Mapasalamaton Tungod sa Dili-Mapakyas nga Pagpaluyo ni Jehova
SUMALA SA GIASOY NI SHARON GASKINS
PARAISO sa yuta! Nakita ko ang akong kaugalingon nga nagduladula sa mga kabalilihan, nagdakopdakop sa mga alibangbang, naghagwahagwa sa mga itoy nga leyon. Maorag maanindot kaayo kana! Apan dihay mga pagduhaduha. Unsa ka subsob nga ang akong paglaom nisangpot sa pagkawalay-paglaom!
Tungod kay kutob sa akong mahinumdoman, ang silyang-may-ligid maoy kanunay nakong kauban. Gikan sa pagkatawo, ang paralisis sa utok naghikaw kanako sa mga kalipay sa pagkabata. Ang ubang mga bata nagkalingaw sa mga eskit ug mga bisiklita, apan ako naglingkod nga nag-inusara, nga dili gani makalakaw. Busa sa dihang gidala ako ni Mama ngadto sa usa ka mananambal-pinaagig-pagtuo ngadto sa lain, kami malugutong nanghinaot sa usa ka milagro. Hinuon, balikbalik, mobiya kami nga walay pagpanambal nga mahimo. Makapahigawad alang kanako, apan unsa ka makapasubo alang kaniya!
Kay nangandoy alang sa tinuod nga paglaom, ang akong inahan misugod sa pagtuon sa Bibliya uban sa mga Saksi ni Jehova sayo sa 1964. Mga unom ug tunga ka tuig ako niadto.
Kahibulongan gayod ang pagkakat-on nga kanhi dihay usa ka matahom nga paraiso dinhi sa yuta. Ikasubo, ang unang tawo, si Adan, nagwala sa paraiso, apan ako nagtinguha sa pagkasuod sa Diyos sama sa natagamtam ni Adan kanhi. Sama kaha sa unsa ang pagtagamtam sa usa ka relasyon uban sa Diyos? O sa pagkinabuhi sa diha nga ang iyang kaugalingong Anak nabuhi sa yuta? Ang akong mga paghanduraw nagdala usab kanako ngadto sa umaabot nga Paraiso. Bisan nianang sayong pangedaron, tin-aw kanako nga kami nakakaplag sa kamatuoran.
Si Mama nagsugod sa pagdala sa pamilya ngadto sa Kingdom Hall sa mga Saksi ni Jehova. Ang ilang mga tigom lahi kaayo sa among nakita sa mga iglesya! Ang mga tawo ug ang mga palibot nakatandog kaayo kanako.
Ang pagdala kanamo ngadto sa Kingdom Hall malisod alang sa akong inahan. Gawas kanako, dihay tulo ka manghod, ug kami walay sakyanan. Kami mosakay ug taksi kon siya makaabot sa pagbayad niana. Mahinumdoman ko pa kon giunsa niya pagpaningkamot usa ka Dominggo niana. Wala kamiy nakitang taksi. Unya, sa wala damha, usa ka tawo sakay sa iyang trak miagi ug gipasakay kami. Kami naulahi sa tigom, apan kami nakaabot didto. Pagkamapasalamaton namo kang Jehova!
Sa wala madugay ang among minahal espirituwal nga mga igsoong lalaki ug babaye nga may mga sakyanan sa kamahigugmaon nagpulipuli sa pagpasakay kanamo. Ang pagdasig ni Mama nga dili gayod pakyason ang mga tigom gawas kon kami tinuod nga nagkasakit nagpatisok sa akong linghod nga hunahuna sa pagkahinungdanon sa ‘panagkatigom.’ (Hebreohanon 10:24, 25) Kay napalihok sa iyang nakat-onan, ang akong inahan nagpahinungod sa iyang kinabuhi ngadto kang Jehova ug nabawtismohan niadtong 1965.
Nianang panahona ako diha na sa panuigon nga mopabili sa mga tigom nga mas bug-os pa. Sa Kongregasyon sa Cypress Hills sa Brooklyn, New York, dihay mga Uropanhon, mga itom, mga Katsila, ug uban pa nga naghiusa sa pagsimba. Morag husto gayod nga ang mahadlokog-Diyos nga mga katawhan magkinabuhi sa maong matuod nga panag-igsoonay.—Salmo 133:1.
