Ang mga Gear sa Issus Leafhopper

ANG mga gear o enggranahe sa mga makina dugay nang gituohan nga maoy bunga sa abilidad sa tawo. Pero dili kana tinuod! Ngano? Ang moakob nga mga gear nadiskobrehan diha sa usa ka insekto—ang bata pa nga Issus leafhopper nga makita sa mga hardin sa tibuok Europe.a

Ang bata pa nga leafhopper makalukso sa gikusgon nga 3.9 metros kada segundo sa duha lang ka millisecond, nga ang lawas niini iyang ipaulpot ug halos 200 ka pilo sa puwersa sa grabidad! Dili pa gani ka mahuman ug pamilok mawala na kini sa imong panan-aw. Aron makaluksog kusog, kinahanglang ang duha ka pangulahiang tiil sa insekto mangusog nga parehas ug puwersa ug magdungan paglukso. Unsay sekreto niini?

Hunahunaa: Ang mga siyentista nakadiskobre ug duha ka moakob nga mga gear sa punoan sa paa sa duha ka pangulahiang tiil sa insekto. Tungod niini nga mga gear, ang duha ka tiil sa insekto magkadungan paglukso. Kay kon dili, ang insekto mokaliring!

Ang dagko nang insekto nagdepende sa signal sa ilang utok dihang molukso aron magkadungan ang ilang mga tiil. Pero sa bata pa nga leafhopper, ang pagpasag signal gikan sa utok hinay pa kaayo. Busa sila nagdepende sa ilang mga gear nga moakob. “Abi nato nga ang mga gear makita lang diha sa mga makina nga gidisenyo sa tawo,” nag-ingon ang awtor ug tigpanukiduki nga si Gregory Sutton. Siya midugang, “kita wala lang gyod maningkamot sa pagpangita [diha sa kinaiyahan].”

Unsay imong hunahuna? Ang gear ba sa Issus leafhopper mitungha pinaagig ebolusyon? O kini ba gidisenyo?