Si Jehova ug si Kristo—Kinalabwang mga Tigpahayag

“Ang Soberanong Ginoong Jehova dili mohimo sa usa ka butang gawas nga iyang napadayag ang iyang butang tinago ngadto sa iyang mga alagad ang mga manalagna.”—AMOS 3:7.

1. Unsang mga paagi sa komunikasyon o pagpahayag ang gigamit karong adlawa?

KARONG ADLAWA ang komunikasyon o pagpahayag maoy usa ka multimilyong dolyar nga negosyo. Ang tanang libro nga gipatik, ang tanang mantalaan ug magasin nga gipatik nga regular, tanang programa sa radyo ug telebisyon nga gisibya, ingon man tanang pelikula ug mga dula sa entablado, maoy mga paningkamot sa pagpahayag. Matuod usab kana sa tanang sulat nga gisulat ug gipadala ingon man ang tanang tawag sa telepono. Ang tanan maoy paningkamot sa komunikasyon o pagpahayag.

2. Unsa ang pila ka panig-ingnan sa mga kauswagan nga nahimo sa mga tawo sa teknikal nga mga bahin sa komunikasyon o pagpahayag?

² Ang mga kauswagan nga nahimo sa mga tawo diha sa teknikal nga mga bahin sa pagpahayag maoy makapahingangha. Pananglitan, ang fiber-optic nga mga kable, nga labi pang maayo kay sa mga kableng tumbaga, makadalag tinagpulo ka libong estoryahay sa telepono sa usa ka panahon. Unya anaa ang mga satelayt sa komunikasyon, nga nagatuyok sa yuta diha sa kawanangan ug dunay kasangkapan sa pagpasag mga signal sa telepono, telegrama, radyo, ug telebisyon. Ang usa niana nga satelayt makadumala nga dungan sa 30,000 ka mensahe sa telepono!

3. Unsay mahitabo kon adunay mga kal-ang sa komunikasyon?

³ Apan bisan pa niining tanang paagi sa komunikasyon, adunay dako kaayong kagul-anan sa kalibotan tungod sa kakulang sa komunikasyon o pagpahayag taliwala sa tinagsa ka mga tawo. Busa, gitug-anan kita “adunay nagdakong bung-aw​—nagkalapad nga ‘kal-ang sa komunikasyon’—​tali sa mga magmamando ug sa gimandoan.” Ug unsa ba ang kasagarang gitawag nga kal-ang sa kaliwatan? Dili ba kini mao ang kapakyasan sa mga ginikanan ug sa ilang mga anak nga malamposong magpahayagay sa usag usa? Nagtaho ang mga magtatambag sa kaminyoon nga ang kinadak-ang suliran sa mga kaminyoon mao ang kapakyasan sa pagpahayag tali sa bana ug asawa. Ang kakulang sa hustong pagpahayag makapahinabo pa sa kamatayon. Sa sinugdan sa 1990, 73 ka tawo ang namatay sa usa ka pagkahulog sa ayroplano, nga dayag ang nakaamot nga hinungdan mao ang kapakyasan sa pagpahayagay tali sa abyador ug sa kontrol sa yuta. Usa ka ulohan sa mantalaan nagpahayag: “Babag sa Komunikasyon Misangpot sa Trahedya.”

4. (a) Unsay kahulogan sa “komunikasyon” o pagpahayag? (b) Unsa ang tumong sa Kristohanong pagpahayag?

⁴ Unsa ang komunikasyon o pagpahayag diha sa Kristohanong kahimtang? Sumala sa usa ka diksiyonaryo, ang “komunikasyon” o pagpahayag nagkahulogan sa “pagpasag impormasyon, hunahuna, o pagbati mao nga kini tukmang madawat o masabot.” Ang laing diksiyonaryo nagbatbat niini ingong “usa ka teknik sa pagpahayag ug mga ideya sa epektibong paagi.” Matikdi, “pagpahayag ug mga ideya sa epektibong paagi.” Ang Kristohanong pagpahayag kinahanglan ilabina nga maepektibo kay kini may tumong sa pag-abot sa mga kasingkasing sa mga tawo sa kamatuoran gikan sa Pulong sa Diyos mao nga, gilaoman, sila molihok pinasukad sa ilang nakat-onan. Sa linain, kini gidasig sa pagkadili-hakog, sa gugma.

