ADONI-ZEDE

[Ang (Akong) Ginoo Maoy Pagkamatarong].

Usa ka hari sa Jerusalem panahon sa pagsakop sa mga Israelinhon sa Yutang Saad. Si Adoni-zedek miduyog sa ubang gagmayng mga gingharian sa K sa Jordan sa usa ka hiniusang paningkamot sa pagsanta sa pagpanakop sa kasundalohan ni Josue. (Jos 9:1-3) Apan, ang Hivihanong mga molupyo sa Gabaon nakigdait kang Josue. Sa lakang nga gihimo ingong panimalos aron mahunong ang dugang pang pagtalikod aron sa pagdapig sa mga kaaway, gihiusa ni Adoni-zedek ang iyang kasundalohan uban sa kasundalohan sa upat pa ka hari sa mga Amorihanon, ug siya naglikos sa Gabaon ug nakiggubat niini. Ang talagsaong pagluwas ni Josue sa mga Gabaonhon ug ang makapahugnong kapildihan niining hiniusang kasundalohan nakapakalagiw sa lima ka hari ngadto sa Makeda, diin sila natanggong sa usa ka langob. Si Josue mismo maoy nagpatay kang Adoni-zedek ug sa ubang upat ka hari atubangan sa iyang kasundalohan ug nagbitay kanila diha sa mga estaka. Sa kataposan ang ilang mga patayng lawas gisalibay ug balik ngadto sa langob, nga maoy nahimong ilang lubnganan.​—Jos 10:1-27.