Hunyo

Kinahanglan tang magpakitag personal nga interes sa atong mga study. Isipa sila ingong umaabot nga mga igsoon. Dili sayon para kanila nga biyaan ang ilang mga higala sa kalibotan ug mohimog gikinahanglang mga kausaban sa pag-alagad kang Jehova. Tabangan sa epektibong magtutudlo sa Bibliya ang iyang study nga masuod sa ubang igsoon sa kongregasyon, kinsa makatabang kaniya nga masuod kang Jehova. Pinaagi niana, siya malipay sa pagpakig-uban sa mga igsoon, kinsa makahatag niyag espirituwal ug emosyonal nga tabang. Gusto natong mobati ang study nga ganahan tang makauban siya ug bahin siya sa atong espirituwal nga pamilya. Gusto nato nga madani siya sa atong mahigugmaon nga Kristohanong panag-igsoonay. Pinaagi niana, mahimong sayon para niya nga mohunong sa pagpakig-uban sa mga tawo nga dili makatabang niya sa paghigugma kang Jehova. (Prov. 13:20) Kon likayan na siya sa iyang kanhing mga kauban, nahibalo siya nga makakita siyag tinuod nga mga higala sa organisasyon ni Jehova.—Mar. 10:29, 30; 1 Ped. 4:4. w20.10 17 ¶10-11

Kinahanglan tang makighigala kang Jesus aron makabaton tag maayong relasyon kang Jehova. Ngano? Konsideraha ang duha sa mga rason. Una, giingnan ni Jesus ang iyang mga tinun-an: “Ang Amahan nagmahal kaninyo, tungod kay kamo nagmahal man kanako.” (Juan 16:27) Miingon sab siya: “Walay makaadto sa Amahan kon dili pinaagi kanako.” (Juan 14:6) Kon gusto natong makighigala kang Jehova pero dili ta makigsuod kang Jesus, sama kanag pagsulod sa bilding nga dili moagig pultahan. Si Jesus migamit ug susamang ilustrasyon dihang gihisgotan niya ang iyang kaugalingon ingong “pultahan alang sa mga karnero.” (Juan 10:7) Ang ikaduhang rason mao nga bug-os nga gisundog ni Jesus ang mga hiyas sa iyang Amahan. Giingnan niya ang iyang mga tinun-an: “Kadtong nakakita kanako nakakita usab sa Amahan.” (Juan 14:9) Busa aron mailhan nato si Jehova, kinahanglang tun-an nato ang kinabuhi ni Jesus. Samtang magkalawom ang atong kahibalo kang Jesus, magkalawom sab ang atong apresasyon kaniya. Ug samtang mag-anam ta ka suod kang Jesus, magkalawom sab ang atong gugma sa iyang Amahan. w20.04 21-22 ¶5-6

Naglubog ba ka sa banig o nag-wheelchair? Luya na ba kag tuhod o halap nag panan-aw? Kon mao, makadagan pa ba ka uban sa mga batan-on ug himsog? Oo! Daghang tigulang ug masakiton ang nagdagan diha sa dalan padulong sa kinabuhi. Dili nila kini mahimo sa ilang kaugalingong kusog. Hinunoa, sila gihatagan ni Jehova ug kusog pinaagi sa pagpaminaw sa mga tigom gamit ang telepono o video streaming. Ug sila nakigbahin sa paghimog mga tinun-an pinaagi sa pagsangyaw sa mga doktor, nars, ug mga paryente. Ayawg kaluya ug ayaw paghunahuna nga dili ka makalahutay sa pagdagan hangtod sa kataposan. Gimahal ka ni Jehova tungod sa imong pagtuo kaniya ug sa imong nahimo para niya sa daghan nang katuigan. Mas gikinahanglan nimo karon ang iyang tabang, ug dili ka niya biyaan. (Sal. 9:10) Hinunoa, mas makigsuod pa siya kanimo. w20.04 29-30 ¶16-17

Unsay mahimo nimong hisgotan sa tawong relihiyoso? Paghunahunag mga topiko nga pareho ninyong gituohan. Tingali nagtuo siya nga usa lang ang Diyos, o kaha si Jesus ang Manluluwas, o kaha nagkinabuhi na ta sa daotan kaayo nga panahon ug hapit nang taposon ang pagkadaotan. Base sa mga butang nga pareho ninyong giuyonan, ipresentar ang mensahe sa Bibliya sa paagi nga makapainteres kaniya. Hinumdomi nga ang mga tawo wala tingali magtuo sa tanang gitudlo sa ilang relihiyon. Mao nga bisag nahibalo ka sa relihiyon sa usa ka tawo, kinahanglang mahibaloan nimo kon unsa gyoy iyang gituohan. Ang usa ka brader nga misyonaryo nakamatikod nga ang pipila ka tawo moingon nga nagtuo sila sa Trinidad, pero tingali wala gyod sila magtuo nga ang Amahan, Anak, ug ang balaang espiritu usa ra ka Diyos. Siya miingon, “Kon nahibalo ka niana, mas sayon ang pagpangitag topiko nga parehas ninyong giuyonan.” Busa paningkamoti nga mahibaloan kon unsa gyoy gituohan sa mga tawo. Pinaagi niana, masundog nimo si apostol Pablo ug makapahiuyon ka sa “tanang matang sa katawhan.”—1 Cor. 9:19-22. w20.04 10 ¶9-10