Si Jehova Ingong Tigpahayag

5. Unsa ang usa sa unang mga paagi nga si Jehova nga Diyos nakigsulti sa tawo?

⁵ Si Jehova nga Diyos sa walay pagduhaduha mao ang kinadak-ang Tigpahayag. Kay kita iyang gilalang diha sa iyang dagway ug kasamahan, siya makaarang sa pagpahayag kanato, ug posible nga kita makapahayag sa uban bahin kaniya. Sukad gayod sa pagkalalang sa tawo, si Jehova nagpahayag ngadto sa iyang yutan-ong mga linalang bahin sa iyang kaugalingon. Usa ka paagi nga iyang gibuhat kini maoy pinaagi sa iyang makita nga kalalangan. Busa, ang salmista nagsugilon kanato: “Ang mga langit nagapahayag sa himaya sa Diyos; ug ang hawan nagasugilon sa buhat sa iyang mga kamot. Ang adlaw ngadto sa adlaw nagapamulong, ug ang gabii ngadto sa gabii nagapadayag ug kahibalo.” (Salmo 19:1, 2) Ug ang Roma 1:20 nagapahibalo kanato nga ang “dili makita nga mga hiyas sa Diyos tin-aw nga makita sukad sa pagkalalang sa kalibotan paunahan.” Ang “tin-aw nga makita” nagpasabot sa epektibong pagpahayag!

6. Unsay gipahayag ni Jehova ngadto sa iyang yutan-ong mga linalang samtang sila didto sa tanaman sa Eden?

⁶ Kadtong walay pagtuo sa Diyos ug sa iyang balaang pinadayag magpatuo kanato nga ang tawo kinahanglang magsalig sa iyang kaugalingong tinubdan sa kasayoran sa pagtino kon nganong ang tawo naglungtad. Apan ang Pulong sa Diyos nagtin-aw nga ang Diyos nakigsulti sa tawo sukad sa sinugdan. Busa, sa unang lalaki ug babaye ang Diyos mipahayag sa sugo sa pagsanay: “Magmabungahon kamo ug dumaghan ug pun-a ang yuta ug dag-a kini, ug magbaton ug pagbulot-an . . . sa tanang buhing linalang.” Gitugot usab sa Diyos nga sila mokaon sa ilang katagbawan sa mga bunga sa kahoy sa tanaman​—nga may usa ra ka eksepsion. Dayon, sa dihang si Adan ug Eva misupak, gipahayag ni Jehova ang unang Mesiyanikong saad, nga naghatag sa tawo ug silaw sa paglaom: “Igabutang ko ang panagkaaway tali kanimo [ang bitin] ug sa babaye ug tali sa imong binhi ug sa iyang binhi. Ikaw pagasamaran niya sa ulo ug siya pagasamaran nimo sa tikod.”​—Genesis 1:28; 2:16, 17; 3:15.