Ang akong inahan nagtudlo kanako kon unsaon pagpangandam alang sa mga tigom. Kini dili suliran sa hunahuna, apan kini suliran sa pisikal. Ang paralisis sa utok naghimo sa yanong mga buluhaton ngadto sa dagkong mga proyekto. Kaniadto, ug hangtod karon, imposible alang kanako ang pagbadlis ug tul-id nga linya aron sa pagtimaan sa akong mga tubag diha sa atong mga literatura sa Bibliya. Hinuon, uban sa pagbansay, niuswag ang akong pagpamadlis.
Ang akong hunahuna puno sa mga butang igsusulti. Apan sa paggawas nila sa akong baba, ang mga pulong nagkalamukat. Ang pagrelaks hinungdanon aron nga ang akong mga muskulo dili mohugot. Kinahanglan usab nga ipunting nako ang akong pagtagad sa paglitok sa matag pulong nga tin-aw kutob sa mahimo. Makasinati akog kapakyasan kon ang komento dili mapahayag sa hustong paagi o kon akong nahibaloan nga ang mga tawo wala makasabot sa akong mga pulong. Hinuon, sa dihang ila akong masinati, ang mga igsoong lalaki ug babaye sa kongregasyon mas makasabot na sa akong sinultihan. Bisan pa niana, aduna gihapon akoy maayong mga adlaw ug malisod nga mga adlaw tungod niining sulirana.
Unom ka Makapabalakang Bulan
Sa nagpanuigog walo ka tuig, ako may unom-ka-bulang kasinatian nga nakaapektar kanako hangtod karong adlawa. Bisan pa sa tanang pisikal, okupasyonal, ug bahin sa sinultihan nga pagtambal nga gibuhat na kanako, gipadala ako sa mga doktor ngadto sa usa ka pahiuliang ospital sa West Haverstraw, New York. Ang akong inahan ug ako nasubo. Mga katuigan nga sayo pa, sa dihang sayop nga giagpas sa mga doktor ang akong sakit ingon nga kakulang sa pangutok, siya miingon kanila nga siya dili gayod mobutang kanako sa ospital sa mga buang. Busa bisan ang temporaryong panagbulag malisod alang kaniya. Bisan pa niana, iyang nakita nga ang akong pagkinabuhi nga mabungahon nga bulag kaniya ug sa akong amahan nagkahulogan nga mahimong independente sa pisikal kutob sa mahimo.
Maanindot ang pasilidad, apan ako nibating biniyaan. Ang pagsigeg hilak ug pagkasapoton nagpatin-aw sa akong pagbati bahin sa dapit. Ang akong mga ginikanan panagsa rang makahimo sa tulo-ka-oras nga biyahe sa bus aron sa pagduaw kanako, ilabina kay si Mama nagmabdos sa iyang ikalimang anak. Sa dihang kinahanglan na silang mobiya, nakapaguol kaayo kini kanako nga ang doktor nag-ingon nga ang mga pagduaw himoong dili kanunay. Gitugotan ako sa pagpauli sa duha ka beses lamang.
Ang mga mananambal nagtudlo kanako kon unsaon paglakaw uban sa tabang sa mga sungkod ug gipabug-atan-sa-tingga nga mga kratses. Hilabihan sila ka bug-at. Bisan pa niana, ang gibug-aton nakatabang kanako sa pagmentenar sa panimbang ug nagpugong kanako nga matumba. Kadto mao ang unang lakang sa paglakaw nga nag-inusara nga walay tabang sa mga sungkod.
Ang paghiwa sa pagkaon, pagbutones—bisan unsang bulohaton nga nagkinahanglan sa paggamit sa mga tudlo malisod kon dili imposible alang kanako. Apan sa usa ka sukod nakakat-on ako sa pagpakaon ug pag-ilis sa akong kaugalingon. Kini sa ulahi nakatabang sa akong pag-alagad sa Diyos.
