ADUMIM

[gikan sa lintunganayng pulong nga nagkahulogang “pula”; lagmit, Pulang mga Bato].

Ang tungasanan sa Adumim maoy usa ka titip nga agianan nga mga 12 km (7.5 mi) sa SAS sa Jerusalem ug sa tungatunga tali sa mga siyudad sa Jerico ug Jerusalem. Gikan sa ubos nga Walog sa Jordan kini mopadulong sa bukirong rehiyon sa Juda. Gikan sa karaang kapanahonan hangtod karon, ang dalan tali sa duha ka siyudad molatas niini nga agianan. Apan, gihisgotan lamang kini diha sa rekord sa Bibliya ingong timaan sa utlanan tali sa mga teritoryo sa Juda ug Benjamin.​—Jos 15:7; 18:17.

Sa Arabiko ang agianan gitawag ug Talʽat ed-Damm (nagkahulogang “Tungasanan sa Dugo”) ug sa Hebreohanon kini gitawag ug Maʽale Adummim (nagkahulogang “Tungasanan sa Adumim”). Bisan tuod nga gituohan sa pipila ka karaang mga magsusulat nga kining ngalana naggikan sa gihimong pag-ula ug dugo sa mga tulisan ug mga bandido, ang mas tukmang hinungdan mao ang pagkapulahon ug kolor sa yuta tungod sa nadayag nga mga pat-ak sa taya. Ang ruta kanunayng peligroso tungod sa kaawaaw sa rehiyon ug sa kakaylap sa pagpanulis, ug sukad sa unang mga panahon ang usa ka kuta gibutang didto aron mapanalipdan ang mga magpapanaw. Tungod niini, kining dapita gituohan nga maoy nahitaboan sa pag-atake sa usa ka magpapanaw ‘sa iyang paglugsong paingon sa Jerico,’ ingon sa gihisgotan sa sambingay ni Jesus bahin sa matinabangon nga Samarianhon.​—Luc 10:30-37.

Ang “bul-oganang walog” nga gihisgotan sa Josue 15:​7, diin ang tungasanan sa Adumim nahimutang sa H, dayag nga mao ang Wadi el Qilt nga moagos ubay sa dalan ug moagi sa H mismo sa Jerico paingon sa Suba sa Jordan.