7. Unsay gipadayag sa basahong Genesis bahin sa pagpakigsulti ni Jehova sa iyang mga alagad?

⁷ Sa dihang ang anak ni Adan si Cain nahupong sa mopatay nga kasina, si Jehova nga Diyos nakigsulti kaniya, nga miingon sa pagkamatuod: ‘Pagbantay! Ikaw nagpadulong sa kadaotan!’ Apan si Cain wala mamati sa maong pasidaan ug mipatay sa iyang igsoon. (Genesis 4:6-8) Dayon, sa dihang ang yuta napuno sa kabangisan ug pagkadaotan, si Jehova nagpahayag ngadto sa matarong nga tawo si Noe sa Iyang katuyoan sa paghinlo sa yuta sa tanang naghugaw niana. (Genesis 6:13–7:5) Tapos sa Lunop, sa dihang si Noe ug ang iyang pamilya migawas sa arka, gipahayag ni Jehova ngadto kanila ang iyang katuyoan bahin sa pagkabalaan sa kinabuhi ug sa dugo, ug pinaagi sa balangaw iyang gipasalig nga dili na gayod niya laglagon pag-usab ang tanang buhing butang pinaagi sa usa ka lunop. Pila ka siglo sa ulahi, gipahayag ni Jehova kang Abraham ang Iyang katuyoan nga ang tanang banay sa katawhan mapanalanginan sa iyang kaugalingon pinaagi sa Binhi ni Abraham. (Genesis 9:1-17; 12:1-3; 22:11, 12, 16-18) Ug sa dihang gihukom sa Diyos nga iyang laglagon ang mga mahilayon sa Sodoma ug Gomorra, mahigugmaon niyang gipahayag kanang kamatuorana ngadto kang Abraham, nga miingon: “Gitagoan ko ba gikan kang Abraham ang akong ginabuhat?”​—Genesis 18:17.

8. Sa unsang upat ka paagi nga si Jehova nakigsulti sa iyang mga alagad sa yuta?

⁸ Sugod kang Moises, gigamit ni Jehova ang taas nga linya sa mga manalagna sa pagpakigsulti sa Israel. (Hebreohanon 1:1) May panahon nga iyang gigamit ang binaba nga pagdiktar, sama sa dihang iyang giingnan si Moises: “Isulat mo kining mga pulonga.” (Exodo 34:27) Labi pang subsob si Jehova nakigsulti sa iyang mga tigpamaba pinaagi sa mga panan-awon, sama sa iya nang gihimo kang Abraham.a Gigamit usab ni Jehova ang mga damgo sa pagpahibalo kanila, ug dili lamang sa iyang mga alagad kondili sa mga tawo usab nga may mga pakiglabot sa iyang mga alagad. Pananglitan, gipahinabo ni Jehova nga ang duha sa kaubang mga binilanggo ni Jose magbaton ug mga damgo, nga gihubad ni Jose alang kanila. Gipahinabo usab ni Jehova nga si Paraon ug si Nabukodonosor magbaton ug mga damgo, nga gihubad alang kanila sa iyang mga alagad nga si Jose ug si Daniel. (Genesis 40:8–41:32; Daniel, kapitulo 2 ug 4) Dugang pa, sa daghang higayon gigamit ni Jehova ang mga manulonda ingong mensahero aron makigsulti sa iyang mga alagad.​—Exodo 3:2; Maghuhukom 6:11; Mateo 1:20; Lucas 1:26.

9. Unsay nagdasig kang Jehova sa pagpakigsulti sa iyang katawhang Israel, sumala sa makita sa unsang mga pahayag niya?

⁹ Kanang tanang pagpahayag ni Jehova pinaagi sa iyang mga manalagna misumbalik-silaw sa iyang gugma alang sa iyang katawhang Israel. Ingong pananglitan, iyang gipahayag pinaagi sa iyang propetang si Ezekiel: “Ako nagakalipay, dili sa kamatayon sa usang daotan, kondili nga ang usa nga daotan motalikod sa iyang dalan ug magpadayong buhi. Tumalikod kamo, tumalikod kamo sa inyong daotang mga dalan, kay ngano nga kamo mamatay man, O balay sa Israel?” (Ezekiel 33:11) Si Jehova maoy taas-ug-pailob ug mainantosong Tigpahayag sa iyang rebelyosong katawhan sa karaan, sumala sa makita gikan sa 2 Cronicas 36:15, 16: “Si Jehova ang Diyos sa iyang mga amahan nagpadayon sa pagpadala batok kanila pinaagi sa iyang mga mensahero, nga nagpadala nga balikbalik, tungod kay siya naluoy sa iyang katawhan ug sa iyang puluy-anan. Apan sila . . . nagtamay sa iyang mga pulong ug nagbugalbugal sa iyang mga manalagna . . . hangtod nga wala nay pagkaayo.”

