Gamita ang mga Visual Aid sa Pagpanudlo
1. Giunsa paggamit ni Jehova ang mga visual aid sa pagtudlo sa iyang karaang mga alagad, ug unsay epekto?
1 Aron mapasa ang impormasyon ngadto sa iyang karaang mga alagad, usahay si Jehova naggamit ug mga panan-awon ug mga damgo. Hunahunaa ang panan-awon ni Ezequiel bahin sa langitnong karo ni Jehova. (Ezeq. 1:1-28) Handurawa kon unsay gibati ni Daniel human niya madawat ang matagnaong damgo nga naghulagway sa sunodsunod nga mga gahom sa kalibotan. (Dan. 7:1-15, 28) Ug komosta ang bahin sa kulbahinam nga pinadayag nga gipresentar pinaagig “mga ilhanan” ngadto kang apostol Juan mahitungod sa mga butang nga mahitabo panahon sa “adlaw sa Ginoo”? (Pin. 1:1, 10) Si Jehova nagtudlo kanila pinaagig tin-awng hulagway ug puwersadong aksiyon, ug kini nasilsil sa ilang mga alimpatakan.
2. Unsang mga visual aid ang atong magamit sa pagtudlo sa uban sa mga kamatuoran sa Bibliya?
2 Kon gusto natong ipaambit ang mga kamatuoran sa Bibliya ngadto sa uban sa paagi nga dili daling makalimtan, atong magamit usab ang atong mga video sa pagpanudlo. Kini naghisgot ug nagkalainlaing mga ulohan ug nagpalig-on sa atong pagsalig sa Bibliya, sa organisasyon ni Jehova, ug sa mga prinsipyo nga makapahimo kanatong mas maayong mga Kristohanon. Tagda ang pipila ka paagi nga atong magamit ang atong mga video sa pagpanudlo. Ang mosunod mao ang pipila ka video nga mahimong gamiton.
3. Unsay imong gamiton aron magiyahan ang estudyante sa Bibliya ngadto sa organisasyon?
3 Sa Ministeryo: Imo bang gisultihan ang usa ka estudyante sa Bibliya bahin sa atong tibuok-kalibotan nga Kristohanong panag-igsoonay? Ipakita kana kaniya pinaagi sa video nga Our Whole Association of Brothers. Mahimo nimo kining ipahulam kaniya aron iyang matan-aw sa dili pa ang inyong sunod nga pagtuon o dungan ninyong tan-awon kini sa sunod ninyong pagtuon. Dayon hisgoti ang mga pangutana agig repaso nga makita diha sa Hunyo 2002 nga Atong Ministeryo sa Gingharian.
4. Unsang mga himan sa pagpanudlo ang mahimong gamiton sa usa ka batan-ong Saksi diha sa eskuylahan?
4 Mga batan-on, tingali mahangyo ninyo ang inyong magtutudlo kon mahimo ba ninyong ipasalida sa klase ang dokumentaryong mga video nga Jehovah’s Witnesses Stand Firm Against Nazi Assault o Faithful Under Trials—Jehovah’s Witnesses in the Soviet Union. Ingna nga mag-andam kamog mga pangutana nga isulat sa papel, nga magpasibo sa mga pangutana diha sa Hunyo 2001 o sa Pebrero 2003 nga Atong Ministeryo sa Gingharian alang sa panaghisgot sa klase.
5. Unsay mahimong gamiton sa mga ginikanan sa ilang mga pagtuon sa pamilya?
5 Uban sa Pamilya ug mga Higala: Mga ginikanan, kanus-a ang kataposang higayon nga nakita sa inyong mga anak ang video nga Young People Ask—How Can I Make Real Friends? Nganong dili ninyo kini tan-awon pag-usab sa sunod ninyong pagtuon sa pamilya? Ang Abril 2002 nga Atong Ministeryo sa Gingharian naglaraw ug mga pangutana alang sa bibo ug prangka nga panaghisgot.
6. Sa unsang paagi imong mahikay ang makapalig-ong okasyon uban sa mga higala?
6 Aduna ba kamoy mga higala diha sa kongregasyon nga gusto ninyong imbitahon sa inyoha? Ang pagtan-aw sa video nga Respect Jehovah’s Authority makapalig-on gayod sa tanan, ilabina kon inyong sublion ang mga leksiyon nga nakat-onan pagkahuman ug tan-aw, ginamit ang mga pangutana nga anaa sa Septiyembre 2004 nga Atong Ministeryo sa Gingharian.
7. Unsang mga kahigayonan nga mahimo nimong gamiton ang atong mga video?
7 Ubang mga Kahigayonan: Aduna pa bay laing mga paagi nga imong magamit ang atong 20 ka lainlaing mga video? Makatabang ba ang pagpasalida ug usa o duha sa maong mga video ngadto sa regular nimong ginaduaw aron siya matabangang mouswag sa espirituwal? Makahangyo ka ba sa pagpasalida sa maong mga video diha sa mga nursing home o sa pasilidad alang sa mga tigulang? Makatabang ba ang maong mga video aron ang imong dili-Saksing mga paryente, silingan, ug mga isigkatrabahante makadayeg sa atong buluhaton? Ang atong mga video maoy dalayegon, matulon-anon, ug epektibong mga visual aid. Gamita kini sa pagpanudlo.