Uropanhong Maayong Panglawas ug Kawalay-Kapeligrohan
Sinulat sa koresponsal sa Pagmata! sa Britanya
KAPIG 16,000 ka lalaki ug babaye ang nagtrabaho sa hedkuwarter sa Watch Tower Bible and Tract Society ug sa 109 ka sangang buhatan niini. Pipila niining mga boluntaryo nag-atiman sa pag-imprenta, mga talyer, ug pag-atiman sa makinarya. Apan bisan unsa ang ilang mga asaynment, sila nag-obligar sa kaugalingon sa maayong mga batasan sa pagtrabaho, nga magapanalipod sa kinabuhi ug panglawas.
Ang hataas nga sukdanan nga gibutang sa sangang buhatan sa Britanya sa pabrika niini sa Mill Hill sa London giila sa publiko sa 1998, pagkatapos sa 1997 Uropanhong Semana Alang sa Kawalay-Kapeligrohan ug Maayong Panglawas. Ang usa ka bildong panaksan nga gisulatan sa mga pulong “Uropanhong Semana Alang sa Kawalay-Kapeligrohan ug Maayong Panglawas—Mananaog sa Ganti 1997” gipresentar ngadto sa Sosyedad. Unsay mitultol sa pagkadawat nila sa maong dungganong ganti?
Sa 1994 ang Watch Tower Society nagsumiter ug detalyadong analisis ngadto sa Health and Safety Executive (HSE) bahin sa kon unsaon pagpakunhod sa gidaghanon sa mga kadaot sa bukobuko panahon sa trabaho. Sa pagkatapos sa maong kampanya, ang Sosyedad nakadawat ug usa ka sertipiko sa HSE alang sa suportar niini. Sa 1996 ang Sosyedad gihangyo sa paghipos ug mubong taho bahin sa mga kalihokan niini bahin sa maayong panglawas ug kawalay-kapeligrohan. Ingong sangpotanan, usa ka sertipiko ang gipresentar ngadto sa “Watchtower Bible & Tract Society sa pag-ila sa ilang bililhong amot” ngadto sa maayong panglawas ug kawalay-kapeligrohan.
Sa pagkasunod tuig, 1997, ang HSE nagdapit sa Watch Tower nga mosalmot sa kampanya niini sa Uropanhong maayong panglawas ug kawalay-kapeligrohan. Sa lakat sa panahon ang Sosyedad misumiter ug usa ka detalyadong asoy, uban ang mga letrato, nga nagpakita nga pinaagi sa pagkonektar sa indibiduwal nga dekoryenteng galamiton ngadto sa pangunang tigkuha sa abog nga sistema, posible ang pagpakunhod sa abog gikan sa buhatan sa pamanday sa 90 porsiyento ug nagmenos sa mga pinisik nga kahoy sa 100 porsiyento, sa gastos nga ubos sa £250 ($400).
Ingong resulta, ang Sosyedad nahilakip sa 30 ka mananaog sa ganti nga gidapit sa paghimamat sa mga hawas sa Uropanhong Komisyon ug sa Britanikong gobyerno ingon man ang tsirman sa Komisyon sa Maayong Panglawas ug Kawalay-Kapeligrohan. Sa dihang nagpresentar sa panaksan, siya mikomento: “Maayong buhat, Watch Tower!”
[Mga hulagway sa panid 31]
Mga ganti nga gihatag ngadto sa Watch Tower tungod sa hataas niining mga sukdanan bahin sa maayong panglawas ug kawalay-kapeligrohan