Si Daniel ug Juan nag-ingon nga luwason ni Jehova ug Jesus ang ilang mga alagad panahon sa dakong kasakitan. Busa dili ta angayng mahadlok bisag unsa pay mahitabo sa umaabot. Si Daniel nag-ingon nga ang mga ngalan sa maluwas ‘masulat sa basahon.’ Unsay atong buhaton aron masulat ang atong ngalan nianang basahona? Kinahanglan natong pamatud-an nga nagtuo ta kang Jesus, ang Kordero sa Diyos. (Juan 1:29) Kinahanglan tang magpabawtismo ingong simbolo sa atong pagpahinungod sa Diyos. (1 Ped. 3:21) Ug kinahanglan natong ipakita ang atong pagsuportar sa Gingharian sa Diyos pinaagi sa paghimo sa atong maarangan sa pagtabang sa uban nga makakat-on bahin kang Jehova. Panahon na karon sa pagpalig-on sa atong pagsalig kang Jehova ug sa iyang organisasyon. Panahon na karon nga suportahan ang Gingharian sa Diyos. Kon ato nang buhaton, maluwas ta dihang laglagon sa Gingharian sa Diyos ang hari sa amihanan ug hari sa habagatan. w20.05 16 ¶18-19

Si Adan ug Eva nahibalo sa ngalan ni Jehova, ug nahibalo sab sila sa daghang importanteng kamatuoran bahin kaniya. Nahibalo sila nga siya ang Maglalalang, ang Usa nga naghatag kanilag kinabuhi, nindot nga Paraisong puy-anan, ug perpektong kapikas. (Gen. 1:26-28; 2:18) Pero padayon ba nilang gamiton ang ilang perpektong hunahuna sa pagpamalandong sa tanang gihimo ni Jehova para kanila? Padayon ba nilang palig-onon ang ilang gugma ug apresasyon kang Jehova? Naklaro ang tubag dihang gisulayan sila sa kaaway sa Diyos. Gamit ang usa ka halas, gipangutana ni Satanas si Eva: “Tinuod ba nga miingon ang Diyos nga dili mo angayng mokaon sa bunga sa tanang kahoy sa tanaman?” (Gen 2:16, 17; 3:1) Kana nga pangutana nasagolag bakak nga samag hilo nga dili makita. Ang giingon gyod sa Diyos mao nga sila makakaon sa bunga sa matag kahoy, gawas lang sa usa ka kahoy. (Gen. 2:9) Gipasabot ni Satanas nga mora bag ang Diyos dili mahinatagon. Si Eva tingali nakahunahuna, ‘Duna bay maayong butang nga gihikaw sa Diyos kanako?’ w20.06 3-4 ¶8-9

Dunay mga alagad ni Jehova nga nasakitan sa gihimo sa ubang igsoon. Si apostol Pablo miingon nga usahay, duna tingali tay katarongan nga ‘moreklamo’ batok sa usa ka igsoon. Tingali mobati pa gani ta nga mora tag giyatakan. Kon dili ta magbantay, basin magdumot ta. Tingali sa ngadtongadto, mopalayo na ta sa katawhan ni Jehova. Si Pablo, nga taga-South America, giakusahan nga nakahimog sala, mao nga gitangtangan siyag pribilehiyo sa kongregasyon. Unsay iyang reaksiyon? Si Pablo miingon: “Nasuko ko ug anam-anam nga mipalayo sa kongregasyon.” O kaha, kon ang usa nakahimog seryosong sala kaniadto, hasolon tingali siya sa iyang konsensiya sulod sa taas nga panahon, ug mobati siya nga dili na siya higugmaon sa Diyos. Bisag mahinulsolon siya ug gipakitaan nag kaluoy, tingali mobati siya nga dili na siya angayng mahimong bahin sa katawhan sa Diyos. Unsay imong gibati sa mga igsoon nga nakaatubang ug mga situwasyon nga susama sa nahisgotan? w20.06 19 ¶6-7

Kita kinahanglang makaila sa mga situwasyon nga makadaot nato ug likayan kana. (Heb. 5:14) Pananglitan, kinahanglang magmaalamon ta sa pagpilig kalingawan. Ang mga salida sa TV ug mga pelikula sagad nagpakitag imoral nga mga buhat. Ang maong mga buhat makapasuko sa Diyos ug makadaot kanato. Busa, likayan nato ang kalingawan nga anam-anam nga makapahuyang sa atong gugma sa Diyos. (Efe. 5:5, 6) Kinahanglan sab natong mailhan ang kapeligrohan sa sayop nga impormasyon nga gipakaylap sa mga apostata, kinsa magpatunghag mga pagduhaduha bahin sa atong mga igsoon ug sa organisasyon ni Jehova. (1 Tim. 4:1, 7; 2 Tim. 2:16) Ang maong sayop nga impormasyon makapahuyang sa atong pagtuo. Dili gyod ta magpalimbong niini nga propaganda. Ngano? Tungod kay kini nga mga estorya gipakaylap “sa mga tawong hugawg kaisipan ug wala na makasabot sa kamatuoran.” Tuyo nila nga magsugod ug “mga argumento ug mga debate.” (1 Tim. 6:4, 5) Gusto nila nga motuo ta sa ilang mga bakak ug dili na mosalig sa atong mga igsoon. w20.09 29 ¶13, 15

