagpahawa o sa pagpaloap aron sa pagtino kon unsay mahimo sa pagtabang kanila sa dihang wala na sila, nagtaho ang The Times. Ang uban “nag-ingon nga ang Iglesya napakyas sa pagpakiglabot sa ilang kinabuhi,” ang mantalaan nag-ingon.

Ang Britanong katilingban nagmantinil sa “nagkamenos nga abiyo sa espirituwal ug moral nga kabtangan,” matod pa ni kardinal Basil Hume, ang Romano Katolikong arsobispo sa Westminster. Unsay nakaingon niining hinayhinayng pagpamiya? “Kagutmanan sa Pulong sa Diyos,” nag-ingon ang ulohang-balita sa Catholic Herald. Kini nag-ingon: “Panahon sa Misa kami basahag mga pangutlo gikan sa Daan ug Bag-ong mga Testamento, apan talagsa ra, kon duna man, nga kini gipatin-aw. . . . Dalayegon ang kasaysayan sa kinabuhi sa mga santos ug sa nagkalainlaing mga basahon bahin sa pagpamalandong, apan kini dili igo ingong yawi sa pagsabot sa Kasulatan.” Kining artikuloha nanghinapos nga ang usa ka “moderno, biblikanhong presentasyon uban ang tumong sa pag-atiman sa panon” maoy nakulang.

Diha sa sulat ngadto sa Boston Target, sa Lincolnshire, ang usa ka magbabasa miingon: “Ang mga tawo nawad-an sa ilang pagtuo sa mga relihiyon . . . Unsay gihimo niining mga ministroha sa tibuok adlaw? Wala gayod sila manglakaw sama sa gihimo ni Kristo ug makighimamat sa mga tawo . . . Ang bugtong relihiyon nga morag may kaikag mao ang mga Saksi ni Jehova, nga manglakaw ug makighimamat sa mga tawo ug tinuod nga nalangkit sa pagsangyaw sa kamatuoran—ila kang dapiton sa pagtambong sa ilang mga tigom, sila maghisgot ug motabang maylabot sa mga butang sa kalikopan. Ako dili JW, apan akong gitahod kining mga tawhana ug maminaw kanila.”

Nakatambong ka na ba sa mga tigom sa lokal nga Kingdom Hall? Didto ikaw makakaplag ug instruksiyon nga makadasig ug mapuslanon. Gusto ka bang matubag ang imong mga pangutana bahin sa Bibliya? Sa miaging tuig, sa 233 ka nasod, ang mga Saksi ni Jehova migugol ug kapin sa usa ka bilyong oras sa ilang panahon nga walay bayad aron sa pagtabang sa mga tawo nga makasabot sa Bibliya, nga nagdumalag kapin sa upat ka milyon nga mga pagtuon sa Bibliya. Ang mga Saksi ni Jehova nag-isip niining edukasyonal nga buluhaton sa Bibliya ingon nga labing hinungdanong buluhaton nga ginahimo niining panahona. Gidapit ka namo sa pagsusi kon ngano.—Mateo 24:14; 28:19, 20.