Sa dihang natapos ang akong pagbansay, nahiuli na usab ako sa balay. Gipatrabaho ko ni Mama ginamit ang akong bag-ong mga kahanas. Ang pagbuhat niana maoy emosyonal nga pagpakigbugno, tungod kay bisan ug buot kong mohimo sa mga butang sa akong kaugalingon, ang pagpalampos kanila maoy makapahigawad, makahurot sa panahon, ug makahago. Aw, ang pag-ilis sa akong kaugalingon alang sa mga tigom maoy duha-ka-oras nga proyekto!
Sa dihang mibalhin kami atbang mismo sa Kingdom Hall, ako aktuwal nga nakalakaw sa akong kaugalingon. Kadto maoy dakong kadaogan!
Ang Labing Malipayong Adlaw sa Akong Kinabuhi
Gitino sa akong inahan nga ang pamilya may timbang espirituwal nga diyeta. Siya nagtuon uban kanako ug nagdahom nga ako mobasa sa kada gula sa atong mga magasin, Ang Bantayanang Torre ug Pagmata! May mga tigom nga pangandaman ug tambongan. Bisan kon ang akong hunahuna ug kasingkasing mahinamong nagdawat niining kahibaloa, ang seryosong hunahuna bahin sa pagpahinungod sa akong kinabuhi ngadto kang Jehova ug pagpasimbolo niana pinaagi sa bawtismo sa tubig didto sa likod. Gitabangan ako ni Mama sa pagsabot nga bisan pa sa depekto sa akong lawas, ang Diyos nag-isip kanako nga responsable sa akong kaugalingon sa espirituwal. Dili ako makadahom nga makasulod sa bag-ong kalibotan tungod kaniya, nga molabang ngadto sa bag-ong kalibotan nga bug-os nagdepende sa akong inahan.
Ako nahigugma sa Diyos, apan ang akong kahimtang nagpalahi kanako sa uban—usa ka masakit nga kaamgohan alang sa usa ka tin-edyer. Malisod ang pagdawat sa akong mga kakulangan. Ang kasuko sagad mogahom kanako, ug kinahanglan kining kontrolahon sa dili pa ang bawtismo. (Galacia 5:19, 20) Ug unsa na man kon dili ako makatuman sa akong pagpahinungod kang Jehova?
Sa hangyo sa akong inahan, usa ka ansiano sa kongregasyon nakigsulti kanako. Iyang gikutlo ang pangutana ni manalagnang Elias ngadto sa mga Israelita: “Unsa ka dugay nga kamo magkiangkiang sa duha ka lainlaing hunahuna?” (1 Hari 18:21) Tin-aw, si Jehova wala mahimuot sa akong pagkadi-makahukom.
Ako nahigmata sa espirituwal ug malugutong nag-ampo alang sa tabang ni Jehova ug sa determinasyon nga mopahinungod sa akong kinabuhi ngadto kaniya. Usa ka igsoong babaye sa kongregasyon nagtuon uban kanako. Mas bata siya kanako ug namatyag inahan sa bata pa siya. Bisan pa niana, siya nakahimog pahinungod ngadto sa Diyos samtang bata pa kaayo.
Sa dihang nagpanuigon ug 17, ako nakahukom. Buot kong moalagad kang Jehova kutob sa akong maarangan. Ang Agosto 9, 1974—sa dihang ako nabawtismohan—maoy labing malipayong adlaw sa akong kinabuhi.
Kalipay Diha sa Ministeryo
Ang pagpakig-ambit diha sa ministeryo naglakip ug pipila ka samag-bukid nga kababagan. Ang kinadak-ang hagit mao ang paghimo sa akong kaugalingon nga masabtan. Maningkamot ako sa pagsulti nga tin-aw kutob sa maarangan. Unya, kon gikinahanglan, ang akong kauban sa ministeryo sa kanataran mosubli sa akong mga komento ngadto sa tagbalay. Ang uban negatibo ang pagsanong, nga nag-isip kanako ingon nga biktima sa pagpahimulos sa mga Saksi. Apan ang pagsangyaw maoy akong katungod ug kinasingkasing nga tinguha.