Ang bana ug asawa angay nga magpakitag gugma ug pagtahod sa usag usa. (Efe. 5:33) Ang Bibliya nagtudlo nga magpokus ta sa paghatag imbes sa pagdawat. (Buh. 20:35) Unsang hiyas ang makatabang sa magtiayon sa pagpakitag gugma ug pagtahod? Ang pagkamapainubsanon. Ang pagkamapainubsanon nakatabang sa daghang Kristohanong magtiayon nga mahimong mas malipayon sa ilang kaminyoon. Pananglitan, si Steven miingon: “Ang magtiayon angayng magtinabangay ilabina kon dunay mga problema. Imbes maghunahuna ‘unsay labing maayo para nako?’ mas maayong maghunahuna ‘unsay labing maayo para namo?’” Mao sab nay gibati sa iyang asawa nga si Stephanie. Siya miingon: “Walay ganahang makig-uban sa tawong makilalison. Kon dili mi magkasinabot, among sayron kon unsay hinungdan sa problema. Dayon, mag-ampo mi, mag-research, ug mag-estorya kon unsaon pagsulbad ang problema. Maningkamot mi nga masulbad ang problema ug dili maglalis.” Ang mga bana ug asawa mas magmalipayon kon dili sila maghunahuna nga mas importante sila kay sa ilang kapikas. w20.07 3-4 ¶5-6

Ayawg salig sa kaugalingong kusog o katakos diha sa imong pag-alagad kang Jehova. Si apostol Pablo edukado. Siya gitudloan sa usa sa labing tinahod nga Hudiyong lider sa iyang panahon, si Gamaliel. (Buh. 5:34; 22:3) Kaniadto, si Pablo tinamod diha sa Hudiyong komunidad. (Buh. 26:4) Pero si Pablo wala mosalig sa kaugalingon. Si Pablo nalipay nga biyaan ang mga butang nga nakapahimo niyang importante sa kalibotan. (Filip. 3:8) Si Pablo nakasinatig daghang kalisdanan dihang nahimo siyang sumusunod sa Kristo. Gidumtan siya sa iyang kaugalingong katawhan. (Buh. 23:12-14) Ug siya gibunalan ug gipriso sa iyang mga isigkalungsoranon, ang mga Romano. (Buh. 16:19-24, 37) Dugang pa, nakaamgo si Pablo nga tungod sa pagkadili-hingpit lisod kaayo para niya ang paghimog matarong. (Roma 7:21-25) Imbes maluya tungod sa mga pagsupak o sa iyang mga kasaypanan, siya ‘nalipay sa mga kahuyangon.’ Ngano? Tungod kay sa dihang siya huyang, nakita niya ang tabang sa Diyos.—2 Cor. 4:7; 12:10. w20.07 16 ¶7-8

Karon, kinahanglan gyod natong unahon ang pagsangyaw sa Gingharian. Si Jesus nagtagna nga kining buluhatona mouswag ug magpadayon human sa iyang kamatayon. Human sa iyang pagkabanhaw, milagroso niyang gitabangan ang pipila ka tinun-an nga makakuhag daghang isda. Gigamit niya ang maong higayon sa pagpasiugda nga ang pagsangyaw ug paghimog mga tinun-an mas importante kay sa bisan unsang buluhaton. (Juan 21:15-17) Sa dayon nag saka ni Jesus sa langit, giingnan niya ang iyang mga tinun-an nga ang buluhatong pagsangyaw nga iyang gisugdan makaabot sa ubang kanasoran. (Buh. 1:6-8) Katuigan sa ulahi, gihatagan ni Jesus ug panan-awon si apostol Juan aron ipakita kaniya kon unsay mahitabo “sa adlaw sa Ginoo.” Nakita ni Juan kining katingalahan kaayong hitabo: Ubos sa pagpanguna sa mga anghel, ang “walay kataposang maayong balita” gisangyaw ngadto sa “matag nasod ug tribo ug pinulongan ug katawhan.” (Pin. 1:10; 14:6) Klaro nga kabubut-on ni Jehova karon nga makigbahin ta niining tibuok kalibotang pagsangyaw hangtod nga kini matapos. w20.09 9 ¶5

