Pagpangidnap—Usa ka Tibuok-Yutang Negosyo

SULOD sa miaging dekada, usa ka talagsaong pagdaghan sa mga pagpangidnap nahitabo sa tibuok kalibotan. Usa ka taho nag-ingon nga tali sa 1968 ug 1982, halos usa ka libo ang gikidnap gikan sa 73 ka nasod. Apan sa ulahing mga tuig sa 1990, gibanabana nga 20,000 ngadto sa 30,000 ka tawo ang gikidnap matag tuig.

Ang pagpangidnap maoy usa ka krimen nga daw uso sa mga kriminal gikan sa Rusya ngadto sa Pilipinas, uban sa mga kidnaper nga andam sa pagsakmit sa bisan unsang butang nga naglihok. Sa usa ka higayon usa ka masuso nga halos usa pa lang ka adlaw ang edad gikidnap. Sa Guatemala usa ka 84-anyos nga babaye nga nag-wheelchair gisakmit ug gitago sulod sa duha ka bulan. Sa Rio de Janeiro, ang mga bugoy sa dalan nanagpanakmit ug mga tawo diha mismo sa dalan, usahay mangayog ingon ka gamay sa $100 sa paglukat.

Bisan mga mananap dili luwas. Sa mga tuig nga milabay pipila sa bagag-nawong nga mga kriminal sa Thailand nangidnap ug sayis-toneladang luwanan nga elepante ug nangayog $1,500 nga lukat. Ang mga gang sa kriminal sa Mexico gikaingon nga nagdasig sa ilang bag-ong mga membro sa pagbansay pagpangidnap sa mga binuhi ug ubang mga hayop sa balay aron makakuhag igong eksperyensiya una pa sila mangidnap ug mga tawo.

Kaniadto, ang mga dato ray kidnapon sa mga kidnaper, apan nausab na ang panahon. Usa ka taho sa Reuters nag-ingon: “Ang pagpangidnap nahimo nang adlaw-adlaw nga panghitabo sa Guatemala, diin ang mga tawo maghandom sa mas maayong mga adlaw sa dihang ang mga rebelde nga gustog reporma mangidnap lang ug pipila ka dato nga negosyante. Karon dato ug pobre, batan-on ug tigulang, delikado sa mga grupo sa kidnaper.”

Ang gibantog nga mga kaso kasagaran hatagan ug dakong atensiyon sa palaumagian sa balita, apan ang kadaghanan sa mga pagpangidnap giareglo nga walay publisidad. Sa pagkatinuod, sa daghang katarongan, ang mga nasod “halos walay gana sa pagsibya sa problema sa pagpangidnap.” Hisgotan sa sunod artikulo ang pipila sa maong mga katarongan.

[Mapa sa panid 3]

(Alang sa aktuwal nga pagkahan-ay, tan-awa ang publikasiyon)

MEXICO

Duolan sa 2,000 ka tawo sa usa ka tuig ang ginapangidnap, ang pagpangidnap gitawag nga “usa ka gamayng organisadong negosyo.”

GRAN BRITANYA

Ang insyurans sa kidnap sa Lloyd’s of London misaka ug 50 porsiyento tuigtuig sukad sa 1990.

RUSYA

Sa Caucasus nga rehiyon sa habagatang Rusya lamang, ang gidaghanon sa gipangidnap misaka gikan sa 272 sa 1996 ngadto sa 1,500 sa 1998.

PILIPINAS

Sumala sa “Asiaweek,” “ang Pilipinas tingali mao ang sentro sa pagpangidnap sa Asia.” Kapin sa 40 ka organisadong mga gang sa pagpangidnap ang naglihok didto.

BRAZIL

Sa usa ka tuig ang mga kidnaper didto nakasapi ug $1.2 bilyong kuwarta nga gibayad sa paglukat.

COLOMBIA

Sa mga katuigang dili pa dugay libolibo ang gikidnap matag tuig. Sa Mayo 1999, gikidnap sa mga rebelde ang ginatos ka sakop sa parokya panahon sa usa ka Misa.

[Credit Line]

Mountain High Maps® Copyright © 1997 Digital Wisdom, Inc.