Ang paglakaw gikan sa usa ka pultahan ngadto sa lain bisan sa usa ka bloke lamang makapakapoy kaayo. Daghang balay sa among teritoryong sangyawanan adunay mga hagdanan, nga naghimo kanila nga dili nako maabot. Sa tingtugnaw, ang may yelo nga mga kalsada naghimo sa balay-sa-balay nga buluhaton nga imposible gayod alang kanako. (Buhat 20:20) Bisan pa niana, ang espirituwal nga mga igsoon nakatabag dako, ug si Jehova karon nagpanalangin kanako ug de-motor nga silyang-may-ligid, nga nagpahimo sa ministeryo nga mas sayon.
Sa ngadtongadto, ako nagpamatuod pinaagi sa sulat. Dili mahimo ang pagsulat ug kinamot tungod kay ang akong agi dili mabasa sa kadaghanang tawo. Busa ang de-koryenteng makenilya nahimong akong sekretarya. Hinay kaayo ang akong pagmakenilya tungod sa dili-maayong pagkasibo sa lihok sa akong kamot. Sa katunga sa panahon, ako naninguha sa pagtulpok sa usa ka letra ug lain ang natulpok. Dangtag usa ka oras o labaw pa ang pagmakenilya sa usa lamang ka pahina.
Bisan pa sa kakulang sa kusog, usahay ako mag-alagad ingon nga oksilyare payunir, nga mogugol ug 60 oras o labaw pa diha sa ministeryo sa usa ka bulan. Kini nagkinahanglag maayong eskedyul, dugang paningkamot, ug ang pagpaluyo sa isigka-magtutuo. Ang ilang espiritu sa pagpayunir nagdasig kanako. Si Mama nagpakita usab ug maayong panig-ingnan pinaagi sa pag-alagad ingon nga regular o oksilyare payunir samtang nagaatubang sa mga kalisdanan, dili-maayong panglawas, ug sa hagit sa pagmatuto sa pito ka anak diha sa nabahin-sa-relihiyon nga panimalay.
Nagkinaugalingon Na
Sa panuigong 24, ako nakahukom sa paglain. Ang akong pagbalhin ngadto sa Bensonhurst nga seksiyon sa Brooklyn napamatud-ang panalangin. Ang Kongregasyon sa Marlboro sama sa usa ka suod nga pamilya. Pagkamakapalig-on-sa-pagtuo nga makig-uban kanila! Bisan duha o tulo lang ka sakyanan ang maggamit sa kongregasyon, ang espirituwal nga mga igsoon nagdala kanako ngadto sa tanang tigom. Apan wala ako magpuyo ug dugay didto.
Nga nibating usa ka bug-os nga pakyas, ako nibalik ngadto sa akong pamilya ug misulod sa tulo-ka-tuig nga yugto sa hilabihang kaguol. Nibalik ang mga pagsilaob sa kasuko. Unya miabot ang hunahuna sa paghikog ug daghang pagsulay aron sa paghimo niana. Ang kamatayon maoy kanunay ug makahahadlok nga palaabuton. Apan ako misalig sa Diyos ug misaad sa pagpakita ug pagpabili alang sa iyang gasa nga kinabuhi. Ang paghupay ug tambag miabot gikan sa mga ansiano. Kini, duyog sa pag-ampo, personal nga pagtuon, pagpailob sa bahin sa akong pamilya, ug pipila ka propesyonal nga tabang, nagtul-id sa akong panghunahuna.
Pinaagi sa Ang Bantayanang Torre, si Jehova malumong nagtagana ug kaalam bahin sa grabeng kaguol. Oo, siya mag-atiman sa iyang katawhan ug makasabot sa atong mga pagbati. (1 Pedro 5:6, 7) Sa wala madugay nahanaw ang hilabihang kaguol. Napulo ka tuig sa ulahi, si Jehova nagtabang gihapon kanako sa pagdumala sa kapakyasan ug kaguol. Usahay ang pagbati sa pagkawalay-pulos halos makabuntog nako. Bisan pa niana, ang pag-ampo, pagtuon sa Bibliya, ug ang akong espirituwal nga pamilya maoy kahibulongang mga tabang sa paglahutay.
