Unsay Hinungdan sa Problema?

DILI makataronganon ang pagdahom nga walay motunghang problema diha sa kaminyoon. Kon buot hunahunaon, bisan gani ang mga magtiayon nga parison kaayo dili magkauyon sa pipila ka butang. Busa, dili gayod kalikayan nga motungha ang mga problema. Maingon nga ang taya mokutkot bisan sa puthaw nga pinintalan, may mga butang usab nga makapahuyang sa kaminyoon. Aron masayran nato kon sa unsang paagi molig-on ang kaminyoon, susihon una nato ang pipila ka hinungdan sa problema.

Panahon sa Daghang Problema

Ang Bibliya nagtagna nga sa atong panahon daghan ang “magmahigugmaon sa ilang kaugalingon, magmahigugmaon sa salapi, mapagawalon, mapahitas-on, . . . dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo.” (2 Timoteo 3:2-4) Kini nga mga taras makapasamot sa dili-pagsinabtanay, ug gumikan sa pagkadili-hingpit ang usa dali rang makasultig masakit nga mga pulong.

“Makapalibog kon nganong ingon niini ang kahimtang sa kaminyoon,” nag-ingon ang usa ka tigdukiduki. “Mabatonan nato karon ang daghan kaayong impormasyon kon sa unsang paagi molig-on ang kaminyoon . . . [apan] kita nag-atubang ug daghang problema maylabot sa komunidad ug ekonomiya nga makapalisod sa paghupot ug malipayong kaminyoon.”

Dili-Makataronganong mga Panahom

“Ang dili-makataronganong mga panahom,” matod pa sa usa ka terapista sa kaminyoon, “maoy usa sa pangunang hinungdan sa kawalay-katagbawan diha sa kaminyoon.” Daghang minyo ang nahugno sa dihang wala matuman ang ilang gidahom bahin sa kaminyoon ug sa dihang ilang nadiskobrehan nga ang ilang kapikas lahi ra kaayo kay sa ilang gidahom. Sila nahigawad pag-ayo sa mga kahuyangan sa ilang kapikas nga wala nila makita kaniadto o mga gawi nga ilang gihunahuna nga pwede rang palabyon.

Apan ang Bibliya matinud-anong nag-ingon nga ang kaminyoon magpahinabog “kasakit ug kagul-anan.” (1 Corinto 7:28, The New English Bible) Ngano? Tungod sa pagkadili-hingpit, sa madugay o madali, ang magtiayon masayop gayod.

Dugang pa, daghan ang nagtuo nga magmalipayon ang ilang kaminyoon bisag wala ra silay himoon. Kay nabutaan sa panghunahuna nga ang kaminyoon lunlon kalipay, ilang giisip nga sila walay tulubagon ug dili na kinahanglang maningkamot pa aron matukod ang malipayong kaminyoon. Kon dili matuman ang ilang mga panahom, sila mahigawad ug maglibog. Kasagaran, kon taas kaayo ang ilang panahom maylabot sa kaminyoon, mas dako usab ang ilang bationg kahigawad.

Sayop nga Paagi sa Pagpakigsulti

Unsang sayop nga paagi sa pagpakigsulti ang angayng likayan aron molig-on ang kaminyoon? Bisag nag-estoryahanay, ang pipila ka magtiayon napakyas tingali sa pagsabot sa tinuod nga gibati sa ilang kapikas. Ang mainiton ug mahigugmaong pagsultianay napulihan sa mugbong panag-estoryahay bahin sa mga kinahanglanon sa pamilya. Ang mapuslanon ug madayganong pagsultianay napulihan sa walay-hunong nga paglalisay bahin sa bisan unsang butang. Kon masaypag sabot sa usa ang gisulti sa iyang kapikas hayan nga mosangko kini sa panag-away, ug ang pagpanginsulto balosan ug pagpakigbungol.

Ikasubo nga daghang magtiayon ang wala makamatikod sa dalayegong buhat sa ilang kapikas o kon nakamatikod man, wala nila kana pabilhi. Dugang pa, kadaghanan sa mga magtiayon karon parehong nanarbaho, busa daghang asawa ang nahimong masuk-anon tungod kay pag-uli nila, halos ila ra tanan ang buluhaton sa balay. Gawas pa niana, daghang asawa ang mibati nga wala tagda ang ilang emosyonal nga panginahanglan.

Unsay imong mahimo aron magmalamposon ang imong kaminyoon? Tagda ang mosunod nga praktikal nga mga tambag gikan sa Bibliya.

[Blurb sa panid 4]

Bisag nag-estoryahanay, ang pipila ka magtiayon napakyas tingali sa pagsabot sa tinuod nga gibati sa ilang kapikas

[Blurb sa panid 5]

Daghan ang nagtuo nga magmalipayon ang ilang kaminyoon bisag wala ra silay himoon