Epektibong Paggamit sa Makitang mga Tabang

NGANONG gamiton ang makitang mga tabang sa imong pagpanudlo? Kay ang pagbuhat niana mas makapaepektibo sa imong pagpanudlo. Si Jehova nga Diyos ug si Jesu-Kristo migamit ug makitang mga tabang, ug kita makakat-on gikan kanila. Sa dihang ang makitang mga tabang duyogan sa gilitok nga pulong, ang impormasyon ginadawat agi sa duha ka sentido. Makatabang kini sa paghupot sa atensiyon sa imong mamiminaw ug makapalig-on sa epekto niana. Sa unsang paagi ikalakip mo ang makitang mga tabang diha sa imong mga presentasyon sa maayong balita? Sa unsang paagi makatino ka nga epektibo ang imong paggamit niini?

Kon Giunsa Paggamit sa Labing Dakong mga Magtutudlo ang Makitang mga Tabang. Si Jehova migamit ug sayon-hinumdoman nga makitang mga tabang aron itudlo ang bililhong mga pagtulon-an. Usa ka gabii siya nagdala kang Abraham sa gawas ug miingon: “Palihog, tan-aw sa kalangitan ug ipha ang mga bituon, kon ikaw makahimo sa pag-ihap kanila. . . . Mahimong ingon niana ang imong binhi.” (Gen. 15:5) Bisan pag ang gisaad daw imposible gikan sa tawhanong panglantaw, si Abraham dulot nga natandog ug nagtuo kang Jehova. Sa laing higayon, si Jehova nagsugo kang Jeremias nga moadto sa balay sa usa ka magkukulon ug gipasulod siya sa buhatan sa magkukulon aron makatan-aw sa maong tawo nga magaumol sa yutang-kulonon. Pagkahalandomong pagtulon-an bahin sa awtoridad sa Maglalalang ibabaw sa mga tawo! (Jer. 18:1-6) Ug unsaon pagkalimot ni Jonas sa pagtulon-an bahin sa kaluoy nga gitudlo ni Jehova kaniya pinaagi sa tabayag? (Jon. 4:6-11) Gisugo pa gani ni Jehova ang iyang mga manalagna nga imustra ang matagnaong mga mensahe samtang naggamit ug pipila ka nahiangayng mga butang. (1 Hari 11:29-32; Jer. 27:1-8; Ezeq. 4:1-17) Ang mga bahin sa tabernakulo ug sa templo, sa kaugalingon niini, maoy mga hulagway nga makatabang kanato sa pagsabot sa langitnong mga katinuoran. (Heb. 9:​9, 23, 24) Migamit usab ang Diyos ug daghang panan-awon aron ipahayag ang hinungdanong impormasyon.​—Ezeq. 1:4-28; 8:2-18; Buh. 10:9-16; 16:​9, 10; Pin. 1:1.

Giunsa paggamit ni Jesus ang makitang mga tabang? Sa dihang ang mga Pariseo ug ang mga sumusunod sa partido ni Herodes misulay sa pagbitik kaniya diha sa iyang pagpanulti, nangayo si Jesus ug denario ug gitudlo ang hulagway ni Cesar diha sa sensilyo. Unya iyang gisaysay nga ang mga butang ni Cesar kinahanglang ibayad pagbalik kang Cesar apan ang mga butang sa Diyos kinahanglang ibayad pagbalik sa Diyos. (Mat. 22:19-21) Aron itudlo ang usa ka pagtulon-an sa pagpasidungog sa Diyos pinaagi sa tanan natong nabatonan, gipunting ni Jesus ang usa ka kabos nga babayeng balo didto sa templo kansang amot​—duha ka sensilyo​—mao ang iyang tibuok nga pangabuhian. (Luc. 21:1-4) Sa laing higayon migamit siyag usa ka gamayng bata ingong panig-ingnan sa pagkamapaubsanon, nga dili ambisyoso. (Mat. 18:2-6) Sa personal iyang gipasundayag usab ang kahulogan sa pagkamapaubsanon pinaagi sa paghugas sa mga tiil sa iyang mga tinun-an.​—Juan 13:14.

Mga Paagi sa Paggamit sa Makitang mga Tabang. Lahi kang Jehova, kita dili makakomunikar pinaagig mga panan-awon. Bisan pa niana, daghang makapukaw-sa-hunahunang mga hulagway ang makita diha sa mga basahon sa mga Saksi ni Jehova. Gamita kana aron tabangan ang mga tawong interesado sa paghanduraw sa yutan-ong Paraiso nga gisaad diha sa Pulong sa Diyos. Sa usa ka pagtuon sa Bibliya sa balay, makapunting ka sa atensiyon sa estudyante nganha sa usa ka hulagway nga may kalangkitan sa inyong ginatun-an ug hangyoa siya sa pagsulti kanimo kon unsay iyang nakita. Mamatikdan nga sa dihang gihatagag pipila ka panan-awon ang manalagnang si Amos, si Jehova nangutana: “Unsay imong nakita, Amos?” (Amos 7:​7, 8; 8:​1, 2) Makasukna kag susamang mga pangutana samtang imong ipunting ang atensiyon sa mga tawo nganha sa mga hulagway nga gidisenyo ingong makitang mga tabang sa pagpanudlo.

Kon imong isulat ang mga kalkulasyon sa matematika o gamiton ang tsart sa kronolohiya nga magpakita sa pagsunod sa hinungdanong mga panghitabo, kini makatabang sa mga tawo nga mas daling makasabot sa mga tagna sama sa “pito ka panahon” sa Daniel 4:16 ug sa “kapitoan ka semana” sa Daniel 9:24. Ang maong makitang mga tabang anaa sa daghan natong basahon.