Ang pamilya ni Abraham may dakong problema. Ang iyang pinalanggang asawa nga si Sara dili makaanak. Sulod sa daghang katuigan, naguol kaayo sila niana. Sa ngadtongadto, gihatag ni Sara ang iyang sulugoon nga si Agar ngadto kang Abraham aron kini makahatag ug anak para kang Abraham ug Sara. Pero sa dihang si Agar nagmabdos kang Ismael, siya misugod sa pagbiaybiay kang Sara. Nahimong lisod kaayo ang situwasyon maong gipalayas ni Sara si Agar. (Gen. 16:1-6) Sa kataposan, si Sara nagmabdos ug nanganak ug batang lalaki nga ginganlan ni Abraham ug Isaac. Parehong pinangga ni Abraham ang iyang mga anak nga si Ismael ug Isaac. Pero tungod sa dili maayong pagtratar ni Ismael kang Isaac, si Abraham napugos sa pagpalakaw kang Ismael ug Agar. (Gen. 21:9-14) Sa ulahi, giingnan ni Jehova si Abraham nga ihalad si Isaac. (Gen. 22:1, 2; Heb. 11:17-19) Nianang duha ka higayon, si Abraham kinahanglang mosalig nga sa ngadtongadto tumanon ni Jehova ang iyang saad maylabot sa iyang mga anak. w20.08 4 ¶9-10

Imadyina ang kalipay niadtong mga binanhaw samtang hukason nila ang ilang daang personalidad ug magkinabuhi sila sumala sa matarong nga mga sukdanan sa Diyos. Kadtong mohimo niini nga mga kausaban tugotan nga mabuhi hangtod sa hangtod sa Paraiso. Pero kadtong morebelde sa Diyos dili tugotan nga padayong mabuhi sa Paraiso ug makatugaw sa kalinaw didto. (Isa. 65:20; Juan 5:28, 29) Ubos sa pagmando sa Gingharian, maeksperyensiyahan sa katawhan sa Diyos nga tinuod ang giingon sa Proverbio 10:22: “Ang panalangin ni Jehova mao ang makapadato, ug dili niya kini dugangan ug kasakit.” Sa tabang sa espiritu ni Jehova, ang iyang katawhan mahimong dato sa espirituwal, buot ipasabot, sila anam-anam nga mahisama sa Kristo ug mahimong hingpit. (Juan 13:15-17; Efe. 4:23) Kada adlaw, sila mahimong mas himsog ug mas maayong tawo. Pagkamakapalipay unya niana!—Job 33:25. w20.08 17 ¶11-12

Kinahanglan natong hinumdoman nga ang pipila ka Kristohanon midesisyon nga dili magminyo. Ang uban gustong magminyo, pero wala sila makakitag maayong minyoan. Duna poy uban nga namatyag kapikas. Bisan unsa pay rason, husto ba nga pangutan-on nato sila kon nganong wala sila magminyo o angay bang motanyag ta nga tabangan sila nga makakitag kapikas? Kon ang usa wala mangayog tabang, unsa kahay iyang bation kon ato nang himoon? (1 Tim. 5:13) Ang atong mga igsoon nga wala magminyo magmapasalamaton kon pabilhan nato sila tungod sa maayo nilang mga hiyas. Imbes isipon silang makaluluoy, angay nato silang pabilhan tungod sa ilang pagkamatinumanon. Ingong resulta, dili gyod sila mobati nga mora bag giingnan nato sila: “Wala ko magkinahanglan ninyo.” (1 Cor. 12:21) Hinunoa, mahibalo sila nga kita nagtahod nila ug nagpabili sa ilang lunà diha sa kongregasyon. w20.08 29 ¶10, 14

Sa ulahi, si Jesus nagpakita kang apostol Pablo mismo. (1 Cor. 15:8) Si Pablo (Saulo) nagpaingon sa Damasco dihang nadungog niya ang tingog sa nabanhawng si Jesus ug, pinaagi sa panan-awon, nakita niya si Jesus didto sa langit. (Buh. 9:3-5) Ang eksperyensiya ni Pablo nakadugang sa ebidensiya nga nabanhaw gyod si Jesus. (Buh. 26:12-15) Ang giingon ni Pablo makapainteres gyod sa pipila kay kaniadto gilutos niya ang mga Kristohanon. Dihang nakombinsir si Pablo nga nabanhaw si Jesus, naningkamot siya pag-ayo nga makombinsir ang uban bahin niana. Siya gibunalan, gipriso, ug nakasinatig pagkalunod samtang siya nagsangyaw nga si Jesus namatay pero nabuhi pag-usab. (1 Cor. 15:9-11; 2 Cor. 11:23-27) Segurado kaayo si Pablo nga nabanhaw si Jesus mao nga andam siyang mamatay aron depensahan ang iyang pagtuo. Dili ba kini nga pamatuod makapakombinsir pod nato nga si Jesus nabanhaw? Ug dili ba makapalig-on ni sa atong pagtuo sa pagkabanhaw? w20.12 3 ¶8-10

