Dili Basta-basta nga Utok sa Arctic Ground Squirrel

SA DIHANG ang naglagumlom o nag-hibernate nga arctic ground squirrel magsugod sa pagkatulog sa ting-snow, ang temperatura sa iyang lawas mobugnaw. Kutob unsa ka bugnaw? Daw naabot sa 12 ka arctic ground squirrel ang kinaubsang rekord​—sa dihang ang temperatura sa ilang lawas mius-os ug -2.9 grado Celsius! Niana nga temperatura, magtuo ta nga mobagtok na sa kabugnaw ang ilang utok. Pero nganong buhi gihapon sila?

Hunahunaa: Matag duha o tulo ka semana sa paglagumlom, sila magpangurog sa pagpabalik sa ilang normal nga temperatura nga 36.4 grado Celsius ug dili sila mobalik ug kakamig sulod sa mga 12 ngadto sa 15 oras. Ang mga siyentista nag-ingon nga kining yugto sa pagpainit sa lawas, bisag daklit lang, dakong tabang aron ang utok dili mamatay. Dugang pa, sa dihang sila maglagumlom, ang ilang ulo medyo mas init kay sa ilang lawas. Sa giobserbahan sila sa laboratoryo, ang temperatura diha sa ilang liog wala moubos ug 0.7 grado Celsius.

Inigmata nila gikan sa ilang paglagumlom, ang ilang utok mobalik ug obra sulod sa mga duha ka oras. Gani, gipakita sa usa ka panukiduki nga ang ilang utok mas moobrag maayo human sa dugayng pagkatulog! Ang mga siyentista nahibulong nga dali kaayong maulian ang ilang utok. Ilang gipakasama kini sa paggitib sa bag-ong turok gikan sa sunog nga yuta pipila lang ka adlaw human sa pagkasunog sa lasang.

Ang mga siyentista naglaom nga ang ilang pagtuon sa arctic ground squirrel makatabang kanila sa pagkuhag dugang kahibalo bahin sa katakos sa utok sa tawo. Gusto nila nga mouswag pa ang ilang kahibalo kon unsaon pagsanta o pagpauli sa pagkadaot sa selula nga resulta sa mga sakit sa utok, lakip sa Alzheimer o pagkaango-ango.

Unsay imong hunahuna? Ang dili basta-basta nga utok sa arctic ground squirrel mitungha ba pinaagig ebolusyon? O kini ba gidisenyo?