Sa inyong pamilyahanong pagtuon sa Bibliya, ang paghisgot sa mga butang sama sa tabernakulo, sa templo sa Jerusalem, ug sa templo sa panan-awon ni Ezequiel mas daling masabtan kon mogamit kag usa ka hulagway o dibuho. Makaplagan nimo kini diha sa Insight on the Scriptures, sa apendise sa New World Translation of the Holy Scriptures​​—With References, ug sa nagkalainlaing isyu sa Ang Bantayanang Torre.

Sa dihang magbasa sa Bibliya uban sa imong pamilya, pahimusli pag-ayo ang mga mapa. Subaya ang panaw ni Abraham gikan sa Ur paingon sa Haran ug paingon sa Bethel. Susiha ang ruta nga gisubay sa Israel samtang ang nasod mibiya sa Ehipto ug mipanaw paingon sa Yutang Saad. Kaplaga ang luna nga gihatag sa matag tribo sa Israel ingong panulondon. Tan-awa ang gidak-on sa dominyo ni Solomon. Subaya ang ruta ni Elias sa iyang pagkalagiw gikan sa Jezreel hangtod gayod sa kamingawan saylo pa sa Beer-sheba human hulgaa ni Jezebel. (1 Hari 18:46–​19:4) Kaplaga ang mga siyudad ug mga lungsod nga gisangyawan ni Jesus. Subaya ang mga panaw ni Pablo, sumala sa pagkabatbat diha sa basahon sa Mga Buhat.

Ang makitang mga tabang mapuslanon sa dihang ipasinati sa mga Estudyante sa Bibliya ang mga kalihokan sa kongregasyon. Ikapakita mo sa imong estudyante ang pinatik nga programa sa asembliya ug isaysay ang matang sa impormasyon nga atong hisgotan panahon sa mga asembliya ug mga kombensiyon. Daghan ang nahingangha sa personal nga pagsuroy diha sa Kingdom Hall o sa usa ka sangang-buhatan sa mga Saksi ni Jehova. Kini mahimong epektibong paagi sa pagwagtang sa sayop nga mga pagtuo bahin sa atong buluhaton ug sa katuyoan niini. Sa dihang magagiya sa usa ka pagsuroy diha sa Kingdom Hall, ipaila ang kalainan niini gikan sa ubang mga dapit sa pagsimba. Ipasiugda nga ang tinukod maoy kasarangan ug angayan alang sa pagkakat-on. Ipunting ang mga bahin nga gidisenyo ilabina alang sa atong publikong ministeryo​—mga dapit alang sa pag-apod-apod sa literatura, mga mapa sa teritoryo, ug mga kahon sa amot (ingong kasukwahi sa mga plato sa koleksiyon sa amot).

Kon anaay mga video nga gigama ubos sa pagdumala sa Nagamandong Lawas, gamita kini aron maugmad ang pagsalig diha sa Bibliya, masinati ang mga estudyante sa buluhaton sa mga Saksi ni Jehova, ug madasig ang mga tumatan-aw nga magkinabuhi nga nahiuyon sa mga prinsipyo sa Bibliya.

Paggamit ug Makitang mga Tabang Alang sa Dudagkong mga Grupo. Sa dihang maayong pagkaandam ug ipresentar sa mahanasong paagi, ang makitang mga tabang mahimong epektibong mga tabang sa pagpanudlo alang sa dudagkong mga grupo. Ang maong makitang mga tabang gitagana sa nagkalainlaing dagway sa matinumanon ug maalamong ulipon nga matang.

Ang tun-anang materyal diha sa Ang Bantayanang Torre kasagarang naglakip sa makitang mga tabang sa pormang mga dibuho nga magamit sa konduktor aron sa pagpasiugdag hinungdanong mga punto. Kini tinuod usab sa mga basahong gigamit panahon sa Pagtuon sa Libro sa Kongregasyon.

Ang pipila ka laraw alang sa publikong mga pakigpulong daw angayan nga gamitag makitang mga tabang aron pag-ilustrar sa mga punto. Bisan pa niana, kasagarang labawng kaayohan ang mahimo pinaagi sa pagpunting sa atensiyon sa kon unsay anaa diha sa Bibliya, nga gikuptan sa kadaghanang mamiminaw. Kon ang usa ka hulagway o mubong laraw sa mga pangunang punto gikinahanglan usahay aron ipasabot ang usa o ubay-ubayng pangunang punto sa pakigpulong, susihag abante aron matino nga ang makitang tabang makita (o mabasa) nga tin-aw sa mga atua sa likod sa tigomanan. Ang maong mga kasangkapan angay nga panagsahan paggamit.

Ang atong tumong sa paggamit ug makitang mga tabang sa dihang magpakigpulong ug magapanudlo dili ang paglingaw. Sa dihang gamiton ang maligdong nga makitang tabang, angay nga ang makitang butang makapalig-on sa mga ideya nga angayan sa linaing pasiugda. Ang maong mga tabang magsilbi ug mapuslanong katuyoan sa dihang kini makatabang sa pagpatin-aw sa gilitok nga pulong, nga mas sayon kining masabtan, o sa dihang makahatag kinig lig-ong ebidensiya sa pagkamakataronganon sa gisulti. Kon tukmang pagkagamit, ang haom nga makitang tabang makahimog lalom kaayong epekto nga ang makitang tabang ug ang puntong gitudlo mahinumdoman sa daghang katuigan.

Ang katakos sa pandungog ug ang sentido sa panan-aw nagadulag hinungdanong mga papel sa pagkakat-on. Hinumdomi kon giunsa paglangkit sa labing dakong mga Magtutudlo kining maong mga sentido, ug paningkamoti ang pagsundog kanila sa imong paningkamot nga makatudlo sa uban.