Puwede natong pangutan-on ang atong kaugalingon: ‘Regular ba kong nagatambong sa mga tigom?’ Diha sa mga tigom, mapalig-on ta sa espirituwal ug madasig sa atong mga igsoon. (Mat. 11:28) Mahimo sab natong pangutan-on ang kaugalingon, ‘Duna ba koy maayong rutina sa personal nga pagtuon?’ Kon nagpuyo ka uban sa imong pamilya, duna ba moy pamilyahanong pagsimba kada semana? O kon nag-inusara kag puyo, naggahin ba gihapon kag panahon para niana, nga sama rag bahin ka sa usa ka pamilya? Dugang pa, gihimo ba nimo ang imong maarangan sa pagsangyaw ug paghimog mga tinun-an? Nganong ipangutana nato kana sa kaugalingon? Ang Bibliya nag-ingon nga ginasusi ni Jehova ang atong hunahuna ug kasingkasing, busa angay pod nato nang himoon. (1 Cron. 28:9) Kon makita nato nga kinahanglan tang mohimog kausaban sa atong mga tumong o panghunahuna, angay tang mangayog tabang kang Jehova nga mahimo kana. Karon na ang panahon nga andamon ang atong kaugalingon para sa umaabot nga mga pagsulay. w20.09 19 ¶19-20

Giilustrar ni Jesus kon unsay kinahanglang buhaton aron mahimong iyang tinun-an. Siya naghisgot bahin sa usa nga gustong magtukod ug torre ug bahin sa usa ka hari nga gustong makiggubat. Si Jesus nag-ingon nga ang usa nga gustong magtukod ug torre kinahanglan ‘unang molingkod ug kuwentahon ang gasto’ sa paghuman niana. Miingon sab siya nga ang hari kinahanglan ‘unang molingkod ug mangonsulta’ kon mapildi ba sa iyang mga sundalo ang kaaway. (Luc. 14:27-32) Sa susama, si Jesus nahibalo nga ang usa nga gustong mahimong tinun-an kinahanglang maghunahuna pag-ayo kon unsay kahulogan sa pagkahimong iyang sumusunod. Busa, kinahanglang dasigon nato ang mga Bible study nga magtuon uban nato kada semana. Ingong magtutudlo, kinahanglang mangandam ka pag-ayo sa matag pagtuon. Hunahunaa ang imong Bible study, ug pamalandonga kon unsaon nimo pagpresentar ang impormasyon sa simple ug klarong paagi aron dali niya kining masabtan ug mapadapat.—Neh. 8:8; Prov. 15:28a. w20.10 7 ¶5; 8 ¶7

Tin-aw ang instruksiyon ni Jesus. Kinahanglan natong tudloan ang mga tawo sa mga butang nga iyang gisugo. Pero, dili nato angayng kalimtan ang usa ka importanteng detalye. Si Jesus wala moingon: ‘Tudloi ninyo sila sa tanan nakong gisugo kaninyo.’ Hinunoa, siya miingon: Tudloi ninyo sila “sa pagtuman sa tanan nakong gisugo kaninyo.” Aron masunod kanang espesipikong instruksiyon dihang magtudlo sa usa ka Bible study, kinahanglan nga dili lang ta magtutudlo kondili mga tiggiya usab. (Buh. 8:31) Ang “pagtuman” sa usa ka sugo nagpasabot ug pagsunod niana. Dihang mag-Bible study ta sa uban, gitudloan nato sila sa mga sukdanan sa Diyos. Pero, duna pa tay angayng himoon. Kinahanglan natong tudloan ang atong mga Bible study nga ipadapat nila sa adlaw-adlawng pagkinabuhi ang ilang nakat-onan. (Juan 14:15; 1 Juan 2:3) Pinaagi sa atong binuhatan, ikapakita nato sa atong mga study kon unsaon nila pagpadapat ang ilang nakat-onan sa Bibliya diha sa eskuwelahan, trabahoan, o panahon sa lingawlingaw. Uban sa atong mga study, puwede natong iampo kang Jehova nga giyahan sila sa balaang espiritu.—Juan 16:13. w20.11 2-3 ¶3-5

Ang mga tinun-an ni Jesus nakaatubang ug mga kalisdanan. Pananglitan, pipila lang ang kopya sa Kasulatan. Wala silay mga publikasyon sama sa atong nabatonan karon. Ug ang mga tawo nga ilang sangyawan lainlaig pinulongan. Bisan pa niana, nahimo sa madasigong mga tinun-an ang daw imposible—sa mga 30 lang ka tuig, ilang nasangyaw ang maayong balita “sa tibuok kalibotan.” (Col. 1:6, 23) Sa modernong panahon, si Jehova padayong naggiya sa iyang katawhan ug naghatag kanilag kusog sa paghimo sa iyang kabubut-on. Siyempre, sagad naggiya siya sa iyang katawhan pinaagi sa Bibliya, nga gisulat sa tabang sa balaang espiritu. Sa Bibliya, mabasa nato ang rekord sa ministeryo ni Jesus ug ang gisugo niya sa iyang mga sumusunod nga ipadayon ang buluhaton nga iyang gisugdan. (Mat. 28:19, 20) Si Jehova dili mapihigon; siya nagtagna nga ang maayong balita ipahayag “ngadto sa matag nasod ug tribo ug pinulongan ug katawhan.” (Pin. 14:6, 7) Gusto niya nga ang mensahe sa Gingharian madunggan sa tanan. w20.10 21 ¶6-8