10. Sa unsang paagi si Jehova nakigsulti sa iyang katawhan karong adlawa, ug sa unsang gidak-on siya mao ang Diyos sa pagpahayag?

¹⁰ Karong adlawa, kita may dinasig nga Pulong sa Diyos, ang Balaang Bibliya, nga pinaagi niana si Jehova nagpahayag kanato sa kasayoran mahitungod sa iyang kaugalingon, iyang mga katuyoan, ug iyang kabubut-on alang kanato. (2 Timoteo 3:16, 17) Sa pagkamatuod, sumala sa gipahayag sa Kinalabwang Tigpahayag, si Jehova: “Ang Soberanong Ginoong Jehova dili mohimo sa usa ka butang gawas nga iyang napadayag ang iyang tinago nga butang ngadto sa iyang mga alagad ang mga manalagna.” (Amos 3:7) Iyang gipahibalo ngadto sa iyang mga alagad kon unsay iyang pagabuhaton.

Ang Anak sa Diyos Ingong Tigpahayag

11. Kinsa ang kinalabwang galamiton ni Jehova sa pagpakigsulti sa tawo, ug nganong ang iyang titulong “ang Pulong” angayan?

¹¹ Sa tanang mga tinugyanan nga gigamit ni Jehova sa pagpahibalo sa Iyang kabubut-on, ang kinalabwan mao ang Pulong, ang Logos, nga nahimong si Jesu-Kristo. Unsa ang kahulogan sa iyang pagkagitawag ang Pulong, o Logos? Nga siya mao ang Pangulong Tigpamaba ni Jehova. Ug unsa ang usa ka tigpamaba? Usa nga magpahayag kon unsay isulti sa lain. Busa ang Logos nahimong ang tigpahayag sa pulong ni Jehova nga Diyos ngadto sa Iyang intelihenteng yutan-ong kalalangan. Kanang papela hinungdanon kaayo nga siya gitawag ang Pulong.​—Juan 1:1, 2, 14.

12. (a) Alang sa unsang katuyoan nga si Jesus mianhi sa yuta? (b) Unsay nagapamatuod sa iyang matinumanong pagtuman sa maong katuyoan?

¹² Si Jesus mismo misulti kang Poncio Pilato nga ang iyang pangunang katuyoan sa pag-anhi sa yuta mao ang pagpahayag sa kamatuoran ngadto sa katawhan: “Tungod niini ako gipakatawo, ug tungod niini ako mianhi sa kalibotan, aron ako magapamatuod sa kamatuoran.” (Juan 18:37) Ug ang talaan diha sa mga Ebanghelyo nagsugilon unsa ka maayo ang pagtuman niya sa maong buluhaton. Ang iyang Wali sa Bukid giila ingong labing talagsaong wali nga sukad giwali sa usa ka tawo. Pagkamaayo ang iyang pagpahayag pinaagi sa maong wali! “Ang sangpotanan mao nga ang mga panon sa mga tawo [nga nakadungog sa wali] nahingangha sa iyang paagi sa pagpanudlo.” (Mateo 7:28) Mahitungod sa laing okasyon, atong mabasa: “Ang dakong panon nagpatalinghog kaniya uban sa kahimuot.” (Marcos 12:37) Sa dihang ang pila ka polis gisugo sa pagdakop kang Jesus, sila namalik nga wala makadala kaniya. Ngano? Gitubag nila ang mga Pariseo: “Wala pa gayoy tawo ang nakasulti sama niining tawhana.”​—Juan 7:46.

