Usa ka Hulagway nga Dili Niya Makalimtan
SI Karen, kinsa nahimong usa sa mga Saksi ni Jehova sulod na sa kapin sa duha ka dekada, nakakaplag nga ang iyang amahan wala gayoy interes sa pagpakigsulti kaniya bahin sa relihiyon. Apan, di pa dugay kana nausab. Siya migugol ug panahon sa ospital, nga nagpaayo gikan sa operasyon. Usa ka adlaw niana, tungod sa hilabihang kalaay, iyang gibasa ang tibuok nga mantalaan. Siya nalisang. Sa ulahi, human mopauli sa balay, iyang gitawagan ang iyang anak nga babaye. Si Karen nag-asoy: “Sa telepono si Papa miingon kanako, ‘Karen, ang kalibotan padulong sa pagkalaglag.’ Siya ilabinang naglagot sa mga paagi nga ang mga bata gidagmalan.
“Wala pa gani ako makahigayon pagdasig kaniya, siya miingon dihadiha: ‘Duha ka babaye midangat sa akong balay karong adlawa. Ako kasagarang atua sa luyo sa balay sa akong tanaman, apan nakaplagan ako nila sa dihang ako didto sa atubang. Usa ka babaye nagpakita kanako ug hulagway sa usa ka matahom nga tanaman. Buot kong sultihan siya, “Aw, tan-awa ang nataran sa luyo sa akong balay—usa kini ka matahom nga tanaman,” apan wala ko kana buhata. Dayon siya miingon nga sa dili madugay ang tibuok kalibotan makabaton ug pakigdait. Siya miingon nga kana mahimong sama nianang tanaman sa hulagway, nga matagamtam sa tanan. Wala nako kuhaa ang libro. Apan human sila mobiya, dili nako makalimtan kadtong hulagwaya. Kanunay lang akong naghunahuna bahin niadto ug sa ideya sa pakigdait alang sa tanan. Nahibalo ka ba kon unsang libroha ang akong gipasabot? Mahimo bang kuhaan nimo ako ug usa kopya?’”
Si Karen nalipay sa pagtuman. Ang hulagway nga gitumong sa iyang amahan mao ang imong makita dinhi. Ang libro nag-ulohan ug Kahibalo nga Motultol sa Kinabuhing Walay Kataposan. Buot ba nimong mahibalo ug dugang bahin sa saad sa Bibliya nga ang Diyos sa dili madugay maghimo sa yuta nga usa ka tibuok-kalibotang tanaman diin ang mga tawo magpuyo diha sa pakigdait? Ikaw makabaton ug usa ka kopya niini nga libro pinaagi sa pagpil-ap ug pagpadala sa kaubang kupon ngadto sa adres nga gipakita sa kupon o sa nahiangay nga adres nga nalista sa panid 5 niining magasina.
□ Padalhi ako ug usa ka kopya sa librong Kahibalo nga Motultol sa Kinabuhing Walay Kataposan.
□ Palihog kontaka ako bahin sa usa ka libreng pagtuon sa Bibliya sa balay.