Si Haring David nahigugma sa “balaod ni Jehova.” (Sal. 1:1-3) Nahibalo si David nga luwason ni Jehova kadtong mapainubsanon pero Iyang isalikway ang mapahitas-on. Busa gitugotan ni David nga bag-ohon sa balaod sa Diyos ang iyang panghunahuna. Siya misulat: “Dayegon nako si Jehova, nga naghatag kanakog tambag. Bisag panahon sa kagabhion, ang akong kinasulorang mga hunahuna nagtul-id kanako.” (Sal. 16:7) Kon mapainubsanon ta, tugotan nato ang Pulong sa Diyos sa pagtul-id sa atong sayop nga panghunahuna sa dili pa ta makahimog daotan. Ang Pulong sa Diyos mahisamag tingog nga mag-ingon kanato: “Kini ang dalan. Lakaw mo niini.” Magpasidaan ni nato dihang mahitipas ta sa dalan ug moliko sa tuo o sa wala. (Isa. 30:21) Pinaagi sa pagpaminaw kang Jehova, makabenepisyo ta sa daghang paagi. (Isa. 48:17) Pananglitan, dili ta maulawan kay gibadlong ta sa uban. Ug mas masuod ta kang Jehova kay nahibalo ta nga gitratar ta niya samag pinalanggang anak.—Heb. 12:7. w20.11 20 ¶6-7

Posibleng naimpluwensiyahan ang pipila ka taga-Corinto sa maong panghunahuna. (1 Cor. 15:12) Dugang pa, ang uban tingali naghunahuna nga ang pagkabanhaw simboliko, nga nagpasabot nga ang usa ka tawo nga “patay” kaniadto tungod sa sala nahimong “buhi” ingong Kristohanon. Bisag unsa pay ilang rason, ang ilang pagsalikway sa pagkabanhaw nagpasabot nga ang ilang pagtuo walay pulos. Kon wala banhawa sa Diyos si Jesus, walay lukat nga gibayran ug ang tanan makasasala gihapon. Busa kadtong nagsalikway sa pagkabanhaw walay tinuod nga paglaom. (1 Cor. 15:13-19; Heb. 9:12, 14) Si apostol Pablo mismo nahibalo nga “ang Kristo gibanhaw.” Ang maong pagkabanhaw mas maayo kay sa pagkabanhaw nga nahitabo sa nangagi, kay ang mga tawong gibanhaw namatay ra gihapon sa ulahi. Si Pablo miingon nga si Jesus ang “unang bunga niadtong mga nangatulog sa kamatayon.” Siya ang unang tawo nga gibanhaw ingong espiritu ug ang unang tawo nga misaka sa langit.—1 Cor. 15:20; Buh. 26:23; 1 Ped. 3:18, 22. w20.12 5 ¶11-12

Sa unang siglo, ang nagamandong lawas sa Jerusalem nagtinabangay aron mamentinar ang kahapsay ug kalinaw sa katawhan sa Diyos. (Buh. 2:42) Pananglitan, sa mga tuig 49 C.E., daghang Kristohanon ang wala magkauyon bahin sa isyu sa pagtuli. Busa ubos sa paggiya sa balaang espiritu, gihisgotan sa nagamandong lawas ang maong isyu. Kon ang kongregasyon dili magkahiusa bahin niini, mababagan ang buluhatong pagsangyaw. Ang mga apostoles ug mga ansiyano maoy mga Hudiyo, pero wala sila magpaimpluwensiya sa Hudiyohanong tradisyon o niadtong nagtudlo niana. Hinunoa, nagpagiya sila sa Pulong sa Diyos ug sa balaang espiritu. (Buh. 15:1, 2, 5-20, 28) Unsay resulta? Gipanalanginan ni Jehova ang ilang desisyon, namentinar ang kalinaw ug panaghiusa, ug nagpadayon ang buluhatong pagsangyaw. (Buh. 15:30, 31; 16:5) Sa modernong panahon, ang organisasyon ni Jehova naningkamot sab nga mamentinar ang kahapsay ug kalinaw sa katawhan ni Jehova. w20.10 22-23 ¶11-12

Tungod sa pangedaron, panglawas, o ubang hinungdan, dili tingali ihatag kanato ang usa ka teokratikanhong asaynment. Kon mao nay atong kahimtang, makakat-on ta kang Haring David. Dihang giingnan siya nga dili siya ang motukod sa templo sa Diyos—butang nga gusto kaayo niyang himoon—bug-os niyang gisuportahan ang gipili sa Diyos para sa maong asaynment. Daghan pa ganig giamot si David para sa maong proyekto. Maayo gyod siyang ehemplo para kanato! (2 Sam. 7:12, 13; 1 Cron. 29:1, 3-5) Tungod sa mga problema sa panglawas, si Hugues, brader nga taga-France, miundang sa pagkaansiyano, ug dili na gani siya makahimo bisan sa simpleng mga buluhaton sa balay. Siya misulat: “Sa primero, naluya kaayo ko ug mibating way pulos. Pero sa ngadtongadto, nakita nako nga importanteng dawaton ang akong mga limitasyon. Ug nagmalipayon ko sa kon unsay akong mahimo diha sa pag-alagad kang Jehova. Sama kang Gideon ug sa iyang 300 ka sundalo—nga ang tanan gipangkapoy—magpadayon ko sa pagpakigbisog!”—Maghu. 8:4. w20.12 25 ¶14-15

