Napalig-on sa Iyang Pagtuo
Usa ka 17-anyos nga batan-ong babaye misulat sa buhatan sa Watch Tower Society sa Moldova, kanhing republika sa Unyong Sobyet, aron magpahayag ug apresasyon alang sa usa ka artikulo nga migula diha sa Hunyo 8, 1998, nga Pagmata! Ang artikulo nag-ulohan ug “Ang Akong Pagpili Tali sa Duha ka Amahan,” ug kini nag-asoy sa personal nga mga kasinatian sa usa ka batan-ong Armeniano.
“Samtang ako nagabasa sa artikulo,” ang batan-ong babaye misaysay, “ako mihilak pag-ayo tungod kay ang iyang sugilanon maoy susama sa akoa.” Siya mipadayon: “Sa dihang ako 15 anyos, misugod ako sa pagtuon sa Bibliya, ug ang akong mga ginikanan wala motutol sa sinugdan. Apan sa dihang misugod ako sa pagtambong sa mga tigom sa mga Saksi ni Jehova, sila hugot nga misupak. Dayon, sa 1997, sa dihang ako misugod sa pagpaambit sa uban kon unsay akong nakat-onan, sila miingon kanako: ‘Lakaw ngadto sa imong mga higalang Saksi ug pasagding sila ang mopakaon nimo, mopabesti nimo, ug mohatag kanimog trabaho. Dili ka masinugtanong anak!’ Gidagmalan pa gani ako sa akong mga ginikanan, nga giparok ang akong ulo sa bungbong.
“Kadto maoy malisod nga pagsulay alang kanako. Ako sagad nakabaton sa pagbati nga gipahayag nianang batan-ong Armeniano, kinsa miingon nga siya usahay nagduhaduha kon nahimuot ba kaha kaniya si Jehova. Ako naghunahuna sa akong kaugalingon, ‘Ako ba walay bili? Pasayloon ba ako ni Jehova sa akong kanhing mga sala? Wala na ba mahigugma kanako si Jehova?’
“Malisod kaayo kadto, ilabina sa dihang ako naghunahuna nga si Jehova wala na mahigugma kanako. Subsob akong nangamuyo kang Jehova diha sa akong mga pag-ampo, nga maghilak, nga tabangan ako, nga palig-onon ako aron dili gayod nako biyaan siya. Ug, sa pagkamatuod, akong nakita nga gidungog ni Jehova ang akong mga pag-ampo ug gitubag ang akong mga pangaliyupo. Siya naghatag kanakog kalig-on, determinasyon, ug kaisog. Ilabinang gihimo niya kini pinaagi sa iyang Pulong, diin ang salmista sa pagkamasaligon nagmantala: ‘Kon ako biyaan sa akong amahan ug sa akong inahan, si Jehova mismo mosagop kanako.’—Salmo 27:10.
“Sa Septiyembre 27, 1997, akong gipasimbolohan ang akong dedikasyon kang Jehova pinaagi sa pagpabawtismo panahon sa usa ka sirkitong asembliya sa mga Saksi ni Jehova sa Kagul. Akong nasabtan pag-ayo nga si Jehova, ang atong mahigugmaong langitnong Amahan, nagatuman sa iyang saad nga gisulti diha sa Salmo 84:11: ‘Si Jehova nga Diyos maoy adlaw ug taming; pabor ug himaya mao ang iyang gihatag. Walay bisan unsang butang nga maayo nga idumili ni Jehova niadtong nagalakaw nga walay-ikasaway.’
“Mapasalamaton kaayo ako nianang batan-ong Armeniano nga nagpaambit sa iyang makapalig-on-sa-pagtuo nga sugilanon diha sa magasing Pagmata! Naglaom ako nga ang akong mga ginikanan ug iyaha sa ngadtongadto magpakitag interes sa mga pagtulon-an sa Bibliya.”