Tapos sa pakyas nga pagpangita sa laing apartment, ako maduhaduhaong mihukom nga mopuyo uban sa akong pamilya sa nanghibiling gutlo sa akong kinabuhi. Unya gitubag ni Jehova ang akong mga pag-ampo. Dihay usa ka dapit sa Bedford-Stuyvesant nga seksiyon sa Brooklyn. Sa kataposan sa ting-init sa 1984, ako mibalhin, ug sukad niadto nagpuyo didto.
Ang mga membro sa mahigugmaon kaayong Kongregasyon sa Lafayette malulutong nagdala kanako ngadto sa mga tigom. Lab-as pa sa akong hunahuna ang unang Pagtuon sa Libro sa Kongregasyon nga akong gitambongan. Gihimo kadto sa ikaupat nga andana—ug walay elebetor! Pinaagi lamang sa tabang ni Jehova nga nakahimo ako sa pagsaka kanaog niadtong mga hagdanana. Sa wala madugay ang mas sayon maabot nga dapit gitagana. Ug karon si Jehova nagpanalangin kanako sa pribilehiyo sa pagbaton ug Pagtuon sa Libro sa Kongregasyon sa akong balay.
Kaylap niining kongregasyona ang talagsaong espiritu sa pagpayunir. Sa dihang miabot ako, may kapin sa 30 ka payunir, ug ang pipila naghatag kanako ug linaing pag-atiman ug pagtagad. Ang masibotong atmospera nagpalihok kanako sa pag-oksilyare payunir nga mas subsob pa.
Sa Abril 1990 ang mga Kongregasyon sa Lafayette ug Pratt nagtukod ug bag-ong Kingdom Hall diha sa samang kalye sa akong apartment. Kadto nahitabo sa tukmang panahon, kay tungod sa dugang kadaot sa lawas, ang paglakaw nahimo na usab nga suliran. Pinaagi sa akong motorsiklo ug uban sa espirituwal nga mga igsoong lalaki ug babaye nga anaa sa akong kiliran, hinunoa, ang mga biyahe ngadto-nganhi sa mga tigom makapahimuot. Pagkadako ang pagpabili nako sa maong mahigugmaong tabang!
Mapasalamaton Tungod sa Pagpaluyo sa Diyos
Bisan kon ang akong mga bitiis huyang, ang akong kasingkasing lig-on. Ang usa ka maayong edukasyon naghimo sa kinabuhi nga mas sayon, apan ang Diyos nagpalig-on kanako. Usahay wala ako masayod kon sa unsang paagi gitagana ang akong inadlaw-adlawng pagkaon, apan si Jehova nagpaluyo kanako ug kanunayng matinumanong Magtatagana. Mahal gayod kanako ang mga pulong ni David: “Nabata ako kaniadto, ug karon ako tigulang na, apan wala ako makakita sa matarong nga gibiyaan, ni magpakilimos ug tinapay ang iyang kaliwat.”—Salmo 37:23-25.
Sa daghang panahon si Jehova nga Diyos nagpahinabo nga ako makahupot sa Kasulatanhong baroganan pinaagi sa pagtabang kanako sa pagdumili sa dugo panahon sa operasyon. (Buhat 15:28, 29) Di pa dugay, ang akong amahan namatay. Ang pagkanamatyan ug usa nga suod kaayo tinuod gayod nga makapaguol. Ang kusog lamang nga gikan kang Jehova ang nakapaagwanta nako niini ug sa uban pang mga pagsulay.
Ang akong panglawas mahimong padayong magakadaot, apan ang akong pagsalig sa Diyos ug ang akong relasyon uban kaniya maoy akong kuptanan sa kinabuhi. Pagkamalipayon nako nga mahimong lakip sa katawhan ni Jehova ug makabaton sa iyang dili-mapakyas nga pagpaluyo!