Mahimong Maayong Mopakigsulti!
1 Aron matuman ang atong sugo nga pagsangyaw ug paghimog mga tinun-an, kinahanglan natong ipaambit ang impormasyon ngadto sa uban. (Mat. 24:14; 28:19, 20) Ang pagpakigsulti dili sayon bisan taliwala sa mga higala. Unsay makatabang kanato aron maabot ang mga di-kaila dala ang maayong balita?
2 Di-Kaila nga Nahimong Higala: Sulaying ibutang ang imong kaugalingon sa dapit niadtong imong duolon diha sa ministeryo. Niining kalibotana, masabot nga ang pipila tingali matahapon, o mahadlokon pa gani, sa mga di-kaila. Kini makapugong sa pagpakigsulti. Unsaon nimo pagbuntog ang unang pagduhaduha niadtong imong mahibalag? Sa dili pa gani kita mosulti, usa ka paagi sa pagpakigsulti mao ang atong makasaranganong personal nga panagway. Ang atong hapsay nga panapot ug ligdong nga batasan makatabang sa pagpuypoy sa kahadlok.—1 Tim. 2:9, 10.
3 Ang laing tabang sa pagpakigsulti mao ang kalmado, mahigalaon nga batasan. Makatabang kini sa pagpakalma sa uban ug maghimo kanilang mas mapatalinghogon. Ang maayong pagpangandam maoy gikinahanglan niining bahina. Kon tin-aw sa atong hunahuna ang atong igsusulti, dili kaayo kita kulbaan. Ug kining atong malinawong panghunahuna makadani sa uban ngadto sa atong mensahe. Mao kini ang giingon sa usa ka babaye bahin sa pagduaw sa usa ka Saksi: “Ang akong nahinumdoman bahin sa iyang mapahiyomon nga panagway mao ang panagdait. Nainteres gayod ako.” Kini nag-abli sa dalan aron ang maong babaye maminaw sa maayong balita.
4 Mga Hiyas nga Makapadani: Kita kinahanglang magbaton ug tim-os personal nga interes sa uban. (Filip. 2:4) Ang usa ka paagi sa paghimo niini mao nga dili mopasulabi sa panaghisgot. Sa pagkatinuod, ang pagpakigsulti naglakip usab sa pagpaminaw. Kon atong dapiton ang atong mamiminaw sa pagpahayag sa ilang kaugalingon ug kita maminaw nga may interes sa ilang mga komento, ilang mamatikdan nga kita may pagtagad kanila. Busa sa dihang mosulti ang imong mamiminaw, ayaw dayon ug sagbat aron ipahigayon ang imong giandam nga presentasyon. Dayega sila kon mahimo mo kana sa tim-os nga paagi, ug sulayi sa pagpahiuyon sa imong mga komento pinasukad sa ilang gisulti. Kon ang ilang mga komento nagbutyag ug usa ka butang nga ilang gikabalak-an pag-ayo, ipahiuyon ang imong presentasyon aron matagad ang ilang mga gikabalak-an.
5 Ang pagkamakasaranganon ug pagkamapainubsanon sa hunahuna mopatunhay sa pagsultihanay. (Prov. 11:2; Buh. 20:19) Ang mga tawo nadani ngadto kang Jesus tungod kay siya “malumog-buot ug mapainubsanon sa kasingkasing.” (Mat. 11:29) Sa laing bahin, ang tinamdan nga nagpaimportante-sa-kaugalingon makapasibog. Busa, bisan tuod kombinsido kaayo kita nga anaa kanato ang kamatuoran, maalamon natong likayan ang pagsulti sa dogmatikong paagi.
6 Komosta man kon ang mga komento sa maong tawo nagpakita sa mga pagtuo nga dili sibo sa pagtulon-an sa Bibliya? Obligado ba kita sa pagtul-id kaniya? Oo, sa ngadtongadto, apan dili nato angayng buhaton kana sa unang pagduaw. Kasagarang mapuslanon ang paghisgot sa mga ideya nga gikauyonan ninyong duha sa dili pa ipaambit ang mga pagtulon-an sa Bibliya nga mahimong malisod kaniya sa pagdawat. Nagkinahanglan kinig pailob ug taktika. Si Pablo naghatag ug maayong panig-ingnan niining bahina sa dihang nagpamatuod ngadto sa mga maghuhukom sa Areopago.—Buh. 17:18, 22-31.
7 Labaw sa tanan, ang di-mahakogong gugma motabang kanato nga mahimong epektibo bahin sa pagpakigsulti. Sama kang Jesus, kita kinahanglang maluoy sa mga tawo nga “pinanitan ug nagkatibuagsa sama sa mga karnero nga walay magbalantay.” (Mat. 9:36) Kini magtukmod kanato sa pagdala kanila sa maayong balita ug sa pagtabang kanila sa pagsubay sa dalan sa kinabuhi. Dala nato ang mensahe sa gugma, busa padayon natong isulti kini sa mahigugmaong paagi. Sa pagbuhat niana, atong gisundog si Jehova nga Diyos ug si Jesu-Kristo—ang labing maayo maylabot sa pagpakigsulti diha sa uniberso.