Mga Tinun-an ni Kristo Gisugo nga Mahimong mga Tigpahayag

13. Unsay nagpadayag nga si Kristo wala matagbaw sa pagkanag-inusarang tigpahayag?

¹³ Kay wala matagbaw sa pagkanag-inusarang tigpahayag, gisugo una ni Jesus ang 12 ka apostoles ug dayon ang 70 ka ebanghelista sa paglakaw ingong mga tigpahayag sa maayong balita sa Gingharian. (Lucas 9:1; 10:1) Unya sa dayon na niyang pagkayab ngadto sa langit, gisugo niya ang iyang mga tinun-an sa paghimo sa usa ka linaing buluhaton. Unsang buluhatona? Sumala sa atong mabasa sa Mateo 28:19, 20, gisugo niya sila nga mahimong mga tigpahayag; ug pagatudloan pa usab nila ang uban aron mahimong mga tigpahayag.

14. Unsa ka epektibo ang unang Kristohanong mga tigpahayag?

¹⁴ Ang mga tinun-an ba epektibong mga tigpahayag? May lain pa! Ingong sangpotanan sa ilang pagwali sa adlaw sa Pentekostes 33 K.P., 3,000 ka kalag nadugang sa bag-ong napormang Kristohanong kongregasyon. Sa wala madugay ang gidaghanon miuswag ngadto sa 5,000 ka lalaki. (Buhat 2:41; 4:4) Dili katingad-ang ang ilang Hudiyong mga kaaway nagsumbong nga ilang gipuno ang tibuok Jerusalem sa ilang pagtulon-an ug sa ulahi mireklamo nga ilang gibalit-ad ang gipuy-ang yuta sa ilang pagsangyaw.​—Buhat 5:28; 17:6.

15. Unsang galamiton ang gigamit ni Jehova sa mga panahon karon sa pagpakigsulti sa mga tawo?

¹⁵ Komosta ang mga panahon karon? Sumala sa gitagna sa Mateo 24:3, 45-47, ang Agalon, si Jesu-Kristo, nagtudlo sa “matinumanon ug maalamong ulipon,” nga gilangkoban sa dinihogang mga Kristohanon, sa pag-atiman sa tanan niyang katigayonan sa yuta niining adlawa sa iyang presensiya. Ang maong matinumanon ug maalamong ulipon gihawasan karong adlawa sa Nagamandong Lawas sa mga Saksi ni Jehova, nga ang tigmantala nga galamiton niini mao ang Watch Tower Bible and Tract Society. Labing angay, ang maong matinumanon ug maalamong ulipon gitawag usab nga kanal-galamiton sa komunikasyon sa Diyos. Kini, sa baylo, nagdasig kanato nga mahimong mga tigpahayag. Sa pagkamatuod, ang una mismong isyu sa Zion’s Watch Tower and Herald of Christ’s Presence nagtambag sa iyang mga magbabasa: “Kon ikaw may silingan o higala nga sa imong hunahuna maikag o makabatog kaayohan sa mga instruksiyon [niining magasina], imong maawhag sa ilang pagtagad ang maong instruksiyon; sa ingon magawali sa Pulong ug magabuhat ug maayo sa tanang tawo sumala sa imong mabatonang kahigayonan.”

16. Unsay nagpadayag nga labaw ang gikinahanglan kay sa pagbasa lamang sa Bibliya aron ang Diyos makigsulti nga epektibo sa iyang yutan-ong mga alagad?

