“Ginasaulog Mo ba ang Adlaw sa mga Apohang Babaye?”
USA kadto ka buntag sa tingtugnaw. Si Natalia, usa ka 16-anyos nga dalagita sa Polandia, naghulat ug tren sa dihang duha ka magsusulat sa lokal nga mantalaan ang miduol kaniya ug nangutana, “Ginasaulog mo ba ang Adlaw sa mga Apohang Babaye?”
Sa Polandia, ang Adlaw sa mga Apohang Babaye, Adlaw sa mga Apohang Lalaki, Adlaw sa mga Inahan, Adlaw sa mga Babaye, ug Adlaw sa mga Magtutudlo maoy espesyal nga mga adlaw. Naandan na sa mga bata nga saulogon ang Adlaw sa mga Apohang Babaye ug ang Adlaw sa mga Apohang Lalaki, pinaagi sa paghimog mga kard, samtang ang dodagko na nga mga bata mohatag ug mga regalo o mga bulak sa ilang mga apohan.
Sa sinugdan, wala makatingog si Natalia sa dihang gipangutana siya niana. Apan, human moampo sa hilom, iyang giingnan ang mga magsusulat, “Usa ako sa mga Saksi ni Jehova, ug wala ako magsaulog sa Adlaw sa mga Apohang Babaye.” Ang mga magsusulat morag natingala. Dayon si Natalia mipahiyom ug miingon: “Ako nagpuyo uban sa akong apohang babaye, busa ako siyang madad-an ug mga bulak, makaestorya, ug mapasalamatan sa iyang kalulot kada adlaw. Nganong kas-a sa usa ka tuig man lang nako siya pasidunggan?”
Nakadayeg ang mga magsusulat nianang makapahinuklog nga pahayag, ug seguradong nakadayeg ka usab niana. Pagkaugma ang buntagong mantalaan nagpatik sa gisulti ug sa letrato ni Natalia.
Dili ba kining maong panig-ingnan magtukmod kanimo sa pagsukna sa imong kaugalingon kon andam ka ba usab nga modepensa sa imong pagtuo ug panggawi, ilabina sa dihang pangutan-on ka nga wala nimo damha? Ang matuod nga mga magsisimba sa Diyos maningkamot sa pagpasidungog kaniya pinaagi sa pagkaandam kanunay sa pagdepensa sa ilang gituohan ug pinaagi sa kinabubut-ong paghimo niana kon posible.—1 Pedro 3:15.