Sa iyang asoy bahin sa kinabuhi ni Jesus, mas kadaghan gigamit ni apostol Juan ang pulong nga “gugma” ug “gihigugma” kon itandi sa tulo pa ka magsusulat sa Ebanghelyo. Ang maong mga sinulat nagpakita nga kinahanglang gipalihok sa gugma ang tanan natong buhaton. (1 Juan 4:10, 11) Pero wala dayon makakat-on niana si Juan. Sa dihang batabata pa si Juan, may mga higayon nga wala siya magpakitag gugma. Pananglitan, usa ka higayon niana, si Jesus ug ang iyang mga tinun-an mibiyahe paingon sa Jerusalem agi sa Samaria. Sa usa ka gamayng lungsod sa Samaria, wala sila abiabiha. Si Juan misugyot nga magpakanaog ug kalayo gikan sa langit aron laglagon ang tibuok lungsod! (Luc. 9:52-56) Sa laing higayon, dayag nga giingnan ni Juan ug sa iyang igsoong si Santiago ang ilang inahan nga hangyoon si Jesus nga hatagan silag prominenteng posisyon tupad kaniya sa Gingharian. Dihang nahibaloan sa ubang apostoles ang gihimo ni Santiago ug Juan, puwerte nilang sukoa! (Mat. 20:20, 21, 24) Pero bisan pa sa tanang kasaypanan ni Juan, gimahal siya ni Jesus.—Juan 21:7. w21.01 8-9 ¶3-4

Si Jehova naghimog mga desisyon nga nakahatag ug kaayohan sa uban. Pananglitan, siya midesisyon sa paglalang ug kinabuhi, dili aron makabenepisyo siya, kondili aron matagamtam sab nato ang kalipay sa pagkinabuhi. Walay nagpugos niya sa paghatag sa iyang Anak aron tubson ang atong mga sala. Siya kinabubut-ong midesisyon sa paghimo sa maong sakripisyo para sa atong kaayohan. Si Jesus sab mihimog mga desisyon nga nakahatag ug kaayohan sa uban. Pananglitan, bisag kinahanglan siyang mopahulay, iyang gitudloan ang panon sa katawhan. (Mar. 6:31-34) Ang maayong ulo sa pamilya nahibalo nga ang usa sa kinalisdang mga butang nga angay niyang buhaton mao ang paghimog maalamong mga desisyon para sa iyang pamilya, ug seryosohon niya ang maong responsibilidad. Maningkamot siya nga malikayan ang paghimog mga desisyon nga walay maayong rason o gibase lang sa emosyon. Hinunoa, tugotan niya si Jehova sa pagbansay kaniya. (Prov. 2:6, 7) Nianang paagiha, maghunahuna siya sa kaayohan sa uban, dili sa iyang kaugalingon. (Filip. 2:4) Kon ang bana maningkamot sa pagsundog sa ehemplo ni Jehova ug Jesus, mahimo siyang maayong ulo sa pamilya. w21.02 7 ¶19-21

Sa batan-on pa si Haring Asa, siya mapainubsanon ug maisogon. Pananglitan, dihang nahimo siyang hari human sa kamatayon sa iyang amahan nga si Abias, gisugdan niya ang kampanya batok sa idolatriya. Dugang pa, “iyang giingnan ang Juda nga pangitaon si Jehova nga Diyos sa ilang mga katigulangan ug tumanon ang Balaod ug ang kasugoan.” (2 Cron. 14:1-7) Ug sa dihang si Zera nga Etiopianhon misulong sa Juda uban ang 1,000,000 nga sundalo, si Asa nangayog tabang kang Jehova, nga miingon: “Oh Jehova, dili nimo igsapayan kon ang imong tabangan daghan ba o huyang. Tabangi mi, Oh Jehova nga among Diyos, kay kami nagasalig kanimo.” Kining nindot nga mga pulong nagpakita kon unsa ka dako ang pagsalig ni Asa sa katakos ni Jehova sa pagluwas kaniya ug sa iyang katawhan. Si Asa misalig sa iyang langitnong Amahan, ug ‘gitabangan siya ni Jehova sa pagpildi sa mga Etiopianhon.’ (2 Cron. 14:8-12) Seguradong mouyon mo nga dili gyod lalim nga sulongon mog 1,000,000 nga sundalo. Pero kay misalig si Asa kang Jehova, nagmalamposon siya. w21.03 5 ¶12-13