¹⁶ Bisan pa niana, ang pagbaton lamang sa Pulong sa Diyos ug pagbasa niini sa personal dili igo aron mabatonan ang tukmang kahibalo nga magpasubay sa usa sa dalan sa kinabuhi. Nahinumdoman mo ba ang Etiopianhong opisyal sa korte nga nagbasa sa tagna ni Isaias apan wala makasabot sa iyang gibasa. Si Filipe nga ebanghelista nagsaysay sa tagna ngadto kaniya, nga human niadto siya andam nga mabawtismohan ingong usa ka tinun-an ni Kristo. (Buhat 8:27-38) Nga labaw pa ang gikinahanglan kay sa pagbasa lang sa Bibliya sa kaugalingon masabot gikan sa Efeso 4:11-13, diin gipadayag ni Pablo nga si Kristo dili lamang naghatag sa pipila ingong dinasig nga mga apostoles ug mga manalagna kondili naghatag usab sa “pipila ingong mga ebanghelista, sa pipila ingong mga magbalantay ug mga magtutudlo, uban sa panglantaw sa pagpasibo pag-usab sa mga balaan, alang sa ministeryal nga buluhaton, alang sa paglig-on sa lawas ni Kristo, hangtod nga kitang tanan mahidangat sa pagkausa sa pagtuo ug sa tukmang kahibalo sa Anak sa Diyos, ngadto sa usa ka bug-os nakatubong tawo.”

17. Pinaagi sa unsang mga ilhanan nga atong mailhan ang galamiton nga gigamit karong adlawa ni Jehova sa pagpahayag sa iyang mga katuyoan sa katawhan?

¹⁷ Sa unsang paagi atong mailhan kadtong si kinsa gigamit ni Jehova nga Diyos ug ni Jesu-Kristo sa pagtabang sa mga tawo nga mahimong mga Kristohanon sa paghidangat sa kahimtang sa usa ka bug-os nakatubong tawo? Sumala kang Jesus, usa sa mga ilhanan mao nga kini sila maghigugmaay sa usag usa maingon nga gihigugma ni Jesus ang iyang mga sumusunod. (Juan 13:34, 35) Laing ilhanan: Sila dili bahin sa kalibotan, maingon nga si Jesus dili bahin sa kalibotan. (Juan 15:19; 17:16) Ang lain pa gayong ilhanan mao nga ilang pagailhon ang Pulong sa Diyos ingong ang kamatuoran, sama kang Jesus, pinaagi sa mapinadayonong pagtumong niini ingong awtoridad. (Mateo 22:29; Juan 17:17) Ang pagbutang sa ngalan sa Diyos sa unahan, sama sa gihimo ni Jesus, maoy laing ilhanan. (Mateo 6:9; Juan 17:6) Ug ang lain pang ilhanan mao ang pagsunod sa panig-ingnan ni Jesus sa pagwali sa Gingharian sa Diyos. (Mateo 4:17; 24:14) Adunay usa lang ka grupo nga nakakab-ot niining mga kinahanglanona, nga mao ang internasyonal nga mga tigpahayag nga nailhang Kristohanong mga Saksi ni Jehova.

18. Unsang tulo ka natad sa komunikasyon o pagpahayag ang pagahisgotan sa dugang mga artikulo?

¹⁸ Ugaling, ang pagpahayag o komunikasyon nagkahulogan sa katungdanan ngadto sa uban. Ang mga Kristohanon may katungdanan sa pagpahayag kang kinsa? Sa panguna, adunay tulo ka natad diin ang mga Kristohanon mabalak-on gayod sa paghupot nga bukas sa mga linya sa komunikasyon: ang pamilya, ang Kristohanong kongregasyon, ug ang Kristohanong kanataran sa ministeryo. Ang mosunod nga mga artikulo maghisgot niining mga bahina sa atong ulohan.

[Footnote]

Unsaon Nimo Pagtubag?

◻ Unsang kadaot ang mahimong mosangpot sa kakulang sa komunikasyon?

◻ Kinsa ang duha ka kinalabwang mga tigpahayag?

◻ Unsang lainlaing paagi ang gigamit sa Diyos aron makigsulti sa tawo?

◻ Sa unsang paagi si Jesus milabaw ingong tigpahayag?

◻ Unsa ka malamposon ang unang mga Kristohanon sa pagpahayag?

[Hulagway sa panid 18]

Sama sa iyang langitnong Amahan, si Jesus maoy maluluy-on nga tigpahayag