Ang Bibliya naghisgot bahin sa dili hingpit nga mga tawo nga nagpakitag mabinationg pagmahal. Tagda ang pananglitan ni Jonatan ug David. Ang Bibliya nag-ingon: “Si Jonatan ug David nahimong suod nga managhigala, ug si Jonatan nahigugma kaniya sama sa iyang kaugalingon.” (1 Sam. 18:1) Si David gidihogan aron mahimong hari human kang Saul. Human niana, si Saul nasina pag-ayo kang David ug misulay pagpatay kaniya. Pero ang anak ni Saul nga si Jonatan wala mosuportar sa plano niini nga patyon si David. Si Jonatan ug David nagsinaaray nga magpabilin silang managhigala ug kanunayng suportahan ang usag usa. (1 Sam. 20:42) Ang mabinationg pagmahal tali kang Jonatan ug David talagsaon kaayo kon atong konsiderahon ang pipila ka butang nga makapugong unta nila nga mahimong managhigala. Pananglitan, si Jonatan magulang kang David ug mga 30 anyos. Puwede untang maghunahuna si Jonatan nga dili siya mahimong makigsuod sa usa nga mas bata ug menos ug eksperyensiya. Pero wala maghunahuna si Jonatan niana. Dako ang iyang pagtahod kang David. w21.01 22 ¶6-7

Si Jesus nagsaad sa iyang mga sumusunod nga sila tinuod nga magmalipayon. Gipasidan-an sab niya ang mga nahigugma kaniya nga makaatubang silag mga pagsulay. (Mat. 10:22, 23; Luc. 6:20-23) Nalipay ta nga mahimong mga tinun-an sa Kristo. Pero unsa may atong bation kon supakon ta sa atong pamilya, lutoson sa gobyerno, o presyuron sa atong mga kauban sa trabaho o eskolmet sa paghimog daotan? Aw, mabalaka tingali ta. Daghan ang naghunahuna nga ang paglutos dili makapalipay. Pero, lahi ang giingon sa Pulong sa Diyos. Pananglitan, ang tinun-ang si Santiago misulat nga imbes mawad-ag paglaom, angay tang malipay dihang makasinatig mga pagsulay. (Sant. 1:2, 12) Ug si Jesus miingon nga angay tang magmalipayon bisan dihang lutoson. (Mat. 5:11) Gigiyahan ni Jehova si Santiago sa pagsulat sa maong mga Kristohanon aron hatagan silag praktikal nga tambag nga makatabang nila sa pagpabiling malipayon bisan pag nag-atubang ug mga kalisdanan. w21.02 26 ¶1-2; 27 ¶5

Sa panahon ni Timoteo, ang pipila ka Kristohanon wala magpabili sa ilang pribilehiyo nga mahimong mga isigkamagbubuhat sa Diyos. Apil kanila si Demas, Figelo, Hermogenes, Himeneo, Alejandro, ug Fileto. (1 Tim. 1:19, 20; 2 Tim. 1:15; 2:16-18; 4:10) Kini sila lig-on kaniadto sa espirituwal, pero nawad-an silag pagpabili sa bililhong mga butang nga gipiyal kanila. Unsay ginahimo ni Satanas aron buhian nato ang bililhong mga butang nga gipiyal ni Jehova kanato? Matikdi ang pipila sa mga taktika ni Satanas. Siya naggamit sa kalingawan ug sa media sa pagpasiugdag kalibotanong mga prinsipyo, panghunahuna, ug panggawi aron moluag ang atong pagpangupot sa kamatuoran. Siya naggamit sa negatibong komento sa mga tawo o sa paglutos aron mahadlok ta ug mohunong sa pagsangyaw. Ug siya nagdani kanato sa pagpaminaw “sa bakak nga ‘kahibalo’” sa mga apostata aron mobiya ta sa kamatuoran. Kon dili ta magbantay, anam-anam nga moluag ang atong pagpangupot sa kamatuoran.—1 Tim. 6:21. w20.09 27 ¶6-8

Duna bay higala o membro sa pamilya nga nagtraydor nimo? Kon mao, makabenepisyo ka sa pagbasa pag-usab sa asoy bahin sa anak ni Haring David nga si Absalom. (2 Sam. 15:5-14, 31; 18:6-14) Human nimo mabasa ang asoy, sultihi si Jehova kon unsay imong gibati bahin sa dili maayong pagtratar kanimo. (Sal. 6:6-8) Sunod, imadyina kon unsay posibleng gibati ni David samtang nahitabo kini kaniya. Iyang gimahal si Absalom ug may pagsalig siya kang Ahitopel. Pero gitraydor siya niining duha ka tawo nga suod kaniya. Gipasakitan nila siya pag-ayo ug gisulayan pa gani pagpatay. Puwede untang mawad-ag pagsalig si David sa uban niyang higala, nga magduda nga sila midapig sab kang Absalom. Puwede unta siyang maghunahuna lang sa iyang kaugalingon ug moikyas sa nasod nga mag-inusara. O puwede siyang magpadaog sa kaluya sa buot. Hinunoa, nangayo siyag tabang kang Jehova. Nangayo pod siyag tabang sa iyang mga higala. Ug milihok dayon siya aron himoon ang iyang mga desisyon. Padayon siyang misalig kang Jehova ug sa iyang mga higala. w21.03 15 ¶7-8; 17 ¶10-11